Avugwa mu mupira w'amaguru i Burayi 20/08/2019: Neymar, Eriksen, Varane, Vorm, Mustafi, Ibe, Bravo

Biteganyijwe ko muri iki cyumweru Barcelone igerageza kugura ku nguzanyo rutahizamu Neymar w'imyaka 27 imukuye muri Paris Saint-Germain, amasezerano ashobora no kuba akubiyemo ko yamugira umukinnyi wayo uhoraho guhera ku mpeshyi y'umwaka utaha. (ESPN)

Juventus yatangiye ibiganiro na Paris Saint-Germain, mu gihe binjiye mu nkundura yo kugura rutahizamu Neymar ukomoka muri Brezili, wageze muri ikipe yo mu Bufaransa mu mwaka wa 2017 aguzwe miliyoni 200 z'amapawundi. (AS)

Ariko Barcelone ntabwo yiteguye kuzibukira ku nzozi zayo zo kugarura Neymar ku kibuga cya Nou Camp. (Marca)

Paris Saint-Germain iri gushaka kugurisha Neymar muri Real Madrid, nayo ikayigurisha myugariro Raphaël Varane w'imyaka 26 n'umukinnyi ukina ku ruhande Vinicius Jr. w'imyaka 19. (Telefoot, via Sun)

Umukinnyi Christian Eriksen w'imyaka 27 wa Tottenham ukomoka muri Denmark, ashishikajwe gusa no kwerekeza muri imwe mu makipe atatu ari yo Barcelone, Real Madrid cyangwa Juventus. (ESPN)

Liverpool ishobora kugura Michel Vorm w'imyaka 35 wahoze ari umunyezamu wa Tottenham, kuri ubu udafite ikipe akinamo. (Caught Offside)

Arsenal yiteguye kureka myugariro w'Umudage Shkodran Mustafi w'imyaka 27 akerekeza muri Roma ku nguzanyo mu gihe cy'umwaka umwe, harimo nuko ashobora kugurwa mu buryo buhoraho kuri miliyoni 23 z'amapawundi. (Forza Roma, via Sun)

Celtic irashaka gupfundika amasezerano y'inguzanyo ajyanye n'umukinnyi wa Bournemouth Jordan Ibe w'imyaka 23, mbere yuko igihe cy'igura n'igurishwa ry'abakinnyi muri Scotland kirangira ku itariki ya kabiri y'ukwezi gutaha kwa cyenda. (Express)

Manchester City, Arsenal na Tottenham zose zohereje abajya gukurikiranira hafi umukinnyi wo hagati Eduardo Camavinga w'imyaka 16 wafashije Rennes gutsinda Paris Saint-Germain. (Mail)

Umunyezamu Claudio Bravo w'imyaka 36 ukomoka muri Chili, biteganyijwe ko ava muri Manchester City mu mpera y'uyu mwaka w'imikino. (Sun)

Fernando Llorente w'imyaka 34 wahoze ari rutahizamu wa Tottenham, ari hafi kwerekeza muri Lazio nyuma yaho atandukaniye ya Tottenham kuri iyi mpeshyi. (Corriere dello Sport)

Monaco iri gushaka kugura umukinnyi wo hagati wa Chelsea Tiémoué Bakayoko w'imyaka 25 kuri ubu utari mu bihe bye byiza, ndetse n'umukinnyi wo hagati ukomoka muri Gabon, Mario Lemina w'imyaka 25 ukinira Southampton, mbere y'igihe ntarengwa cy'igura n'igurishwa ry'abakinnyi i Burayi. (L'Équipe, via Talksport)

Umutoza Ole Gunnar Solskjaer yashimangiye ko umukinnyi w'Umufaransa Paul Pogba w'imyaka 26, atazava muri iyi kipe kuri iyi mpeshyi. (Sky Sports)

Biteganyijwe ko Arsenal yongerera umushahara rutahizamu wayo ukomoka muri Gabon Pierre-Emerick Aubameyang w'imyaka 30, mu kumushimira kubera ukuntu akomeje gutsinda ibitego. (Telegraph)

Juventus iri kwitegura kugura umukinnyi myugariro wa Barcelone Juan Miranda w'imyaka 19, ku mafaranga abarirwa muri miliyoni 10 z'ama-euro. (Mundo Deportivo)

Wallace, myugariro ukomoka muri Brezili w'imyaka 24 ukinira Lazio, bivugwa ko ashobora kwerekeza muri Wolves, ubu biravugwa ko ashobora kwerekeza muri Valencia cyangwa Monaco. (Birmingham Mail)

Umunyezamu Joao Virginia w'imyaka 19 wa Everton, afite akazi gakomeye ko kubona umwanya wo gukina abanje mu kibuga mu ikipe ya Reading ikina mu cyiciro cya Championship, aho uyu Munyaportugali ari gukina nk'intizanyo mu gihe cy'umwaka. (Liverpool Echo)

West Ham irashaka guha kontaro nshya y'igihe kirekire Manuel Lanzini w'imyaka 26, mu gihe kontaro isanzwe y'uyu mukinnyi wo hagati ukomoka muri Argentine isigaje amezi 12 gusa ngo irangire. (Sky Sports)

Myugariro wa Manchester United Macos Rojo w'imyaka 29 ukomoka muri Argentine, yangiwe kwerekeza muri Everton ku munsi wa nyuma w'igura n'igurishwa ry'abakinnyi mu Bwongereza kuko iyi kipe ibonwa nka mucyeba utaziguye. (Express)

Umukinnyi Claudio Marchisio w'imyaka 33 kuri ubu udafite ikipe akinamo, yahishuye ko yanze ubusabe bwo gukinira ikipe ya Jiangsu yo mu Bushinwa kubera ko ikorana bya hafi n'ikipe ya Inter Milan, iyi ikaba ari mucyeba w'ikipe ya Juventus yahoze akinamo. (Goal)

Umukinnyi w'Umufaransa Matteo Guendouzi w'imyaka 20 ukina hagati mu ikipe ya Arsenal, avuga ko umusatsi we ari mwiza cyane kurusha uwa mugenzi we bakinana David Luiz uherutse kugurwa n'iyi kipe. (Mirror)