BBC yirukanye umunyamakuru w'imikino Jermaine Jenas wahoze ari umukinnyi nyuma y’ibirego kuri we
Ahavuye isanamu, PA Media
- Umwanditsi, Noor Nanji & Sam Hancock
- Igikorwa, BBC News
- Yatangajwe
- Igihe co gusoma: iminota 3
Jermaine Jenas, watangazaga ikiganiro The One Show waciye kandi no mu kiganiro Match of the Day bya BBC, yirukanywe n’iki kigo kubera abinubiye imyitwarire ye ku kazi.
BBC News yamenye ko Jenas w’imyaka 41, amasezerano ye n’iki kigo yahagaritswe muri iki cyumweru kubera ibigendanye n’imyifatire ku kazi.
Asubiza kuri aya makuru, Jenas yavuze ko hari “buri nkuru igira impande ebyiri” gusa ko we azareka “abanyamategeko be bagakora kuri iki”.
Ibyo ashinjwa birimo ibifatiye ku itumanaho rikoresheje ubutumwa, byagejejwe kuri BBC mu byumweru bishize.
Mu kiganiro na talkSport kuri radio, ubwo yari abajijwe ku byo ashinjwa, yasubiyemo ati: “Sinshobora rwose kubivugaho”.
Yagize ati: “Nk’uko mubibona ntabwo binshimishije.”
Abajijwe niba yatunguwe ko hari abantu bamureze, Jenas nanone yagize ati: “Ubu rwose ntabwo navuga.
“Ibi ngomba kubiharira itsinda ry’abanyamategeko aka kanya, ndatekereza ko barimo gushyira ibintu mu buryo. Kandi ngomba kumva abanyamategeko banjye.”
Umuvugizi wa BBC yavuze ko: "Twakwemeza ko Jermaine Jenas atakiri mu batanga ibiganiro byacu."
Jenas, ufite umugore n’abana bane, yinjije hagati ya £190,000 - £194,999 (ni hafi miliyoni 340 Frw) kuri BBC mu kazi yakoze muri FA Cup, ikiganiro Match of the Day hamwe no mu gikombe cy’isi.
Akazi ke mu kiganiro The One Show yagakoreraga BBC Studios, kompanyi y’ubucuruzi y’iki kigo, bityo umushahara we ntabwo watangazwa kuko akorera kompanyi isa n’iyigenga.
Ahavuye isanamu, PA Media
Yabaye umukozi uhoraho muri kiriya kiganiro kuva mu 2021, agikorana na Alex Jones uzwi cyane muri iki kiganiro cya televiziyo.
Jenas kandi akorera talkSport ya BBC kuri radio, kandi yari arimo asoma amakuru ubwo ayo makuru yasohokaga.
Iyi ‘station’ ivuga ko yamenyeshejwe ko yirukanywe ikiganiro cyatangiye – ariko bafata icyemezo “hamwe na Jermaine ko yakomeza akavuga amakuru”.
Jermaine akorera kandi itsinda ry’amasheni ya televiziyo yishyurwa rizwi nka TNT Sports.
Ku wa kane nijoro umwirondoro we wahise uvanwa ku rubuga (website) rw’abashinzwe kumushakira akazi (agent).
Football n’itangazamakuru
Jenas yatangiye gukina nk’uwabigize umwuga ku myaka 17, akinira ikipe y’iwabo ya Nottingham Forest, nyuma Tottenham Hotspur na Newcastle United.
Yakiniye kandi ikipe y’igihugu y’Ubwongereza imikino igera kuri 21.
Yasezeye kuri ruhago mu 2016 afite imyaka 32, nubwo yaherukaga gukina mu 2014.
Jenas yahise yinjira mu itangazamakuru akora nk’umusesenguzi mu gihe yari arimo gukira imvune y’ivi, maze aza kuba uboneka buri gihe mu kiganiro Match of the Day, hamwe na BT Sport.
Kuva mu 2020 yatangiye kuyobora nk’umusigire ikiganiro The One Show, nyuma yo kugenda kwa Matt Baker wakiyoboraga.
Byari biherutse gutangazwa ko guhera muri Mata(4) umwaka utaha azatangira kuyobora iki kiganiro afatanyije na Jones, ndetse yari yatangaje ko “yiteze cyane kuyobora iki kiganiro bihoraho”.
