ગુજરાત ચૂંટણી : 89 બેઠકનું મતદાન પૂર્ણ, નર્મદા જિલ્લામાં સૌથી વધુ 73 ટકા

લાઇવ કવરેજ

1. 1 ડિસેમ્બર 2022ગૅસના સિલિન્ડર સાથે ધાનાણી પહોંચ્યા મતદાનમથકે

   અમરેલીમાં કૉંગ્રેસના ધારાસભ્ય પરેશ ધાનાણીએ મતદાન કરવા જતી વખતે વિરોધની અનોખી રીત દર્શાવી હતી.

   ધાનાણી સાઇકલ પર ગૅસનો સિલિન્ડર મૂકીને મતદાન કરવા ગયા હતા. ગૅસના સિલિન્ડરની વધેલી કિંમતો સામે આક્રોશ વ્યક્ત કરવા માટે ધાનાણીએ આવો પ્રયોગ કર્યો હતો.

   આવા વિવિધ કાર્યક્રમો આપવા, ધ્યાન ખેંચે એવી રીતે મુદ્દાની રજૂઆત કરવી વગેરે બાબતમાં પરેશ ધાનાણીને મહારત હાંસલ છે.

   જોકે પરેશ ધાનાણીનાં વિરોધપ્રદર્શનો અને પ્રચારાત્મક કાર્યોના વાઇરલ વીડિયો વધારે ક્રીએટિવ અને અસરકારક રહ્યા છે.

2. 1 ડિસેમ્બર 2022લોકોએ પરિવર્તનનું મન બનાવી લીધું : અર્જુન મોઢવાડિયા

   પોરબંદરમાં કૉંગ્રેસના ઉમેદવાર અર્જુન મોઢવાડિયાએ મતદાન કર્યા બાદ કહ્યું હતું કે લોકોએ પરિવર્તનનું મન બનાવી લીધું છે.

   તેમણે જણાવ્યું હતું, "લોકોએ ભાજપને હટાવવાનું મન બનાવી લીધું છે. ભાજપ આ જાણે છે અને એટલે જ એણે મુખ્ય મંત્રી સહિત આખી કૅબિનેટ બદલી નાખી હતી. તેમના વિરુદ્ધ ભ્રષ્ટાચારના આરોપ હતા. નવી સરકાર પણ એવી રીતે જ ચાલી રહી છે. એટલે લોકો પરિવર્તન ઇચ્છે છે."

3. 1 ડિસેમ્બર 2022ગોંડલમાં મતદાન

   ગુરૂવારે સવારથી જ ગોંડલ શહેરના ચૂંટણીમથકો ઉપર મતદારોની લાઇન જોવા મળી રહી છે. અહીં ભાજપનાં ગીતાબા જયરાજસિંહ જાડેજાની સામે કૉંગ્રેસે યતીન દેસાઈને મેદાનમાં ઉતાર્યા છે. જ્યારે આમ આદમી પાર્ટીએ નિમિષાબહેન ખૂંટને ટિકિટ આપી છે.

   ચૂંટણીપંચે અહીં સુરક્ષાના વિશેષ બંદોબસ્ત ગોઠવ્યા છે. જિલ્લાના આઈપીએસ દરજ્જાના અધિકારીઓનને ગોંડલ મોકલવામાં આવ્યા છે. અહીં પોલીસ ઉપરાંત સ્ટેટ રિઝર્વ પોલીસ તથા કેન્દ્રીય અર્ધલશ્કરી દળોનો બંદોબસ્ત ગોઠવવામાં આવ્યો છે.

   40 જેટલા મતદાન મથકોને અતિસંવેદનશીલ તથા 70 જેટલા મતદાન મથકોને સંવેદનશીલ જાહેર કરવામાં આવ્યા છે.

   ગોંડલની બેઠક સંવેદનશીલ કેમ ?

   ભાજપના જ અન્ય એક નેતા અનિરૂદ્ધસિંહ જાડેજા 'રીબડા જૂથ' તરીકે ઓળખાય છે, તેમણે ગોંડલમાં કૉંગ્રેસને તથા ગુજરાતભરમાં ભાજપને સમર્થન આપવાની જાહેરાત કરી છે. જેના કારણે ભાજપના સત્તાવાર ઉમેદવારની મુશ્કેલીઓ વધી શકે છે. અનિરૂદ્ધસિંહ રીબડા તથા આસપાસનાં ગામો ઉપર પ્રભુત્વ ધરાવે છે.

