Intambara yo muri Ukraine: Amerika yahaye Kyiv amasasu imiriyoni 1.1 yatse Irani
Ahavuye isanamu, Reuters
- Umwanditsi, Na Christy Cooney
- Igikorwa, BBC News
- Yatangajwe
Igisirikare ca Reta Zunze Ubumwe za Amerika kivuga ko carungikiye Ukraine amasasu imiriyoni 1.1 catse Irani mu mwaka uheze.
Ingabo za Amerika zihagarariye ibikorwa vya gisirikare mu burasirazuba bwo hagati (Centcom), zivuga ko aya masasu yafatiwe mu bwato bwari bufise ibiburanga vya Yemen muri Kigarama (12).
Ibihugu vy’incuti za Ukraine vy’Uburengero biherutse kugabisha ko bifise ingorane zo kujana n’urugero rwa Ukraine rw’ukungene ikoresha amasasu.
Centcom ivuga ko aya masasu ya Irani yarungitswe muri Ukraine ku wa mbere.
Aya masasu yabanje gufatwa n’ingabo za Amerika zirwanira mu mazi ziyatse ubwato bwitwa MARWAN 1, hari ku wa 9 Kigarama 2022, nk’uko Centcom ibivuga.
Reta ya Amerika yihagiye ano masasu mu kw’indwi uno mwaka mu kizwi nka confiscation civil/civil forfeiture, aho amatungo ashobora gufatwa iyo bibonetse ko nyeneyo afise uruhara mu bukozi bw’ikibi.
Muri iyi dosiye, igisata c’igisirikare ca Irani gihagarariye intwaro ya ki-Islam, Islamic Revolutionary Guard Corps, nico citwariwe.
Mw’itangazo, ivuga ko Amerika “yiyemeje gukorana n’incuti zacu mu kuzibira ikwirakwizwa ry’imfashanyo y’ubwicanyi mu karere, ikoresheje uburyo bwose bwemewe n’amategeko”.
Irani ishigikiye inyeshamba z’aba-Houthi mu ntambara ibandanya muri Yemen, ariko icemezo co mu 2015 c’Inama nkuru ya ONU ijejwe umutekano kw’isi carabujije ko uwo muhari usubira kurungikirwa ibirwanisho.
Intambara yo hagati mu gihugu muri Yemen yadutse mu 2014 igihe izi nyeshamba z’aba-Houthis zigarurira umugwa mukuru Sanaa zigasenyura reta y’iki gihugu.
Reta yatembagajwe ni bwo butegetsi bwa Yemen bwemewe n’amakungu, ikaba ifashwe mu mugongo n’ihuriro ry’ibihugu vy’akarere birongowe na Arabia Sawudite, hamwe kandi na Amerika be n’Ubwongereza.
Kuva mu gice ca kabiri c’umwaka uheze, Irani yaragirijwe kenshi ko irungikira Uburusiya ibirwanisho, cane cane za ndege zitagira abadereva (drone), vyo gukoresha mu ntambara yabwo muri Ukraine.
Ku wa mbere, mu biganiro vy’ishirahamwe ryo kwivunira umwansi hamwe rya OTAN/NATO ku bijanye n’imfashanyo y’amasasu Uburengero buha Ukraine, Amirali Rob Bauer arongoye igisirikare c’iri huriro yavuze ko “ubukene ubu bwibonekeza”.
Umunyamabanga wa leta y’Ubwongereza ajejwe kwivuna abansi James Heappey yasavye ibihugu bihurikiye muri OTAN gushira 2% vy’ubutunzi bwavyo mu gisata co kwivuna abansi, intego yemejwe n’iri huriro ryose ariko bikaba vyitezwe ko mu mpera z’uno mwaka ibihugu 11 vyonyene muri 31 birigize ari vyo bizoba vyayubahirije.
