US: Aba-Marines batanu baburiwe irengero inyuma y’aho kajugujugu yabo ikorokeye mu misozi

Abasirikare batanu bo mu gisirikare ca Amerika baburiwe irengero inyuma y’aho kajugujugu yabo ikorokeye mu misozi yuzuye ibarafu mu ntara ya California.

Iyi kajugujugu CH-53E Super Stallion yatowe ku birometero hafi 75 kuva aho yategerezwa kuja inyuma y’aho bitangarijwe ko abari muri yo bacerewe.

Ariko amaherezo y’aba basirikare batanu bari muri yo ntaramenyekana.

Bari mu myimenyerezo yo kuguruka ku kigo c’igisirikare ca Marine Corps (ishami rya gisirikare ry’ingabo zirwanira mu mazi, mu kirere no ku butaka) gikoresha indege kiri i Miramar, hafi y’igisagara ca San Diego, ejo ku wa gatatu.

Iri shami Marine Corps ry’igisirikare ca Amerika rivuga ko izi ngabo zariko ziva i Las Vegas (ni mu ntara ya Nevada) zitera zija i Miramar.

Zegukira igisata c’iri shami rya gisirikare gikoresha kajugujugu ziremereye, Marine Heavy Helicopter Squadron 361, cegukira ishami rya gatatu rya Marine Aircraft Wing.

Abajejwe kuzimya imiriro y’ivyaduka bagiye gutabazwa isaha umunani z’ijoro n’iminota 20 (02h20) ejo ku wa gatatu, ni ukuvuga isaha zitandatu n’iminota 20 (12h20) mu masaha ya Gitega na Kigali.

Haciye harungikwa abaja kuraba ivy’ari vyo mu karere kari hafi y’ikiyaga Morena muri California, bakaba bagiye kubona ino ndege haciye amasaha makeya mu karere kitwa Pine Valley kari mu misozi ya Cuyamaca.

Ibikorwa vyo kurondera ino ndege vyarazingamitswe n’ibarafu be n’ikirere kibi c’urushana muri ako karere, nk’uko abategetsi babivuga. Iri sanganya ribaye inyuma y’igihuhusi co muri uru rushana catumye hagwa imvura y’umurengera n’ibarafu y’itimbatimba ipima amasentimetero atari make mu turere tw’imisozi.

Iyi kajugujugu CH-53E Super Stallion, yatanguye gukoreshwa ubwa mbere mu 1981, ifatwa nk’inkingi y’ingendo z’indege za Marine Corps ikaba isanzwe ikoreshwa mu kwunguruza ingabo. Ishobora gutwara abantu bashika kuri 37.

Hampande yo kwunguruza ingabo, iyi kajugujugu – isanzwe kandi ikoreshwa n’ibisirikare vya Amerika n’Ubuyapani birwanira mu mazi – ishobora no gukoreshwa mu ntambara no mu kwunguruza ibikoresho.

Iyi ndege Super Stallion ya Marine Corps izwi ko ikunze kugira ibibazo. Muri ino myaka ya vuga, yagiye igira amasanganya akomeye atari make.

Mu kwa kane 2018, abasirikare bane barishwe igihe iyi kajugujugu Super Stallion yabo yakorokera hafi ya El Centro muri California nyene iri mu myimenyerezo.

Mu rindi sanganya ryari ryabaye mu kwa mbere 2016, aba-marine 12 barishwe igihe kajugujugu zibiri za Super Stallion zagonganira hejuru y’ibahari Pasifike hafi ya Oahu mu mazinga ya Hawaii.

Iri si ryo sanganya rya mbere ribereye muri iyi misozi ya California muri iyi misi ya vuba.

Muri Myandagaro (8), umudereva wa Marine Corps yarishwe igihe indege yiwe F/A-18 Hornet yakorokera mu karere nako nyene kari hafi y’ikigo c’indege ca Marine Corps 9 Marine Corps Air Station) i Miramar.