Apple yavanye gukorera iPhone14 mu Bushinwa ibijyana mu Buhinde

Apple yatangaje ko yatangiye gukorera iPhone 14 mu Buhinde mu gushaka ayandi masoko atari Ubushinwa. 

Iyi kompanyi ubusanzwe iPhone zayo nyinshi izikorera mu Bushinwa ariko yimuriye bimwe mu bikorwa byo kuzikora hanze y’icyo gihugu mu gihe amatati hagati ya Washington na Beijing yiyongera. 

Politike ya ‘zero-Covid’ y’Ubushinwa, yatumye hakomeza kuba za ‘Guma mu rugo’, yateye ibibazo business nyinshi mu gihe cy’icyorezo.  

Mu ntangiriro z’uku kwezi nibwo Apple yatangaje iyi telephone yayo nshya.

Itangazo ryayo rigira riti: “iPhone 14 nshya izanye ikoranabuhanga ridasanzwe n’uburyo bushya bw’umutekano. Twishimiye kuba turimo gukorera iPhone 14 mu Buhinde.”  

Uruganda rwa Foxconn rwo muri Taiwan rukora nyinshi muri telephone za Apple rwari rufite ishami mu ntara ya Tamil Nadu mu Buhinde kuva mu 2017, aho rukorera iPhones za cyera.

Ariko ubu, Apple irimo kugerageza guhindura Ubuhinde isoko rishya ry’igicuruzwa cyabo gishya – iPhone 14.  

Mu kugeragereza Ubuhinde, Apple irashaka no kuhashinga imizi. Kugeza umwaka ushize, isoko ryayo muri icyo gihugu ryageraga kuri 4%. 

Apple yakomeje kugorwa no guhatana smartphones zihendutse cyane zo muri Korea y’Epfo no mu Bushinwa zakomeje kwiganza ku isoko ry’Ubuhinde. 

Ariko gukorera mu Buhinde ntibivuze ko iPhone 14 zizaba zihendutse mu gihugu kubera imisoro myinshi ku byinjira isabwa.  

Mu gihe rero abahinde baba bagiye kubona inyandiko ya “Made in India” kuri iPhone nshya n’ubundi bizabasaba kwishyura menshi ngo bayitunge.  

Muri Amerika iPhone 14 ihera ku giciro cya $799 naho iPhone 14 Pro igahera kuri $999, igiciro gishobora kwiyongera bitewe n’ibihugu. 

Gutangaza ko iPhone ije gukorera mu Buhinde ni itsinzi kuri minisitiri w’intebe Narendra Modi n’ubutegetsi bwe.  

Mu myaka umunani ishize leta ye yatangije ubukangurambaga bwo guteza imbere “Made in India” bugamije kuzamura ibikorerwa mu gihugu no kubyohereza mu mahanga. 

Apple itangaza ko izi mpinduka zigamije kwagura ubucuruzi bwayo mu kwirinda ingaruka zava ku mahari hagati y’Ubushinwa na Amerika kuri Taiwan no mu bucuruzi. 

Mu ntangiriro z’uku kwezi, abasesenguzi bo muri JP Morgan bank bavuze ko biteze ko muri uyu mwaka Apple izimurira 5% by’ibikorwa byayo byo gukora iPhone mu Buhinde.  

Raporo yabo yateganyaga ko 1/4 cy’ibikorwa byose bya iPhone bizimurirwa muri Aziya y’amajyepfo bitarenze 2025.

Umwaka ushize, Foxconn, ya kompanyi ikorera Apple, yashoye miliyari 1.5$ muri Vietnam, nk’uko byatangajwe na leta y’iki gihugu. 

Mu kwezi gushize, igitangazamakuru cya leta muri Vietnam cyavuze ko iyo kompanyi yasinye amasezerano ya miliyoni $300 yo kwagura uruganda rwayo mu kongera ibicuruzwa ikora.