Kyiv yagabweho igitero cya misile cy''ubukana bwihariye'
Ahavuye isanamu, Reuters
- Umwanditsi, Hugo Bachega i Kyiv & Kathryn Armstrong i London
- Igikorwa, BBC News
- Yatangajwe
Umurwa mukuru Kyiv wa Ukraine wibasiwe n'ikindi gitero cy'Uburusiya cyo mu kirere, umutegetsi umwe yavuze ko "cyihariye mu bukana bwacyo".
Ukraine yavuze ko misile 18 zose hamwe zarashwe n'Uburusiya yazihanuye, ndetse amashusho yagaragaje ubwirinzi bw'ikirere bushwanyaguza ibisasu hejuru y'uwo mujyi.
Ariko Uburusiya bwavuze ko igitero cyabwo cyarashe ku byo bwashakaga kurasaho byose.
Abategetsi bo muri Ukraine bavuze ko abantu nibura batatu bakomerekejwe n'ibyo bisasu bya misile n'iby'indege nto zitarimo abapilote zizwi nka drone.
Ubutumwa bwatanzwe na leta ya Ukraine bwaburiye abantu kwirinda kwegera amadirishya ubwo ibisigazwa biva kuri misile zahanuwe byagwaga biva mu kirere.
Mu byumweru bya vuba aha bishize, Uburusiya bwongereye ibitero byo mu kirere, mbere yuko Ukraine igaba igitero mu majyepfo kimaze igihe cyitezwe.
Intabaza iburira ku bitero byo mu kirere yavugijwe saa munani n'iminota 30 z'ijoro (02:30) ku isaha yaho, ihagarikwa hashize amasaha abiri, muri iki gitero cya munani kigabwe kuri Kyiv muri uku kwezi.
Umubare munini cyane mu buryo budasanzwe w'ibiturika byumvikanye rwagati mu mujyi, mu gihe abategetsi bakoreshaga ubutumwa bwo ku mbuga za internet mu kubwira abaturage ko ubwirinzi bw'ikirere bwatangiye gukora.
Umukuru w'ingabo za Ukraine, Jenerali Valerii Zaluzhny, yavuze ko Uburusiya bwateye Kyiv buyiturutse mu majyaruguru, mu majyepfo no mu burasirazuba.
Yavuze ko misile 18 zo mu kirere, mu nyanja no ku butaka ari zo zakoreshejwe muri icyo gitero.
Umukuru w'umujyi wa Kyiv, Vitali Klitschko, yavuze ko bimwe mu bisigazwa byavuye ku bisasu byaguye mu turere two rwagati muri uwo mujyi, harimo no mu nzu yororerwamo inyamaswa. Nta nyamaswa cyangwa abakozi baho bakomeretse.
Umutegetsi w'i Kyiv yavuze ko iki gitero cy'urusobe "cyihariye mu bukana bwacyo".
Jenerali Serhiy Popko, umukuru w'ubutegetsi bwa gisirikare i Kyiv, yavuze ko ibi bisasu byinshi kandi birashwe mu buryo bwihuse ari byo "byinshi cyane bibayeho by'igitero cya za misile kigabwe mu gihe gito cyane".
Yongeyeho ati: "Amakuru y'ibanze avuga ko byinshi mu bintu by'umwanzi byo mu kirere cya Kyiv byatahuwe birasenywa".
Ahavuye isanamu, State Emergency Service of Ukraine
Mu minsi micyeya ishize, Perezida wa Ukraine Volodymyr Zelensky yakoreye inzinduko i Burayi, aho inshuti zo mu burengerazuba bw'isi zamusezeranyije imfashanyo y'ibikoresho bya gisirikare ifite agaciro ka za miliyari nyinshi z'amadolari y'Amerika.
Mu bategetsi bamusezeranyije iyo mfashanyo, harimo nka Minisitiri w'intebe w'Ubwongereza Rishi Sunak na Perezida w'Ubufaransa Emmanuel Macron.
Kuva Uburusiya bwagaba igitero kuri Ukraine ku itariki ya 24 Gashyantare (2) mu 2022, abasivile n'abarwanyi bose hamwe babarirwa mu bihumbi barishwe cyangwa barakomereka, imijyi irasenyuka kubera imirwano, ndetse Abanya-Ukraine miliyoni hafi 8.2 biyandikishije nk'impunzi i Burayi, muri bo abagera kuri miliyoni 2.8 bakaba bari mu Burusiya.
