વ્હાઇટ હાઉસમાં કોરોના ટાસ્ક ફોર્સની પત્રકાર પરિષદમાં અમેરિકાના રાષ્ટ્રપતિ ડોનાલ્ડ ટ્રમ્પે કહ્યું કે અમેરિકામાં છેલ્લા અમુક દિવસોથી દરરોજ આવનારા નવા સંક્રમણના કેસની સંખ્યા સ્થિર છે. ટ્રમ્પે કહ્યું, "ન્યૂ યૉર્ક, ન્યૂ જર્સી, મિશિગન અને લુઇસિયાના જેવાં હૉટસ્પૉટમાં હૉસ્પિટલમાં લોકોને દાખલ કરવાની પ્રક્રિયા ધીમી થઈ છે. એનું કારણ છે કે લોકો અમેરિકન ગાઇડલાઇન્સનું પાલન કરી રહ્યા છે. તમે ચાર્ટ જોઈ શકો છો. પહેલાં એક લાખથી વધારે મૃત્યુનું અનુમાન હતું. હવે આ સંખ્યા ઓછી રહેશે. આના ઠોસ પ્રમાણ છે અને અમારી આક્રામક નીતિ કામ કરી રહી છે."
પત્રકાર પરિષદમાં ટ્રમ્પ અમેરિકન મીડિયામાં કોરોના વાઇરસના કવરેજને લઈને પત્રકારોથી નારાજ જણાયા હતા.
ટ્રમ્પે આ દરમિયાન એક વીડિયો બતાવીને કહ્યું કે આ ફેક ન્યૂઝ છે.
ટ્રમ્પે કહ્યું કે ટીકાને તેઓ મહત્ત્વ નથી આપતા, પરંતુ ટીકા કરનાર લોકો ખોટા હોય તો જાણ કરવી જરૂરી છે. જ્યારે સીબીએસનાં રિપોર્ટ પાઉલા રીડે ટ્રમ્પને પૂછ્યું કે ફેબ્રુઆરી મહિનામાં ટ્રમ્પ પ્રશાસને શું કર્યું તો ટ્રમ્પ આ પ્રશ્નને ટાળતા રહ્યા.
પછી તેમણે કહ્યું, ''તમને ખબર છે તમે ખોટા છો? શું તમને ખબર છે તમારૂં કવરેજ બનાવટી છે?''
આ પત્રકાર પરિષદમાં અમેરિકામાં ટાસ્ક ફોર્સના વડા ડૉ. ફાઉચીએ પણ ટ્રમ્પના દાવાનું સમર્થન કર્યું કે સંક્રમણ ફેલાવવાનું ધીમું થયું છે, જ્યારે છેલ્લા અઠવાડિયામાં પરિસ્થિતિ બહુ ખરાબ હતી. રવિવારે એક ઇન્ટર્વ્યૂમાં ડૉ. ફાઉચીએ કહ્યું હતું કે જો અમેરિકા પહેલાંથી સતર્ક હોત, તો ઓછા લોકોનો જીવ ગયો હોત.
ત્યાર પછી અટકળો હતી કે ટ્રમ્પ તેમને કોરોના સંક્રમણ અંગેની ટાસ્ટ ફોર્સના પ્રમુખપદેથી હઠાવી દેશે. ડૉ. ફાઉચીએ કહ્યું કે તેમણે ઇન્ટર્વ્યૂમાં પૂછાયેલા પ્રશ્નોના જવાબમાં શબ્દોનું ચયન બરાબર નહોતું કર્યું.
રાષ્ટ્રપતિ ટ્રમ્પે કહ્યું કે કોરોના વાઇરસની મહામારીને રોકવા માટે બરાબર પગલાં લઈ રહ્યા છે.
તેમણે કહ્યું કે પહેલાં પાબંદી લગાવવામાં આવી, ત્યારે તેની ટીકા કરવામાં આવી. કોરોના વાઇરસથી સંક્રમિત લોકોની સારવારમાં સાધનોની કમી માટે તેમણે રાજ્ય સરકારોના ગવર્નરોને જવાબદાર ઠેરવ્યા.