સ્થાનિકસ્વરાજની ચૂંટણીપરિણામ : ભાજપનો ભવ્ય વિજય, કૉંગ્રેસની હાર બાદ દિગ્ગજોનાં રાજીનામાં

લાઇવ કવરેજ

1. 2 માર્ચ 2021હાર્દિક પટેલે કૉંગ્રેસ સામે નારાજગી અને આપમાં જોડાવાના સવાલ પર શું જવાબ આપ્યો?

   ગુજરાતમાં યોજાયેલી મહાનગરપાલિકાની ચૂંટણીઓમાં કૉંગ્રેસનું ખરાબ પ્રદર્શન રહ્યું છે. સુરતમાં કૉંગ્રેસનો એક પણ ઉમેદવાર ચૂંટાઈ શક્યો નથી. જેની સામે આમ આદમી પાર્ટીના 27 ઉમેદવારો ચૂંટાયા છે. તો જામનગર, રાજકોટ અને અમદવાદામાં પણ કૉંગ્રેસનું ખરાબ પ્રદર્શન રહ્યું છે. આ સાથે જ એવા અહેવાલો પણ વહેતા થયા હતા કે કૉંગ્રેસના કાર્યકારી અધ્યક્ષ હાર્દિક પટેલ ખુદ જ તેમના પક્ષથી ખુશ નથી. તો કેટલાક અહેવાલોમાં એવું પણ કહેવામાં આવ્યું હતું કે હાર્દિક પટેલ આમ આદમી પાર્ટીમાં જતા રહેશે.આ બાબતે હાર્દિક પટેલે શું કહ્યું?

2. 2 માર્ચ 2021જૂનાગઢ અને મહેસાણા જિલ્લામાં મતગણતરી શરૂ

   જૂનાગઢ અને મહેસાણા જિલ્લાની વિવિધ બેઠકો પર મતગણતરી શરૂ થઈ ચૂકી છે.

   જૂનાગઢ જિલ્લા પંચાયતની 29 બેઠક, 9 તાલુકા પંચાયતની 158 બેઠક પર મતગણતરી શરૂ થઈ છે.

   જૂનાગઢની ઐતિહાસિક બહાઉદ્દીન કોલેજમાં ચુસ્ત પોલીસ બંદોબસ્ત ગોઠવી દેવામાં આવ્યો છે.

   મહેસાણા જિલ્લા,તાલુકા પંચાયત અને 4 પાલિકાની મતગણતરી 14 સ્થળો પર હાથ ધરાશે

   4 પાલિકા,10 તા.પં અને જિલ્લા પંચાયતની 41 બેઠકોના ઉમેદવારોનું ભાવિ આજે નક્કી થશે

   મતદાન મથક પર તમામ કર્મચારીઓના હેલ્થ ચેકઅપ કરવામાં આવ્યું હતું.

3. 2 માર્ચ 2021બ્રેકિંગ, સવારે 9.15 કલાકની સ્થિતિ પ્રમાણે

   નગરપાલિકાની ચૂંટણીમાં ભાજપના 92, કૉંગ્રેસના બે તથા અપક્ષના એક ઉમેદવાર બિનહરીફ ચૂંટાયા છે.

   જિલ્લા પંચાયતની ચૂંટણીમાં ભાજપે 25 બેઠક નિર્વિરોધ જીતી છે.

   તાલુકા પંચાયતમાં ભાજપે 111, કૉંગ્રેસે પાંચ તથા બહુજન સમાજ પાર્ટીએ એક બેઠક બિનહરીફ જીતી છે.

4. 2 માર્ચ 20212015માં કૉંગ્રેસે તાલુકા અને જિલ્લા પંચાયતમાં ભાજપથી વધારે સીટો જીતી હતી

   2015માં યોજાયેલી સ્થાનિક સ્વરાજ્યની ચૂંટણીમાં કૉંગ્રેસ પાર્ટીએ જિલ્લા અને તાલુકા પંચાયતમાં સૌથી વધારે સીટ પર કબજો મેળવ્યો હતો.

   ભાજપે નગરપાલિકાઓમાં સારું પ્રદર્શન કર્યું હતું.

   2015માં યોજાયેલી જિલ્લા પંચાયતની વાત કરીએ તો જિલ્લા પંચાયતની 595 સીટ પર કૉંગ્રેસે જીત મેળવી હતી, જ્યારે ભાજપે 368 સીટ પર જીત મેળવી હતી.

   તાલુકા પંચાયતની 2019 સીટ ભાજપ જીત્યું હતું, જ્યારે 2555 સીટ કૉંગ્રેસ જીત્યું હતું. અપક્ષ ઉમેદવારોએ 141 સીટ પર જીત મેળવી હતી.

   નગરપાલિકાની ચૂંટણીમાં ભાજપે 1197 સીટ પર અને કૉંગ્રેસે 673 સીટ પર જીત મેળવી હતી. જ્યારે 205 અપક્ષ અને 4 બીએસપીના ઉમેદવારે પણ જીત મળેવી હતી.

5. 2 માર્ચ 2021જામનગર જિલ્લા અને તાલુકા પંચાયતની ચૂંટણીઓની મતગણતરીની શરૂ

   જામનગરમાં જિલ્લા પંચાયતની 24 બેઠકો અને તાલુકા પંચાયતની 112 બેઠકો પર મતગણતરી શરૂ કરવામાં આવી છે.

   સવારે 9 વાગ્યાથી જામનગર શહેરના સાત રસ્તા પાસે આવેલી શ્રી હાલારી વિશા ઓશવાળ વિદ્યાલયમાં મત ગણતરી શરૂ થઈ છે.

