ગુજરાતમાં ભારે વરસાદની આગાહી, બે સિસ્ટમોની અસરથી કયા જિલ્લાઓમાં પડશે અતિભારે વરસાદ?

બંગાળની ખાડી પર બનેલું લૉ-પ્રેશર તથા અરબ સાગરમાં સર્જાયેલું સાયક્લોનિક સર્ક્યુલેશન આગળ વધતાં ગુજરાત સહિત અનેક રાજ્યોના વાતાવરણમાં પલટો આવ્યો છે અને ભારે વરસાદ વરસી રહ્યો છે.

ગુજરાતમાં આ બંને સિસ્ટમની અસરથી ગઈકાલે 16મી ઑગસ્ટે સવારથી જ અનેક વિસ્તારોમાં ભારે વરસાદ શરૂ થઈ ગયો હતો.

ખાસ કરીને સૌરાષ્ટ્ર, દક્ષિણ ગુજરાત અને મધ્ય ગુજરાતના કેટલાક વિસ્તારોમાં સારો વરસાદ થયો છે.

એ સિવાય પણ અનેક વિસ્તારોમાં છૂટોછવાયો વરસાદ વરસી રહ્યો છે. વરસાદી માહોલને કારણે સૌરાષ્ટ્રમાં તહેવારો દરમિયાન યોજાતા લોકમેળાઓના આયોજનને પણ અસર પહોંચી છે. કેટલાક વિસ્તારોમાં ભારે વરસાદથી નુકસાન પણ પહોંચ્યું છે.

16મી ઑગસ્ટે સવારથી જ અમદાવાદમાં ભારે વરસાદ શરૂ થઈ ગયો હતો. શહેરના અનેક વિસ્તારોમાં પાણી ભરાઈ જતાં અંડરપાસ પણ બંધ કરવા પડ્યા હતા.

હવામાન વિભાગે કરેલી આગાહી પ્રમાણે ભારે વરસાદ આજે પણ યથાવત્ રહેશે તેવું મનાઈ રહ્યું છે.

ઉત્તર ગુજરાતના બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી તથા મધ્ય ગુજરાતના ખેડા, આણંદ, પંચમહાલ સહિતના મોટાભાગના વિસ્તારોમાં ગાજવીજ સાથે હળવાથી મધ્યમ વરસાદની આગાહી કરવામાં આવી છે.

આ સિવાય દક્ષિણ ગુજરાતના વડોદરા, છોટા ઉદેપુર, નર્મદા, ભરૂચ, સુરત સહિતના મોટાભાગના વિસ્તારો તથા કેન્દ્રશાસિત પ્રદેશ દમણ અને દાદરાનગર હવેલીમાં પણ ગાજવીજ સાથે મધ્યમ વરસાદ પડી શકે છે.

સૌરાષ્ટ્રના મોટાભાગના જિલ્લાઓમાં પણ આ જ પ્રકારે ગાજવીજ સાથે હળવાથી મધ્યમ વરસાદનું અનુમાન છે.

આજે 17મી ઑગસ્ટે નવસારી, વલસાડ તથા દમણ અને દાદરા નગર હવેલીમાં છૂટાછવાયાં સ્થળોએ અતિભારે વરસાદની આગાહી છે.

મહારાષ્ટ્રના મુંબઈ સહિતના અનેક વિસ્તારોમાં પણ આજે ભારે વરસાદ વરસી શકે છે. 24 ઑગસ્ટ સુધી રાજ્યમાં વરસાદી માહોલ યથાવત રહેશે તેવી આગાહી છે.

બીબીસી માટે કલેક્ટિવ ન્યૂઝરુમનું પ્રકાશન