Umuriro kuri stasiyo y'ibitoro wishe ababarirwa muri mirongo mu Burusiya

Abantu nibura 35 bapfiriye mu giturika no mu nkongi y'umuriro kuri stasiyo y'ibitoro i Dagestan mu majyepfo y'Uburusiya.

Uko guturika kwabereye mu murwa mukuru Makhachkala w'ako karere, uri ku nkombe y'inyanja ya Caspian, saa tatu n'iminota 40 z'ijoro (21:40) ku isaha yaho.

Abandi bantu babarirwa muri za mirongo bahakomerekeye, impamvu yabiteye ntiramenyekana.

Perezida Vladimir Putin yihanganishije imiryango yabuze abayo.

Amafoto yagaragaje umuriro mwinshi waka mu kirere cya nijoro ndetse n'imashini zizimya inkongi ziri aho byabereye.

Abakozi 260 bakora ubutabazi bwihuse bahageze, n'indege yo gutwara abakomeretse cyane ibajyana mu murwa mukuru Moscow w'Uburusiya, nkuko byatangajwe na minisiteri y'ubutabazi bwihuse.

Ibiro ntaramakuru Interfax byo mu Burusiya byasubiyemo amagambo y'abaganga bavuga ko abana batatu bari mu bapfuye.

Byongeyeho ko umuriro wakwirakwiriye ku buso bwa metero kare (m2) 600 kandi ko hari ibyago ko hashobora kugira ibindi biturika.

Uwabibonye utatangajwe izina wasubiwemo n'ikinyamakuru Izvestia cyo mu Burusiya yavuze ko umuriro watangiriye ahaparikwa imodoka hateganye na stasiyo y'ibitoro.

Uwo wabibonye yagize ati: "Nyuma y'igiturika, buri kintu cyose cyatuguye ku mitwe. Nta kintu twari tugishobora kubona".

Akanama k'iperereza k'Uburusiya kavuze ko umuriro watangiye ubwo hari igikorwa cyo kwita ku modoka cyari kirimo gukorwa, "gikurikirwa no guturika cyane".

Ako kanama kavuze ko hatangiye dosiye yo mu rwego mpanabyaha kugira ngo hamenyekane icyateye ibyabaye.

Repubulika ya Dagestan ni imwe mu bice 83 bigize Uburusiya ndetse ni yo gice cyo mu majyepfo cyane cy'icyo gihugu. Umujyi wa Makhachkala uri ku ntera ya kilometero 1,600 uvuye i Moscow.