Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Abakuru ba gisirikare bo muri Afurika y'uburengerazuba mu nama kuri Coup d'État yo muri Niger
- Umwanditsi, Cat Wiener
- Igikorwa, Ishami ry'Isi rya BBC
- Yatangajwe
Abakuru b'ingabo bo mu bihugu byo mu muryango w'ubukungu w'Afurika y'uburengerazuba (CEDEAO/ECOWAS), bateraniye mu nama kuri uyu wa gatatu mu murwa mukuru Abuja wa Nigeria, biga ku ihirikwa ry'ubutegetsi ryabaye muri Niger mu cyumweru gishize.
Ku cyumweru, CEDEAO yaburiye ko ihaye iminsi irindwi agatsiko ka gisirikare ko muri Niger kugira ngo kabe kasubije ku butegetsi Perezida Mohamed Bazoum kahiritse.
CEDEAO yari yatangaje ko izafata "ingamba zose za ngombwa mu gusubizaho ubutegetsi bushingiye ku itegekonshinga" mu gihe ibyo isaba byaba bitubahirijwe muri icyo gihe.
Nta cyo agatsiko ka gisirikare ko muri Niger kari kasubiza ku mugaragaro kuri ubwo busabe, ariko kasezeranyije kurwana ku gihugu haramutse habaye "ubushotoranyi" ubwo ari bwo bwose bwo mu karere cyangwa bw'ibihugu bikomeye byo mu burengerazuba.
Mu ijoro ryacyeye, indege ya mbere mu ndege eshatu z'Ubufaransa zoherejwe muri Niger guhungisha Abanyaburayi, yageze mu murwa mukuru Paris w'Ubufaransa irimo abantu barenga 250.
Uko guhungisha kubaye nyuma yuko ku cyumweru abigaragambya bashyigikiye ihirikwa ry'ubutegetsi muri Niger bagabye igitero kuri ambasade y'Ubufaransa i Niamey.
Ubutaliyani na bwo bwahungishije mu ndege abaturage babwo babarirwa muri za mirongo bubakuye muri Niger, hamwe n'abandi Banya-Burayi, n'Abanyamerika.
Agatsiko ka gisirikare kafashe ubutegetsi muri Niger katangaje ko imipaka y'icyo gihugu na Algeria, Burkina Faso, Libya, Mali na Tchad yongeye gufungurwa. Ariko umupaka wo ku butaka Niger ihana na Nigeria uracyafunze.