ગેમ ઑફ થ્રોન્સ બાદ હવે બનશે તેનું પ્રિક્વલ, 'House Of Dragon' આપવામાં આવ્યું નામ

સૌથી ચર્ચિત અને લોકપ્રિય અંગ્રેજી ટીવી સિરીઝમાંથી એક ગેમ ઑફ થ્રોન્સ હવે નહીં બને એ સમાચારે પ્રશંસકોને થોડા નિરાશ કરી દીધા હતા પરંતુ એ પછી એવી જાહેરાત કરવામાં આવી છે કે આ ટીવી સિરીઝનું પ્રિક્વલ જલદી 'હાઉસ ઑફ ડ્રેગન' નામે લૉન્ચ કરવામાં આવશે.

HBO ચેનલે આ સિરીઝને મંજૂરી આપી દીધી છે. ગેમ ઑફ થ્રોન્સની આઠમી સિઝન આ વર્ષે જ પૂર્ણ થઈ હતી. હવે જે પ્રિક્વલ બનશે તેમાં 300 વર્ષ પહેલાનો સમય બતાવવામાં આવશે.

ગેમ ઑફ થ્રોન્સ HBOની સૌથી પ્રખ્યાત સિરીઝ છે. તેને ઘણા એમ્મી ઍવૉર્ડ મળ્યા છે અને આ સિરીઝથી જ HBOને લાખો દર્શકો પણ મળ્યા છે.

HBO પ્રોગ્રામિંગના પ્રૅસિડેન્ટ કેસિ બ્લૉય્ઝએ લોસ એન્જલસમાં એક લૉન્ચ ઇવેન્ટ દરમિયાન જણાવ્યું, "મને એ જણાવતા ખૂબ આનંદ થઈ રહ્યો છે કે અમે HBO માટે હાઉસ ઑફ ધ ડ્રેગનની નવી સિરીઝ લાવવાના છીએ."

એક ટ્વીટમાં માહિતી આપવામાં આવી છે કે હાઉસ ઑફ ડ્રેગનને ગેમ ઑફ થ્રોન્સના લેખક જ્યોર્જ આર. આર. માર્ટિન, રેયાન કોન્ડલ અને મિગ્વેલ સ્પોચનિક કૉ-પ્રોડ્યુસ કરશે.

આ પહેલાં ગેમ ઑફ થ્રોન્સના પાઇલટ એપિસોડનું ઑસ્કર ઍવૉર્ડનાં વિજેતા નાઓમી વૉટ્સે શૂટિંગ પણ કર્યું હતું.

પરંતુ પછી એવું કહેવામાં આવ્યું કે ઍક્ઝેક્યુટીવ પ્રોડ્યુસર જેન ગોલ્ડમૅને સિરીઝની કાસ્ટને ઈ-મેઇલ મોકલ્યો હતો જેમાં કહેવામાં આવ્યું હતું કે HBOએ સિરીઝ બનાવવાનું બંધ રાખ્યું છે.

સિરીઝ રદ કરવા પાછળનું કોઈ કારણ જણાવવામાં આવ્યું ન હતું અને HBOએ પણ આ અંગે કોઈ નિવેદન આપ્યું નથી.

એવી માહિતી છે કે એ પ્રિક્વલમાં ઑરિજિનલ સિરીઝથી પાંચ હજાર વર્ષ જૂનો સમય દર્શાવવાનો હતો.

તમે અમને ફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો