Putin yahuye n'uwahoze ari komanda wa Wagner Troshev

Perezida w'Uburusiya Vladimir Putin yahuye n'umwe mu bahoze ari ba komanda bo ku rwego rwo hejuru b'itsinda Wagner ry'abacanshuro b'Abarusiya, ibiro bya Perezida w'Uburusiya (Kremlin) bivuga ko asigaye akora muri minisiteri y'ingabo.

Andrei Troshev yahoze ari umujyanama w'uwari umukuru wa Wagner, Yevgeny Prigozhin, wapfuye ubwo indege yari arimo yahanukaga mu kwezi kwa Kanama (8) uyu mwaka.

Urupfu rwe rwabaye hashize amezi abiri abasirikare ba Wagner bigometse bagakora urugendo rw'igihe gito rwerekeza ku murwa mukuru Moscow.

Kremlin yavuze ko Perezida Putin yasabye Troshev kugenzura amatsinda y'abarwanyi b'abakorerabushake muri Ukraine.

Ubwo yavuganaga na Troshev, Perezida Putin yavuze ko Troshev ashobora "gutanga amatsinda y'abakorerabushake ashobora gukora imirimo itandukanye yo kurwana, [ariko] hejuru ya byose, birumvikana, mu karere k'igikorwa cya gisirikare cyihariye", akomoza kuri uko kuntu Uburusiya bwita igitero gisesuye bwagabye kuri Ukraine kuva mu kwezi kwa Gashyantare (2) mu 2022.

Putin yongeyeho ati: "Urabizi ibibazo bicyeneye gucyemurwa mbere na mbere kugira ngo umurimo wo kurwana ugende neza cyane kandi mu buryo butanga umusaruro cyane."

Umuvugizi wa Kremlin, Dmitry Peskov, yabwiye ibiro ntaramakuru RIA bya leta y'Uburusiya ko Troshev "ubu akora muri minisiteri y'ingabo".

Iyi nama ya Putin na Troshev ibaye mu gihe uyu Perezida w'Uburusiya arimo kugerageza kongera gushimangira ububasha bwe nyuma yo kwigomeka kwa Wagner kwo mu kwezi kwa Kamena (6) uyu mwaka.

Icyo gihe, mu masaha 24, Prigozhin yarigometse, yohereza abasirikare be bavuye mu mujyi wa Rostov wo mu majyepfo, bakomeza berekeza i Moscow, baza gusubira inyuma. Kwari kwo guhangara bikomeye ubutegetsi bwa Putin kwa mbere kubayeho mu myaka 20 ishize.

Mu kwezi gushize, Perezida Putin yasabye abakozi bose ba Wagner n'abandi Barusiya bakora ibiraka bya gisirikare bitari ibya leta kurahira ko bayobotse leta y'Uburusiya.

Troshev azwi ku izina ry'akabyiniriro rya Sedoi, rivuze "ufite umusatsi w'imvi". Ni umugabo w'imyaka 61 wubashywe cyane warwanye mu ntambara z'Uburusiya muri Afghanistan no muri Chechnya.

Yahawe Igihembo cy'Intwari y'Uburusiya kubera uruhare rwe mu gufasha ingabo za leta ya Syria mu 2015 no mu 2016 nka komanda wa Wagner.

Prigozhin n'abandi bantu icyenda bapfiriye mu ihanuka ry'indege hafi y'i Moscow, ku itariki ya 23 Kanama.

Nyuma yuko kwigomeka kwapfubye, benshi bari bavuze ko uwo wari umukuru wa Wagner yari asigaye ari "umupfu wigendera".

Kremlin yahakanye kugira uruhare urwo ari rwo rwose mu ihanuka ry'iyo ndege.