Avugwa mu mupira w'amaguru i Burayi 17/08/2019: Sancho, Zaha, Shaqiri, Eriksen, Aurier, Pogba, Neymar, Reine-Adélaïde

Byitezwe ko Jadon Sancho ava mu ikipe ya Borussia Dortmund ku mpeshyi itaha, mu gihe iyi kipe yo mu Budage iri gushakisha uwasimbura uyu rutahizamu w'Umwongereza w'imyaka 19. (Mail)

Roy Hodgson, umutoza wa Crystal Palace, avuga ko umukinnyi ukomoka muri Côte d'Ivoire Wilfried Zaha w'imyaka 26 bigishoboka ko yava muri iyi kipe kuri iyi mpeshyi. (Sun)

Monaco irashaka rutahizamu w'Umwongereza Daniel Sturridge w'imyaka 29, kuri ubu udafite ikipe akinira nyuma yo kuva muri Liverpool. (L'Équipe)

Umukinnyi wo hagati w'Umusuwisi Xherdan Shaqiri w'imyaka 27 avuga ko azatekereza ku hazaza he muri Liverpool niba adakinishijwe kurushaho. (Langenthaler Tagblatt via Daily Star)

Gutakaza rutahizamu w'Umwongereza Harry Kane w'imyaka 26 byagira ingaruka zikomeye kurushaho kuri Tottenham, kurusha gutakaza umukinnyi wo hagati Christian Eriksen w'imyaka 27 ukomoka muri Danemark, nkuko bivugwa n'uwahoze ari myugariro wa Liverpool Jamie Carragher. (Daily Telegraph)

Umutoza Zinedine Zidane wa Real Madrid avuga ko yishimiye kugira umukinnyi wo hagati James Rodriguez w'imyaka 28 mu ikipe ye, mu gihe uyu mukinnyi ukomoka muri Colombia biherutse kuvugwa ko ashobora kuva muri iyi kipe. (Corriere dello Sport)

Mu gihe umukinnyi w'inyuma Andrea Conti w'imyaka 25 wa AC Milan yaba ayivuyemo, iyi kipe yo mu Butaliyani yatekereza ku kuba yagura umukinnyi ukina inyuma wa Tottenham Serge Aurier w'imyaka 26 ukomoka muri Côte d'Ivoire. (Gazzetta dello Sport)

Mathias, umuvandimwe w'umukinnyi Paul Pogba, avuga ko uyu mukinnyi wo hagati w'Umufaransa w'imyaka 26 agishaka kuva muri Manchester United akajya muri Real Madrid. (El Chiringuito via Daily Mail)

Neil Lennon utoza Celtic yo muri shampiyona ya Scotland ashimangira ko umunyezamu mushya atari mu bakinnyi ashaka kugura kuri iyi mpeshyi. (Daily Record)

Umukinnyi Stephen Dawson w'ikipe ya Bury FC avuga ko ashobora gutakaza inzu ye mu gihe iyi kipe yaba isenyutse. (Talksport)

Umutoza Unai Emery wa Arsenal yemera ko atazi niba abakinnyi iyi kipe yaguze kuri iyi mpeshyi barayongereye imbaraga. (Mirror)

Umutoza Tite w'ikipe y'igihugu ya Brezili avuga ko rutahizamu Neymar w'imyaka 27 agitegereje icyemezo cya Paris Saint-Germain kuri ejo hazaza he. (Marca)

Byitezwe ko Arsenal ibona agera hafi kuri miliyoni eshanu z'amapawundi ku mukinnyi wo hagati w'Umufaransa Jeff Reine-Adélaïde ku kuva muri Angers kwe yerekeza muri Olympique Lyonnais, bijyanye n'amasezerano yo kuyivamo angana na 20% yo muri kontaro y'uyu mukinnyi w'imyaka 21. (Evening Standard)

Umukinnyi wo hagati wa Tottenham Moussa Sissoko w'imyaka 30, yavuze ko yarize ubwo ikipe ye yatsindwaga na Liverpool mu kwezi kwa gatandatu ku mukino wa nyuma wa Champions League. (Talksport)