   દરેક મતગણતરી હાલ કુલ 10 મતગણતરી ટેબલની વ્યવસ્થા કરવામાં આવેલ છે.

   મતગણતરી માટે હાલ ઇન્ચાર્જ, મતગણતરીદાર, મદદનીશ મતગણતરીદાર તેમજ અન્ય સહાયક કર્મચારીઓ સહિત કુલ 1080 જેટલાં કર્મચારીઓને ફરજ સોંપવામાં આવેલ છે.

6. 2 માર્ચ 2021ભાવનગરની 3 નગરપાલિકા, 10 તાલુકા અને એક જિલ્લા પંચાયત માટે મતગણતરી થશે

   ભાવનગર જિલ્લા પંચાયતની 40, 10 તાલુકા પંચાયતની 210 અને 3 નગરપાલિકાના 96 ઉમેદવારોના ભાવિના ફેંસલો આજે થશે.

   2015માં યોજાયેલી ચૂંટણીમાં ભાવનગર જિલ્લા પંચાયતની 40 બેઠકમાંથી ભાજપને 17 અને કોંગ્રેસને 23 બેઠક મળી હતી

   ભાવનગર જિલ્લા પંચાયતમાં 40 બેઠકો માટે 60.56 ટકા, 10 તાલુકા પંચાયતની 210 બેઠકો માટે 60.89 ટકા અને 3 નગરપાલિકાની ચૂંટણીમાં 60.87 ટકા મતદાન થયું હતું. જિલ્લા પંચાયતની 40 બેઠકો માટે 111 ઉમેદવારો, તાલુકા પંચાયતની 210 બેઠકો માટે 563 તેમજ નગરપાલિકાની 96 બેઠકો માટે 236 ઉમેદવારો મળી કુલ 910 ઉમેદવારો ચૂંટણી જંગમાં છે. તેઓના ભાવિ આજે ખુલશે.

7. 2 માર્ચ 2021નગરપાલિકાની 92 સીટ પર ભાજપ જીત્યું છે બિનહરીફ, કૉંગ્રેસ બે પર

   નગરપાલિકાની ચૂંટણી પૂર્વે જ ગુજરાતની 92 સીટ પર ભાજપ બિનહરીફ વિજેતા થયું છે.

   કૉંગ્રેસ પાર્ટીએ એક સીટ મેળવી છે, જ્યારે એક સીટ પર અપક્ષ ઉમેદવાર બિનહરીફ જિત્યા છે.

   મહેસાણાની કડી નગરપાલિકાની 26 સીટ પર ભાજપ બિનહરીફ વિજેતા બન્યું હતું.

   ગીર સોમનાથમાં પણ 20 સીટ પર ભાજપ, જ્યારે બે સીટ કૉંગ્રેસ વિજેતા બન્યું હતું.

8. 2 માર્ચ 2021ભાજપ-કૉંગ્રેસની લડાઈમાં કેજરીવાલ અને ઔવેસીનું આગમન, આજે પરિણામ

   ગુજરાતમાં છ મહાનગરપાલિકાની ચૂંટણીઓમાં ભાજપનો વિજય થયો, કૉંગ્રેસનો રકાસ થયો અને સુરતમાં આમ આદમી પાર્ટીનો ઉદય થયો હતો. ઉપરાંત અમદાવાદમાં અસદ્દુદીન ઔવેસીની પાર્ટીએ પણ એન્ટ્રી કરી લીધી. હવે આજે ખબર પડશે કે નગરપાલિકાઓ અને જિલ્લા-તાલુકા પંચાયતોમાં કોણ બાજી મારે છે.

   રવિવારે રાજ્યની 81 નગરપાલિકા, 31 જિલ્લા પંચાયત અને 231 તાલુકા પંચાયત ઉપર મતદાન થયું હતું.

   નવેમ્બર-2015માં જિલ્લા-તાલુકા પંચાયતની ચૂંટણીઓમાં કૉંગ્રેસનો દબદબો રહ્યો હતો અને ભાજપ બીજા ક્રમે ધકેલાઈ ગયો હતો. જોકે, આ વખતે ઔવેસીની પાર્ટી ઉપરાંત આમ આદમી પાર્ટી પણ મેદાનમાં છે અને સુરતમાં આમ આદમી પાર્ટી જે રીતે વિપક્ષની ભૂમિકામાં આવી છે તેને લીધે પરિણામોમાં ફેરફાર આવી શકે છે. વળી, મુસ્લિમોની બહુમતી ધરાવતા વિસ્તારોમાં ઔવેસીની પાર્ટી પણ ગણિત ફેરવી શકે છે.

   આ ચૂંટણીઓ અગાઉ નવેમ્બર 2020માં યોજાનાર હતી, પણ કોરોના વાઇરસના સંક્રમણના પગલે ચૂંટણીઓને ત્રણ મહિના માટે પાછળ ઠેલવવામાં આવી હતી. મહામારીને સ્થિતિને ધ્યાનમાં રાખીને ચૂંટણીઓમાં મતદાન અને મતગણતરી અંગે ખાસ વ્યવસ્થા કરવામાં આવી હતી.

9. 2 માર્ચ 2021

   નમસ્કાર. બીબીસી ગુજરાતીના આ લાઇવ પેજ પર આપનું સ્વાગત છે. અહીં અમે આપને ગુજરાતની સ્થાનિકસ્વરાજની ચૂંટણીના પરિણામો અંગે તમામ અપડેટ આપીશું. આ ઉપરાંત દેશ-દુનિયાની મહત્ત્વની ખબરો પણ અહીં રજૂ કરીશું. જોડાયેલા રહો. બીબીસી ગુજરાતી સાથે.