Ku munota wa nyuma, Cameroun nayo yakomeje

Ajara Nchout yatsinze ibitego bibiri harimo icyo yatsinze ku munota wa nyuma Cameroun itsinda New Zealand 2 -1 ihita ibona umwanya mu mikino ya 1/8 cy'igikombe cy'isi cy'abagore.

Mbere y'uyu mukino Cameroun yari imaze gutsindwa imikino ibiri, abahanga mu mupira ntibahaga iyi kipe amahirwe yo gukomeza.

Iki gitego bagitsinze ku munota wa 95 wari uwa nyuma mu y'inyongera ubwo amakipe yombi yanganyaga 1 -1, Nchout kandi ni nawe wari wafunguye amazamu ku munota wa 57.

Umukino ujya kurangira Cameroun yagomba guhita itaha kuko yari yitsinze igitego amakipe yombi angnaya 1 - 1.

Iyi ntsinzi yayihaye amanota atatu mu itsinda E maze ikomeza nk'ikipe ya gatatu yitwaye neza, nk'uko na Nigeria yakomeje mu itsinda A.

Inyuma y'Ubuholandi na Canada, Camerou muri 1/8 ku cyumweru izahura n'Ubwongereza butozwa na Phil Neville wahoze ari umukinnyi muri Manchester United.

Nigeria yo irahura n'Ubudage kuri uyu wa gatandatu.

Ubuholandi bwakomeje ari ubwa mbere muri iri tsinda budatsinzwe umukino n'umwe kuko nabwo bwaraye butsinze Canada 2 -1.

Cameroun niyo yayoboye umukino na New Zealand, gusa ku munota wa 80 Aurelle Awona yitsinze igitego bituma amahirwe yayo ayoyoka kugeza ku munota wa 95 ubwo babonye intsinzi.

Mu makipe atatu yari ahagarariye Afurika muri iyi mikino, Nigeria na Cameroun nizo zibonye umwanya mu mikino ya 1/8 cy'iki gikombe cy'isi kiri kubera mu Bufaransa. Afurika y'Epfo yarasezerewe.

Ni inshuro ya kabiri yikurikiranya Cameroun igeze muri iki kiciro.