Copa del Rey: Barca za ta fuskanci Valencia a zagayen ƴan takwas
Asalin hoton, Getty Images
Barcelona za ta je gidan Valencia a Copa del Rey zagayen kwata fainal, kamar yadda aka raba jaddawali ranar Litinin.
Barcelona ta kawo wannan matakin, sakamakon nasara a kan Real Betis 5-1 ranar Laraba 15 ga watan Janairu a zagayen ƴan 16.
Ita kuwa Valencia zuwa ta yi ta doke Ourense 2-0 ranar Talata 14 ga watan Janairu.
Valencia da Barcelona za su fuskanci juna a zagayen ƴan takwas ranar Laraba 5 ga watan Fabrairu a filin wasa da ake kira Mestalla.
Kafin nan Barcelona za ta je Benfica a Champions League ranar Talata 21 ga watan Janairu, sannan ta kece raini da Valencia a La Liga ranar Lahadi 26 ga watan Janairu.
Daga nan sai Barcelona ta karɓi bakuncin Alaves a La Liga ranar Lahadi 2 ga watan Fabrairu, sai kuma ta kara fuskantar Valencia a Copa del Rey ranar Laraba 5 ga watan Fabrairu.
A kakar nan Barcelona ta doke Valencia 2-1 a La Liga, inda Robert Lewandowski ne ya ci ƙwallayen ranar 17 ga watan Agustan 2024, shi ne labulen buɗe kakar 2024/25.
Ƙungiyoyin sun kara sau huɗu a baya a zagayen daf da karshe Copa del Rey, inda Barcelona ta kai zagayen karshe sau uku a 2017/18 da 2015/16 da kuma 2011/12.
Jadawalin kwata fainal a Copa del Rey:
- Leganes da Real Madrid
- Atlético Madrid da Getafe
- Real Sociedad da Osasuna
- Valencia da Barcelona
