Ukraine: Uburusiya bwacucagiye amabombe ku bisagara bitari bike mu gihugu cose

Uburusiya bwacucagiye ibisasu vya misire ku bisagara bitari bike vya Ukraine, kuva muri Kharkiv mu buraruko, ukaja muri Odesa mu bumanuko gushika muri Zhytomyr mu burengero.

Inyubakwa n’ibibanza vy’ibikorwa remezo nivyo vyatewe muri Kharkiv na Odesa, bikaba vyatumye uturere tutari duke tuba mu kizime.

Haravugwa kandi ko no ku mugwa mukuru Kyiv hatewe.

Umuyagankuba kandi ku kigo ca nikleyeri ca Zaporizhzhia kiri mu minwe y’Uburusiya wacitse.

Ibi bitero bibaye mu gihe intambara z’urutavanako mu gisagara ca Bakhmut kiri mu buseruko zibandanya.

Igisirikare ca Ukraine kivuga ko Uburusiya bwarashe ibisasu vya misire 81 ku bisagara mu gihugu cose, za ndege zitagira abadereva (drones) umunani zikaba zakoreshejwe. Kivuga ko cakoroye misire 34 hamwe n’amadrone ane yo mu bwoko bwa Shahed yakorewe muri Irani.

Abajejwe ubutabazi muri Kyiv bashitse ahaturikiye ibi bisasu mu burengero no mu bumanuko bw’iki gisagara, nk’uko bivugwa n’umukuru waco, Vitaly Klitschko.

Klitschko avuga ko amamodoka yariko arasha mu kigo c’inyubakwa ituwemwo n’abantu, anasaba abanyagihugu kuguma mu mazu. Igice kinini c’igisagara cinjiye mu kizime, aho bane kw’icumi ata muyagankuba bafise, nk’uko abivuga.

Igitero c’ibisasu vya misire cakozwe ku kigo c’umuyagankuba mu gisagara ca Odesa kiri ku nkengera y’ikiyaga, ivyatumye umuyagankuba ucika, nk’uko bivugwa na buramatari wayo Maksym Marchenko.

Uturere dutuwemwo n’abantu natwo nyene twatewe ariko nta bapfuye, nk’uko abivuga.

"Ibisasu vyababa 15" vyatewe kuri Kharkiv, aho "ibibanza nyamukuru" n’inzu ituwemwo n’abanyagihugu vyatewe, nk’uko bivugwa n’umukuru w’ubutegetsi bw’iyo ntara Oleg Synegubov.

Mu burengero bwa Ukraine abantu nibura batanu bishwe mu gisagara ca Lviv inyuma y’aho igisasu ca muzinga giterewe ku nzu yabo, nk’uko bitangazwa na buramatari w’intara Maksym Kozytskyi aciye ku rubuga rwa Telegram.

Umuntu umwe ni we yapfuye abandi babiri barakomereka inyuma y’ibitero vya drone na misire mu ntara ya Dnipropetrovsk, nk’uko bivugwa na buramatari Serhii Lysak.

Mu zindi ntara zatewe harimwo Vynnytsia na Rivne mu burengero, hamwe na Dnipro na Poltava hagati mu gihugu.

Ibi ni vyo bitero vya misire vya mbere vy’Ubrusiya kuri Ukraine kuva mu mpera z’ukwa mbere, igihe abantu 11 bicwa inyuma y’aho inyubakwa zitari nke ziterewe mu ntara zitari nke.

Haraciye umwaka urenga Perezida Vladimir Putin w’Uburusiya atanguje iyi ntambara. Kuva ico gihe abasivire n’abarwanyi baharurwa mu bihumbi mirongo baramaze kwicwa canke gukomereka, amamiriyino y’abanya-Ukraine nabo barahunga.

Ejo ku wa gatatu, umukuru w’igendereza rya Amerika, Avril Haines, yavuze ko Perezida Putin yoba afise intumbero yo kubandanya intambara mu kiringo c’imyaka myinshi, ariko ko Uburusiya ata nguvu zikwiye bufise bwo gukora ibitero rutura muri uno mwaka.

Uyu mupfasoni avuga ko iyi ntambara yo muri Ukraine yabaye “intambara yo gusamburana aho ata ruhande na rumwe rwiganza ku rubuga”.

Ati: "Ntitubona ko igisirikare c’Uburusiya kizohava civyukiranya bikwiye uno mwaka kugira ngo cigarurire ubundi butaka, ariko Putin ashobora kuba ariko araharura ko umwanya uzomuha akarusho, kandi ko gukurura intambara harimwo n’ibihe vyo kuruhuka muri ino ntambara ari yo nzira nyayo asigaranye kugira ngo akingire inyungu ziwe muri Ukraine, n’aho vyofata imyaka myinshi”.

Umupfasoni Haines avuga ko Uburusiya bushobora kwibanda ku gukingira ubutaka bugenzura ubu, akongerako y’uko ibi bishobora gusaba “kwinjiza abandi barwanyi n’ibirwanisho bivuye hanze” kugira ngobuashobore gushigikira urugamba rwabwo muri Ukraine.

Igisirikare ca Ukraine kivuga ko casubije inyuma ibitero bikomeye vy’Uburusiya mu gisagara ca Bakhmut gisugerejwe, n’aho ingabo z’Uburusiya zivuga ko zigaruriye igice co mu buseruko bwaco.

Moscou imaze amezi atari make igerageza kwigarurira Bakhmut, mu gihe impande zompi zitakaza cane mu kugerageza gusamburana.

Ibiro bikuru vy’igisirikare ca Ukraine bivuga biti: "Umwansi arabandanya ibitero vyiwe kandi ntiyerekana ikimenyetso c’agahengwe mu gusambura igisagara ca Bakhmut. Abantu bacu barasubije inyuma ibitero kuri Bakhmut n’uturere two mu micungararo”.

Abatgetsi b’ibihugu vy’uburengero bavuga ko ingabo z’Uburusiya ziri hagati ya 20.000 na 30.000 ari zo zimaze gupfira canke gukomerekera mu rugamba rwa Bakhmut kuva rutanguye mu ci riheze. Ibi bitigiri ntibirahinyuzwa n’ubuhande ataho rwegamiye.