   એક સાર્વજનિક સભા દરમિયાન જયરાજસિંહે કરેલા નિવેદનો બાદ તેમણે આ નિર્ણય લીધો હતો. પાર્ટીએ હજુ સુધી તેમની સામે શિસ્તભંગના પગલાની જાહેરાત નથી કરી. જયરાજસિંહ તથા અનિરૂદ્ધસિંહે તેમના પુત્રોને ટિકિટ મળે તે માટે પ્રયાસ કર્યા હતા.

   બીજી બાજુ, જયરાજસિંહ જાડેજા સાર્વજનિક રીતે રીબડાની આસપાસનાં ચૂંટણીમથકો ઉપર મતદાનના દિવસે રાઉન્ડ મારવાની વાત કહી છે અને કોઈ પણ છમકલાને નજરઅંદાજ ના કરવાની વાત કરી છે.

   અહીં વાંચો : ગોંડલ : લોહિયાળ રાજકીય ઇતિહાસ ધરાવતી આ બેઠક પાટીદાર અને ક્ષત્રિયોની 'રણભૂમિ' કઈ રીતે બની?

4. 1 ડિસેમ્બર 2022રીવાબાએ મતદાન કર્યા બાદ નયનાબા વિશે શું કહ્યું?

   જામનગર (ઉત્તર)માંથી ભાજપનાં ઉમેદવાર અને ક્રિકેટર રવીન્દ્ર જાડેજાનાં પત્ની રીવાબાએ રાજકોટમાં મતદાન કર્યું હતું.

   મતદાન કર્યા બાદ તેમણે પત્રકારો સાથેની વાતચીતમાં કહ્યું હતું, "કોઈ સમસ્યા નથી. એક જ પરિવારમાં જુદી વિચારધારાના લોકો હોય. મને જામનગરના લોકો પર ભરોસો છે કે ભાજપ મોટા માર્જિનથી જીતશે અને અમે વિકાસ પર ધ્યાન કેન્દ્રિત કરીશું."

   નોંધનીય છે કે રીવાબા જાડેજા અને તેમનાં નણંદ નયનાબા વચ્ચેનો વિવાદ હાલમાં ચર્ચામાં છે. નયનાબા તેમનાં ભાભી રીવાબા જાડેજાની સામે પ્રચારમાં ઊતર્યાં છે.

   નયનાબાએ એવો પણ આરોપ મૂક્યો છે કે રીવાબા આયાતી ઉમેદવાર છે, જામનગર ઉત્તરના મતદારો સાથે તેમનો સંબંધ કંઈ નથી.

5. 1 ડિસેમ્બર 2022કયા ઉમેદવારો પર રહેશે નજર?

   • આમ આદમી પાર્ટીના મુખ્ય મંત્રીપદના ઉમેદવાર ઈસુદાન ગઢવી - ખંભાળિયા
   • આમ આદમી પાર્ટીના પ્રદેશ અધ્યક્ષ ગોપાલ ઈટાલિયા - કતારગામ
   • ભારતીય જનતા પક્ષનાં ઉમેદવાર રીવાબા - જામનગર (ઉત્તર)
   • ભારતીય જનતા પક્ષના ઉમેદવાર પરસોત્તમ સોલંકી- ભાવનગર (ગ્રામ્ય)
   • આમ આદમી પાર્ટીના ઉમેદવાર અને પાટીદાર નેતા અલ્પેશ કથીરિયા - વરાછા, સુરત
   • દિગ્ગજ આદિવાસી નેતા છોટુ વસાવા - ઝઘડિયા

6. 1 ડિસેમ્બર 2022મંગુભાઈ અને તેમનાં પત્નીએ મતદાન કર્યું

   મધ્ય પ્રદેશના રાજ્યપાલ મંગુભાઈ પટેલ અને તેમનાં પત્નીએ નવસારીમાં મતદાન કર્યું હતું.

7. 1 ડિસેમ્બર 2022રીવાબાએ મતદાન કર્યું

   જામનગર(ઉત્તર) માં ભાજપનાં ઉમેદવાર અને ક્રિકેટર રવીન્દ્ર જાડેજાનાં પત્ની રીવાબાએ રાજકોટમાં આજે પોતાના મતદાનના અધિકારનો પ્રયોગ કર્યો હતો.

8. 1 ડિસેમ્બર 2022બ્રેકિંગ, ગુજરાતમાં પ્રથમ તબક્કાના મતદાનનો પ્રારંભ

   ગુજરાતમાં કુલ 89 મતદાનમથકો પર પ્રથમ તબક્કાના મતદાનનો પ્રારંભ થઈ ગયો છે. ભાજપ, કૉંગ્રેસ, આપના ઉમેદવારનોના ભાવીનો 2 કરોડ મતદારો આજે નિર્ણય કરશે.

9. 1 ડિસેમ્બર 2022વડા પ્રધાન મોદીનું આહ્વાન

   ગુજરાતમાં આજે વિધાનસભાની ચૂંટણી માટે પ્રથમ તબક્કાનું મતદાન યોજાઈ રહ્યું છે ત્યારે વડા પ્રધાન નરેન્દ્ર મોદીએ લોકોને મતદાન કરવા માટે આહ્વાન કર્યું હતું.

   તેમણે ટ્વિટર પર લખ્યું, "હું તમામ મતદાતાઓને, ખાસ કરીને પ્રથમ વખત મતાધિકારનો ઉપયોગ કનાર યુવાનોને, વિક્રમજનક સંખ્યામાં મતદાન કરવા માટે આહ્વાન કરું છું."

   નોંધનીય છે કેગુજરાતમાં 89 બેઠકો પર મતદાન યોજાઈ રહ્યું છે. અને ચૂંટણીપંચના આંકડા અનુસાર કુલ 2.39 કરોડ મતદાતાઓ આજે મતદાન કરી રહ્યા છે.

10. 1 ડિસેમ્બર 2022ગુજરાત ચૂંટણી : કયા રાજકીય પક્ષોને કેટલું દાન મળ્યું?

    ગુરુવારે એટલે કે 1 ડિસેમ્બર 2022ના રોજ ગુજરાત વિધાનસભાની ચૂંટણી માટે પ્રથમ તબક્કાનું મતદાન ચાલી રહ્યું છે.

    ગુજરાતમાં સત્તાપક્ષ ભાજપ, કૉંગ્રેસ અને આપ વચ્ચે આ વખત સત્તાનો ત્રિપાંખીયો જંગ જામ્યો છે.ત્યારે રાજકીય પક્ષોને મળેલ દાન અંગે પણ ચર્ચા થઈ રહી છે.

    'ઍસોસિયેશન ઑફ ડેમૉક્રેટિક રિફોર્મ્સ '(એડીઆર)ના રિપોર્ટમાં વર્ષ 2016-17થી માંડીને 2020-21 દરમિયાન રાજકીય પક્ષોની કુલ આવક અને કુલ દાનનું વિશ્લેષણ કરાયું છે.

    આ સમયગાળા દરમિયાન રિપોર્ટ મુજબ ભાજપને 163.54 કરોડ કૉર્પોરેટ દાન મળ્યું હતું. જ્યારે ભારતીય રાષ્ટ્રીય કૉંગ્રેસને કુલ 10.46 કરોડ રૂપિયાનું દાન મળ્યું હતું.

    નોંધનીય છે કે આ સમયગાળા દરમિયાન ગુજરાતમાંથી 174.06 કરોડ રૂપિયાનું કૉર્પોરેટ દાન કરાયું હતું.

    પાંચ વર્ષના આ ગાળાના દાનના વિશ્લેષણ અનુસારગુજરાતમાંથી ટૉરેન્ટ પાવર લિમિટેડ, ટૉરેન્ટ ફાર્માસ્યુટિકલ્સ લિમિટેડ, ટોરેન્ટ ફાર્મા લિમિટેડ,કૅડિલા હેલ્થકેર લિમિટેડ,એસ્સાર બલ્ક ટર્મિનલ પૅરાડિપ લિમિટેટ અને ઍક્ટ ઇન્ફ્રાપૉર્ટ લિમિટેડે પ્રુડન્ટ ઇલેક્ટોરલ ટ્રસ્ટ થકી રાજકીય પક્ષોને દાન આપ્યું હતું.

    જેમાં ટૉરેન્ટ પાવર લિમિટેડ અને ટૉરેન્ટ ફાર્માસ્યુટિકલ્સ લિમિટેડે અનુક્રમે 30.5 અને 20.5 કરોડ રૂપિયાનું દાન કર્યું હતું.

11. 1 ડિસેમ્બર 2022જાંબુરમાં ટ્રાઇબલ બૂથ તૈયાર કરાયું

    ગુજરાતના 'મિની આફ્રિકા' ગણાતા જાંબુરમાં આ વખતે પ્રથમ વખત વિશેષ ટ્રાઇબલ બૂથ તૈયાર કરાયું છે.

    લોકશાહીના પર્વમાં પ્રથમ વખત વિશેષ બૂથ મળતાં ગામના લોકોએ ખુશી વ્યક્ત કરી હતી.

12. 1 ડિસેમ્બર 2022ગુજરાત ચૂંટણી 2022 પ્રથમ તબક્કો: મતવિસ્તારોની સંપૂર્ણ યાદી

    • અબાડસા (કચ્છ)
    • માંડવી (કચ્છ)
    • ભુજ (કચ્છ)
    • અંજાર (કચ્છ)
    • ગાંધીધામ (એસસી) (કચ્છ)
    • રાપર (કચ્છ)
    • દસાડા (એસસી) (કચ્છ)
    • લીંબડી (સુરેન્દ્રનગર)
    • વઢવાણ (સુરેન્દ્રનગર)
    • ચોટીલા (સુરેન્દ્રનગર)
    • ધ્રાંગધ્રા (સુરેન્દ્રનગર)
    • મોરબી (મોરબી)
    • ટંકારા (મોરબી)
    • વાંકાનેર (મોરબી)
    • રાજકોટ પૂર્વ (રાજકોટ)
    • રાજકોટ પશ્ચિમ (રાજકોટ)
    • રાજકોટ દક્ષિણ (રાજકોટ)
    • રાજકોટ ગ્રામ્ય (એસસી) (રાજકોટ)
    • જસદણ (રાજકોટ)
    • ગોંડલ (રાજકોટ)
    • જેતપુર (રાજકોટ)
    • ધોરાજી (રાજકોટ)
    • કાલાવડ (એસસી) (રાજકોટ)
    • જામનગર ગ્રામ્ય (જામનગર)
    • જામનગર ઉત્તર (જામનગર)
    • જામનગર દક્ષિણ (જામનગર)
    • જામજોધપુર (જામનગર)
    • ખંભાળિયા (દેવભૂમિ દ્વારકા)
    • દ્વારકા (દેવભૂમિ દ્વારકા)
    • પોરબંદર (પોરબંદર)
    • કુતિયાણા (પોરબંદર)
    • માણાવદર (જુનાગઢ)
    • જુનાગઢ (જુનાગઢ)
    • વિસાવદર (જુનાગઢ)
    • કેશોદ (જુનાગઢ)
    • માંગરોલ (જુનાગઢ)
    • સોમનાથ (ગીર સોમનાથ)
    • તલાલા (ગીર સોમનાથ
    • કોડિનાર (એસસી) (ગીર સોમનાથ)
    • ઉના (ગીર સોમનાથ)
    • ધારી (અમરેલી)
    • અમરેલી (અમરેલી)
    • લાઠી (અમરેલી)
    • સાવરકુંડલા (અમરેલી)
    • રાજુલા (અમરેલી)
    • મહુવા (ભાવનગર)
    • તળાજા (ભાવનગર)
    • ગારીયાધાર (ભાવનગર)
    • પાલિતાણા (ભાવનગર)
    • ભાવનગર ગ્રામ્ય (ભાવનગર)
    • ભાવનગર પૂર્વ (ભાવનગર)
    • ભાવનગર પશ્ચિમ (ભાવનગર)
    • ગઢડા (એસસી) (બોટાદ)
    • બોટાદ (બોટાદ)
    • નાંદોદ (એસટી) (નર્મદા)
    • ડેડિયાપાડા (એસટી) (નર્મદા)
    • જંબુસર (ભરૂચ)
    • વાગરા (ભરૂચ)
    • ઝઘડિયા (એસટી) (ભરૂચ)
    • ભરૂચ (ભરૂચ)
    • અંકલેશ્વર (ભરૂચ)
    • ઓલપાડ (સુરત)
    • માંગરોલ (એસટી) (સુરત)
    • માંડવી (એસટી) (સુરત)
    • કામરેજ (સુરત)
    • સુરત પૂર્વ (સુરત)
    • સુરત ઉત્તર (સુરત)
    • વરાછા રોડ (સુરત)
    • કરંજ (સુરત)
    • લિંબાયત (સુરત)
    • ઉધના (સુરત)
    • મજૂરા (સુરત)
    • કતારગામ (સુરત)
    • સુરત પશ્ચિમ (સુરત)
    • ચૌયાસી (સુરત)
    • બારડોલી (એસસી) (સુરત)
    • મહુવા (એસટી) (સુરત)
    • વ્યારા (એસટી) (સુરત)
    • નિઝર (એસટી) (તાપી)
    • ડાંગ (એસટી) (ડાંગ)
    • જલાલપોર (નવસારી)
    • નવસારી (નવસારી)
    • ગણદેવી (એસટી) (નવસારી)
    • વાંસદા (એસટી) (નવસારી)
    • ધરમપુર (એસટી) (વલસાડ)
    • વલસાડ (વલસાડ)
    • પારડી (વલસાડ)
    • કપરાડા (એસટી) (વલસાડ)
    • ઉમરગામ (એસટી) (વલસાડ)

    ચૂંટણીપંચે ગુજરાતમાં મતદાતાઓની અંતિમ યાદી બહાર પાડી હતી, તેમાં રાજ્યમાં કુલ ચાર કરોડ 90 લાખ 89 હજાર 765 મતદારો છે.

    પુરુષ મતદાતાઓની સંખ્યા બે કરોડ 53 લાખ 36 હજાર 610 છે જ્યારે કે સ્ત્રી મતદાતાની સંખ્યા બે કરોડ 37 લાખ 51 હજાર 738 છે.

    નવા મતદાતાઓની સંખ્યા 11.62 લાખ વધી છે. થર્ડ જેન્ડર મતદાતાની સંખ્યા પણ વધીને 1,417 થઈ છે. નોંધનીય છે કે માન્ય મતદારોમાં ચાર લાખથી વધુ વિકલાંગ મતદાતા છે.

    ચૂંટણીપંચએ 25 હજાર 430 મતદાનમથક તૈયાર કર્યાં છે, જેમાથી 16 હજાર 416 ગ્રામ્ય વિસ્તારમાં અને 9,014 શહેરોમાં છે.

    પ્રથમ તબક્કાની ચૂંટણી માટે કુલ 34,324 બૅલેટ યુનિટ, 34,324 કંટ્રોલ યુનિટ અને 38,749 વીવીપૅટ (મતદાર-વેરિફાઈ પેપર ઓડિટ ટ્રેલ)નો ઉપયોગ કરવામાં આવશે.

    મતદાન ગુરુવારે સવારે 8 વાગ્યાથી શરૂ થઈને સાંજે 5.30 વાગ્યા સુધી ચાલશે. ગુજરાત વિધાનસભા ચૂંટણીનું પરિણામ 8 ડિસેમ્બરે આવશે.

13. 25 નવેમ્બર 2022પ્રથમ તબક્કામાં ક્યાં ક્યાં મતદાન યોજાશે?

    પ્રથમ તબક્કામાં 20 જેટલા જિલ્લાઓમાં મતદાન યોજાશે.

14. 25 નવેમ્બર 2022ગુજરાત વિધાનસભા ચૂંટણી માટે પ્રથમ તબક્કાનું મતદાન

    ગુજરાત વિધાનસભાની 182 બેઠકો માટે એક ડિસેમ્બરના પ્રથમ તબક્કાનું મતદાન યોજાશે.

    પ્રથમ તબક્કામાં 89 વિધાનસભા બેઠકો માટે થનારી ચૂંટણીમાં 788 ઉમેદવારોમાંથી મતદારો પોતાના પ્રતિનિધિની પસંદગી કરશે.

    બીજા તબક્કાનું મતદાન પાંચ ડિસેમ્બરના યોજાશે.

    વિધાનસભા ચૂંટણી માટે મતગણતરી આઠમી ડિસેમ્બરે થશે.

15. 25 નવેમ્બર 2022

    ચૂંટણીપંચે ગુજરાતમાં મતદાતાઓની અંતિમ યાદી બહાર પાડી હતી, તેમાં રાજ્યમાં કુલ ચાર કરોડ 90 લાખ 89 હજાર 765 મતદારો છે.

    પુરુષ મતદાતાઓની સંખ્યા બે કરોડ 53 લાખ 36 હજાર 610 છે જ્યારે કે સ્ત્રી મતદાતાની સંખ્યા બે કરોડ 37 લાખ 51 હજાર 738 છે.

    નવા મતદાતાઓની સંખ્યા 11.62 લાખ વધી છે. થર્ડ જેન્ડર મતદાતાની સંખ્યા પણ વધીને 1,417 થઈ છે. નોંધનીય છે કે માન્ય મતદારોમાં ચાર લાખથી વધુ વિકલાંગ મતદાતા છે.

    સૌથી વધુ (59.9 લાખ) મતદારો અમદાવાદમાં છે, જ્યારે સૌથી ઓછા (1.93 લાખ) મતદારો ડાંગમાં છે.

16. 25 નવેમ્બર 2022

    નમસ્કાર! બીબીસી ન્યૂઝ ગુજરાતીના લાઇવ પેજમાં આપનું સ્વાગત છે.

    અહીં તમે ગુજરાત વિધાનસભા ચૂંટણીના પ્રથમ તબક્કાના મતદાન વિશે લાઇવ અપડેટ મેળવી શકશો.

    દિવસ દરમિયાનની તમામ અપડેટ્સ માટે જોડાયેલા રહો બીબીસી ગુજરાતી સાથે.