Mu mafoto: Ikipe y'Afurika y'Epfo ya Rugby yegukanye igikombe cy'isi

Insiguro y'isanamu, Perezida Cyril Ramaphosa (uteruye igikombe) yishimira intsinzi n'abakinnyi mu Buyapani

Yatangajwe 3 Ukw'icumi na rimwe 2019

Afurika y'Epfo yaraye mu byishimo nyuma yaho ikipe y'igihugu ya Rugby itsinze Ubwongereza ku mukino wa nyuma ku manota 32 - 12 ikegukana igikombe cy'isi.

Kibaye icya gatatu yegukanye muri uwo mukino - nyuma y'icyo mu 1995 no mu 2007, ikaba ubu inganya umuhigo na New Zealand wo kugitwara inshuro nyinshi.

Muri Afurika y'Epfo baraye bavuza vuvuzela, bahoberana, barira, baseka kugeza imbavu zinaniwe, bavuza amahoni y'imodoka ndetse banywa banamena inzoga - kubera ibyishimo.

Na n'ubu bakomeje kwishima kubera iyo ntsinzi ikomeye igaragara nk'ibaryoheye kurushaho.

Ni ukubera ukuntu ubukungu butifashe neza muri iki gihugu, ubusumbane bukomeje kwiyongera, imvugo n'ibikorwa by'irondabwoko, ukwiyongera kwa ruswa ndetse n'impungenge zikomeye kuri ejo hazaza h'iki gihugu ubundi cyigiramo ishyaka mu buryo bukomeye.

Nyuma y'umukino wa nyuma wabereye i Yokohama mu Buyapani, Siya Kolisi, kapiteni w'umwirabura ufatwa nk'icyitegererezo w'iyi kipe, yagize ati: "Dushobora kugera ku kintu icyo ari cyo cyose dushyize hamwe nk'umuntu umwe".

Insiguro y'isanamu, Abanya-Afurika y'Epfo bakomeje kwishimira kwegukana igikombe cy'isi cya Rugby ku nshuro ya gatatu

Kandi no mu tubari n'ahandi Abanya-Afurika y'Epfo bareberaga uwo mukino, ayo magambo ye - nibura muri aka kanya - asa nk'ayikirizwa.

Kolisi yongeyeho ati: "Ntabwo naribwigere mbona, kuva nabaho, ntabwo naribwigere mbona Afurika y'Epfo imeze gutya".

Skip Ibisomwa cane and continue reading

Ibisomwa cane

End of Ibisomwa cane

Kuri ayo magambo ye, ni nako imbaga y'abirabura n'abazungu yikirizaga "yego" n'umutwe, ari nako itera hejuru byo kumushyigikira.

Umunyeshuri w'umukobwa w'umwirabura wo mu nkengero y'umujyi wa Johannesburg, wasimbukaga yitera mu bicu kubera ibyishimo ari kumwe n'inshuti ze barebanaga umukino, yagize ati: "Ndishimye cyane!"

Umugore wareberaga umukino mu gice cy'abakire kiri hanze y'uwo mujyi na we yabwiye umunyamakuru wa BBC Andrew Harding ati: "Twanyuze mu bintu byinshi cyane nk'igihugu, none iki ni ikintu cyiza dushobora kwishimira nk'igihugu".

Insiguro y'isanamu, Ikipe ya Rugby y'Afurika y'Epfo yaraye yegukanye igikombe cy'isi irimo abakinnyi 12 b'abirabura ndetse abaturage bayibonamo nk'ihuriwemo na bose by'ukuri

Insiguro y'isanamu, Kapiteni Siya Kolisi na mugenzi we Handre Pollard bahoberana nyuma y'uwo mukino

Insiguro y'isanamu, Kapiteni Siya Kolisi - n'umukobwa we - basuhuza abafana nyuma y'umukino

Insiguro y'isanamu, Ku rundi ruhande, kari agahinda ku bakinnyi b'ikipe y'igihugu ya Rugby y'Ubwongereza

Insiguro y'isanamu, Abafana bavuze ko intsinzi y'ikipe y'igihugu y'Afurika y'Epfo izwi nka 'Springboks', ari ikintu cyiza ku gihugu

Mu gihe ikipe yo mu 1995 yarimo umwirabura umwe, iyaraye yegukanye igikombe cy'isi cya Rugby irimo abakinnyi 12 b'abirabura ndetse abaturage bayibonamo nk'ihuriwemo na bose by'ukuri.

Dore amwe mu mafoto y'uko mu rwambariro rw'iyi kipe hari hifashe nyuma yo kwegukana igikombe: