Saudi Arabia yatumiye Perezida wa Iran Raisi kuyisura, ni ko Tehran ivuga

Iran ivuga ko Saudi Arabia (Arabie Saoudite) yatumiye Perezida wa Iran Ebrahim Raisi ngo ahagirire uruzinduko rw'akazi - nyuma y'icyumweru kirenga gishize ibi bihugu byemeranyijwe gusubizaho umubano wa diplomasi.

Ubwo butumire buvugwa ko bwaje mu ibaruwa buvuye ku Mwami Salman, ariko ntiburemezwa n'uruhande rwa Saudi Arabia.

Amateka yo mu burasirazuba bwo hagati yo mu gihe cya vuba aha gishize yihariwe n'ubushyamirane hagati y'ibi bihugu bibiri.

Ubushinwa bwakuyeho ubwo bushyamirane, ibi bikaba bishobora guha indi sura politiki yo muri aka karere.

Mohammad Jamshidi, umutegetsi wo ku rwego rwo hejuru wo muri Iran, yanditse kuri Twitter avuga kuri ubwo butumire bwo gusura umurwa mukuru Riyadh wa Saudi Arabia, avuga ko Raisi yabwakiriye neza ndetse "ashimangira ukwitegura kwa Iran kwo kwagura ubufatanye".

Ku rundi ruhande, Minisitiri w'ububanyi n'amahanga wa Iran Hossein Amir-Abdollahian yabwiye abanyamakuru ko ibi bihugu bibiri byemeranyijwe kugirana inama yo ku rwego rwa minisitiri w'ububanyi n'amahanga, ndetse ko hari ahantu hatatu hatanzweho igitekerezo ko ari ho ishobora kubera.

Ntabwo yavuze aho hantu, cyangwa ngo avuge igihe iyo nama ishobora kubera.

Umwanditsi mukuru wa BBC ku burasirazuba bwo hagati, Sebastian Usher, avuga ko uku gutera intambwe mu mubano w'ibihugu byombi kwa vuba aha, kwagezweho bitari byitezwe nyuma y'ibiganiro byamaze iminsi byagizwemo uruhare n'Ubushinwa, gusa nk'ukuri gufata intera ikomeye.

Ibihugu byombi byatangaje ko bizongera gufungura ambasade zabyo mu gihe kitarenze amezi abiri kandi ko bigiye gusubizaho umubano wo mu rwego rw'ubucuruzi n'umutekano.

Iyi ntambwe yakiranywe kwigengesera na benshi, barimo Amerika n'umuryango w'abibumbye (ONU/UN), nyuma yuko amagerageza y'ubwiyunge yabayeho mbere nta cyo yagezeho.

Saudi Arabia yaciye umubano na Iran mu kwezi kwa mbere mu 2016, nyuma yuko abigaragambyaga biraye muri ambasade yayo yo mu murwa mukuru Tehran.

Ibyo byabaye nyuma yuko Riyadh ishyize mu bikorwa igihano cy'urupfu ku muyobozi ukomeye wa kisilamu w'igice cy'aba Shia, Sheikh Nimr al-Nimr, wari wahamijwe ibyaha bifitanye isano n'iterabwoba.

Kuva icyo gihe, ubushyamirane hagati y'aba baturanyi bayobowe n'abayisilamu b'aba Sunni (muri Saudi Arabia) n'aba Shia (muri Iran) akenshi bwagiye bugera ku kigero cyo hejuru, buri ruhande rukabona urundi nk'urushyize ku nkeke ubutegetsi bwarwo rushaka kugira ijambo mu karere.

Bagiye baba ku mpande zihanganye mu ntambara nyinshi zo mu karere, harimo no mu ntambara zo muri Syria na Yemen.

Amir-Abdollahian, wa Minisitiri w'ububanyi n'amahanga wa Iran, yanavuze ko Iran yizeye ko hari intambwe izanaterwa mu mubano wayo na Bahrain, inshuti ikomeye ya Saudi Arabia yakurikiye Riyadh mu guca umubano na Tehran mu mwaka wa 2016.

Yagize ati: "Twizeye ko imbogamizi zimwe hagati ya Iran na Bahrain zizakurwaho ndetse tuzatera intambwe z'ibanze mu kongera gufungura ambasade".

Bahrain nta cyo irasubiza kuri ayo magambo, ariko mbere yaho yari yakiriye neza amasezerano ya Iran na Saudi Arabia yo gusubizaho umubano wa diplomasi.

Iran yanavuze ko ishaka gusubukura cyangwa kuvugurura umubano n'ibindi bihugu by'Abarabu by'abacyeba byo mu karere, birimo Jordan (Jordanie) na Emira Zunze Ubumwe z'Abarabu (UAE).