Rwanda: Batatu bo mu kigo cy'amabuye y'agaciro batawe muri yombi bashinjwa ruswa no kwigwizaho umutungo

Urwego rw'ubugenzacyaha mu Rwanda (RIB) rwataye muri yombi abayobozi batatu bo hejuru bo mu kigo cy'igihugu gishinzwe mine (amabuye y'agaciro), gaze na peteroli (RMB) na ba rwiyemezamirimo bane, bose bacyekwaho ibyaha birimo na ruswa.

RIB yatangaje ko abo bo mu kigo RMB ari Augustin Rwomushana, umukuru w'ishami rishinzwe isoko ry'amabuye y'agaciro, ishoramari n'igenamigambi, John Kanyangira, umukuru w'ishami rishinzwe kugenzura inkomoko y'amabuye y'agaciro n'aho yoherezwa, na Richard Niyongabo ukuriye ishami rishinzwe kubika amakuru yo mu ikoranabuhanga ajyanye n'amabuye y'agaciro ari mu gihugu.

RIB yavuze ko abo bafunganywe na ba rwiyemezamirimo bane itatangaje amazina "bakekwaho kuba abafatanyacyaha mu byaha bakurikiranyweho".

Uko ari barindwi bafungiye muri stasiyo za RIB za Rwezamenyo na Nyarugenge mu mujyi wa Kigali, nkuko RIB yabivuze mu itangazo yasohoye ku wa gatandatu.

RIB ivuga ko bakurikiranyweho ibyaha birimo ruswa, gukoresha ububasha bahabwa n'itegeko mu nyungu zabo bwite, kwigwizaho umutungo n'iyezandonke (amafaranga afite inkomoko mu cyaha).

Ikigo RMB kimaze igihe kiri mu bibazo kubera ibirego byuko gikura amabuye y'agaciro ya magendu mu burasirazuba bwa Repubulika ya Demokarasi ya Congo. U Rwanda rwahakanye gufasha inyeshyamba za M23 rugamije kugera ku mabuye y'agaciro ya Congo.

Ntituramenya niba aba batawe muri yombi hari isano bafitanye n'uruhare u Rwanda rushinjwa kugira muri DRC.

Umukuru w'ikigo RMB, Francis Kamanzi, ntiyatangajwe mu batawe muri yombi. Mu kwezi gushize, yahanwe n'umuryango w'Ubumwe bw'Uburayi, umushinja kungukira mu ntambara yo mu burasirazuba bwa Congo "binyuze mu bucukuzi n'ubucuruzi bunyuranyije n'amategeko by'umutungo kamere - ni ukuvuga amabuye y'agaciro yo mu ntambara".

Nta cyo yigeze atangaza ku mugaragaro kuri ibyo birego.