Avugwa mu mupira w'amaguru i Burayi 19/9/2019: Zidane, Pogba, Van Dijk, Sancho

Manchester United yizeye kwemeza Umufaransa Paul Pogba ukina hagati w'imyaka 26 gushyira umukono kuri kontaro nshya. (Standard)

Umwongereza Jesse Lingard w'imyaka 26 na mugenzi we na we w'Umwongereza Mason Greenwood w'imyaka 17 ukina nka rutahizamu mu ikipe y'igihugu y'Ubwongereza y'abari munsi y'imyaka 21, na bo bari mu bashobora gushyira umukono kuri kontaro nshya muri Manchester United. (Standard)

Paul Scholes wahoze ari umukinnyi wo hagati wa Manchester United avuga ko Pogba ataba ari "igihombo kinini" avuye muri Manchester United. (Talksport)

Abafana barakaye b'ikipe ya Real Madrid basabye ko Zinedine Zidane yirukanwa ku gutoza iyi kipe nyuma yaho inyagiriwe ibitego 3 - 0 na Paris Saint-Germain muri Champions League ku munsi w'ejo ku wa gatatu. (Sun)

Juventus yanze kugura umukinnyi Dani Alves kuri iyi mpeshyi mbere yuko uyu myugariro ukomoka muri Brazil w'imyaka 36 yerekeza mu ikipe y'iwabo ya Sao Paulo. (Calciomercato)

Manchester United yohereje umukozi wayo kureba imikinire ya rutahizamu Erling Haaland w'imyaka 19 wo muri Norvège, mu gihe uyu muhungu wa Alf-Inge Haaland wahoze ari rutahizamu wa Manchester City yigaragazaga mu ruhando rw'Uburayi atsindira ibitego bitatu ikipe ye ya Red Bull Salzburg mu mukino wa mbere we wa Champions League. (Salzburger Nachrichten, via Sport Witness)

Blackburn iri mu biganiro byo kugura uwahoze ari umukinnyi wo hagati wa Tottenham na Fulham, Lewis Holtby. Uyu Mudage w'imyaka 29 ubu nta kipe afite akinamo nyuma yo kuva muri Hamburg mu mwaka ushize w'imikino. (Mail)

Everton irashaka kugura rutahizamu David Parkhouse w'imyaka 19 ukomoka muri Northern Ireland, kuri ubu ukina muri Derry City nk'inguzanyo aho yageze avuye muri Sheffield United. (Football Insider)

Gareth Bale, umukinnyi ukina ku ruhande muri Real Madrid, avuga neza Icyespanyole, nkuko bivugwa na Chris Coleman wahoze atoza ikipe y'igihugu ya Wales. Mbere yaho Bale yari yaranenzwe na John Toshack na we ukomoka muri Wales avuga ko atize Icyespanyole kuva yagera muri Real mu mwaka wa 2013. (Athletic, via Marca)

Manuel Neuer, umunyezamu wa Bayern Munich w'imyaka 33, ari gutekereza ku gusezera ku gukina mu ikipe y'igihugu y'Ubudage nyuma y'imikino ya European Championships yo mu mwaka utaha. (Bild)

Jadon Sancho, Umwongereza w'imyaka 19 y'amavuko ukina ku ruhande muri Borussia Dortmund, uri kwifuzwa n'ikipe ya Manchester United, yanze guhakana ko ashobora kuva muri iyo kipe yo mu Budage ku mpeshyi itaha. (Viasport, via Metro)

Manchester United iri gukurikiranira hafi uko umutoza w'Umudage Thomas Tuchel amerewe mu ikipe ya Paris Saint-Germain, mu gihe Manchester United yaba ishatse gusimbuza umutoza wayo Ole Gunnar Solskjaer. (Le10 Sport, via Sport Witness)

Myugariro Virgil van Dijk w'imyaka 28, yahakanye amakuru yuko ari hafi gushyira umukono kuri kontaro nshya akinira Liverpool. (Sky Sports, via Mail)

Chelsea yatangiye ibiganiro na rutahizamu Tammy Abraham na myugariro Fikayo Tomori byo guha aba Bongereza b'imyaka 21 amasezano mashya y'imyaka itanu. (Guardian)

Tottenham iri gutekereza ku kuba yakongera kwitabaza umukinnyi wayo ukina ku ruhande Jack Clarke w'imyaka 19 ukina ku nguzanyo mu ikipe ya Leeds, kugeza ubu muri uyu mwaka w'imikino akaba atarakina umukino wa shampiyona. (Mail)

Impuzamashyirahamwe y'umupira w'amaguru i Burayi, UEFA, mu cyumweru gitaha izemeza ko ikibuga cya Wembley ari cyo kizakinirwamo umukino wa nyuma wa Champions League muri 2023.

Arsenal yatangiye igikorwa cyo kugerageza kugura umukinnyi ukina hagati Dominik Szoboszlai w'imyaka 18 ukomoka muri Hungary (Hongrie) imukuye muri Red Bull Salzburg. (Football.London)

Umutoza Unai Emery wa Arsenal yohereje abakinnyi be i London mu mugoroba wo kwisuzuma, hashize amasaha bakinnye nabi umukino banganyijemo na Watford ibitego 2-2 ku cyumweru gishize. (Mirror)

Abanyemari b'Abanyamerika Dave Checketts na Alan Paceremain bagura ikipe ya Sheffield United mu gihe igikomangoma Abdullah yaba afashe icyemezo cyo kuyigurisha. (Mail)