જ્યોર્જ ફ્લોયડ મોત: પૂર્વ પોલીસ અધિકારી ડેરેક શોવિને આરોપ સ્વીકાર્યો
અમેરિકામાં ભૂતપૂર્વ શ્વેત પોલીસ અધિકારી ડેરેક શોવિને આફ્રિકન-અમેરિકન જ્યોર્જ ફ્લોયડના નાગરિક અધિકારોના ઉલ્લંઘનના આરોપોને સ્વીકાર્યા છે.
ડેરેક શોવિન પર ગયા વર્ષે મે મહિનામાં મીનિયાપોલિસમાં એક નિઃશસ્ત્ર અશ્વેત વ્યક્તિ, જ્યોર્જ ફ્લોયડની ગરદન પર નવ મિનિટ સુધી ઘૂંટણિયે રહેવાનો આરોપ હતો. થોડીવાર પછી તેનું મૃત્યુ થયું હતું.
ઘટનાનો વીડિયો આખી દુનિયામાં વાયરલ થયો હતો. આ વીડિયો સામે આવ્યા બાદ અમેરિકા સહિત સમગ્ર વિશ્વમાં જાતિવાદ અને પોલીસના ખરાબ વર્તન સામે ઉગ્ર વિરોધપ્રદર્શનો થયા હતા.
યુએસ જ્યુરીએ શોવિન પર ત્રણ આરોપો લગાવ્યા હતા. આ કેસ માનવવધ, સેકન્ડ ડીગ્રી મર્ડર અને થર્ડ ડીગ્રી મર્ડરનો છે.
બુધવારે, ડેરેક શોવિને યુએસ પ્રોસિક્યુટર્સ સાથે સમાધાન તરીકે તેની અગાઉની અરજીને રદ કરીને આરોપોનો સ્વીકાર કર્યો હતો.
45 વર્ષીય ડેરેક શોવિનને 46 વર્ષીય જ્યોર્જ ફ્લોયડની હત્યામાં દોષિત ઠેરવવામાં આવ્યા હતા અને તેમને 22 વર્ષથી વધુની જેલની સજા ફટકારવામાં આવી હતી.