Ibikorwa bitari ibya siporo byahagaritswe ku bibuga i Kinshasa nyuma yuko 9 bapfiriye mu gitaramo cya 'gospel'

Ubutegetsi bwa Repubulika ya Demokarasi ya Congo bwahagaritse ibikorwa byose bitari ibya siporo kuri 'stade des Martyrs' na 'stade Tata Raphaël', mu murwa mukuru Kinshasa, nyuma yuko abantu nibura icyenda bapfiriye kuri 'stade des Martyrs' mu gitaramo cy'umuhanzi w'indirimbo zaririmbiwe Imana.

Minisiteri y'ubutegetsi bw'igihugu ivuga ko abapfiriye muri icyo gitaramo cyo ku wa gatandatu cy'umuririmbyi n'umwanditsi w'indirimbo za 'gospel' Mike Kalambay, bishwe no "guherwa umwuka", bitewe n'abantu benshi birenze mu gitaramo.

Icyo gitaramo cyanakomerekeyemo abandi bantu 19.

Umuhanzi Kalambay nta cyo yari yatangaza ku mugaragaro.

'Stade des Martyrs' ifite ubushobozi bwo kwakira abantu 80,000 bicaye neza.

'Stade Tata Raphaël' yo ifite ubushobozi bwo kwakira abantu 40,000. Izwi cyane ku kuba ari yo yabereyemo umukino w'iteramakote Muhammad Ali yatsinzemo George Foreman mu mwaka wa 1974.

Kalambay, w'imyaka 44, ni umwe mu bahanzi ba 'gospel' bakunzwe cyane muri DR Congo, akaba ajya akorera n'ibitaramo hanze y'igihugu nko ku mugabane w'Uburayi.

Akurikirwa n'abantu barenga 700,000 kuri Instagram, abarenga 600,000 kuri konti ye yo kuri Facebook, n'abarenga 400,000 ku rubuga rwa YouTube.

Minisitiri w'intebe wungirije akaba na minisitiri w'ubutegetsi bw'igihugu n'umutekano, Jacquemain Shabani, yavuze ko mu nama y'abategetsi yabaye ku cyumweru, hafashwe icyemezo cyo guhagarika "by'agateganyo" ibikorwa byose bitari ibya siporo kuri ibyo bibuga byombi "kugeza hatanzwe irindi tangazo".

Minisitiri Shabani yanavuze ko biyemeje gukora kuburyo imitegurire y'ibikorwa nk'ibyo "yongererwa imbaraga, kandi ako ni akazi ka leta".

Minisitiri w'ubutabera wa DR Congo, Constant Mutamba, yategetse ko hakorwa iperereza, no guhata ibibazo abapolisi bari boherejwe gucunga umutekano kuri 'stade des Martyrs', no guhata ibibazo abo mu kigo 'Maajabu Gospel' cyateguye icyo gitaramo.

Mu itangazo ikigo 'Maajabu Gospel' cyasohoye nyuma y'icyo gitaramo, cyavuze ko kibabajwe cyane no kumenya ko hari abapfuye.

Cyabyegetse ku "banyakavuyo", kivuga ko hari hari abapolisi 2,000 bari bagerageje gutuma haba umutekano.

Abateguye icyo gitaramo na bo bavuze ko hari hari abantu bagera hafi ku 30,000 - abo ni bacye ugereranyije n'abo icyo kibuga gifite ubushobozi bwo kwakira iyo cyuzuye.

'Stade des Martyrs' ni kimwe mu bibuga binini cyane muri Afurika. Ikunze kwakira bamwe mu bahanzi bakomeye, imikino y'umupira w'amaguru, ndetse ni yo Félix Tshisekedi yarahiriyeho nka Perezida.

Ibyabaye ku wa gatandatu bijya bibaho mu bikorwa byitabirwa n'imbaga y'abantu muri DR Congo.

Mu mwaka wa 2022, umubyigano kuri icyo kibuga n'ubundi wapfiriyemo abantu 11 mu gitaramo cy'umuhanzi w'icyamamare w'Umunye-Congo Fally Ipupa.