Ayavugwa mu ntambara yo muri Ukraine: Uburusiya butangaza ko bwasambuye amadrone 27

Ubushikiranganji bw’Uburusiya bujejwe kwivuna abansi butangaza ko mw’ijoro ryakeye ubuhinga bwo kwivuna ibitero vyo mu kirere bwakororeye ica rimwe indege 27 za Ukraine zitagira abadereva (drone), 20 muri zo “zasamburiwe mu kirere”. Iki ni igitigiri kinini ugereranije n’ibitigiri bisanzwe bitangazwa n’Uburusiya.

Hagati aho, ubu butumwa bugufi bushikirizwa n’ubu bushikiranganji ntibuvuga ingene vyagenze ku zindi indwi zisigaye.

Muri izi 20 zasamburiwe mu kirere, 18 zakubitiwe mu kirere c’intara ya Kursk, izindi zibiri nazo zisamburirwa mu kirere c’intara ya Belgorod.

Imbere y’aha, buramatari wa Kursk Roman Starovoyt yari yatangaje ko amadrone 12 yari yasamburiwe hafi y’umugwa mukuru w’iyi ntara, Kursk, ibisigarira bikaba vyaguye mu micungararo y’iki gisagara no mu kigwati ca Zorino.

Buramatari wa Belgorod wewe, Vyacheslav Gladkov, ntaco yatangaje ku rubuga rwiwe rwa Telegram mw’ijoro.

Uruhande rwa Ukraine ntaco ruratangaza kuri ano makuru y’ibitero vy’amadrone ivugwa ko yakoze. BBC ntiyashoze ishobora guhinyuza ano makuru atangazwa n’ubutegetsi.

Umwansi ntagahengwe atanga mu kurondera kumenera mu karere ka Avdeevka- Igisirikare ca Ukraine

Mu cegeranyo co muri kano gatondo ko ku wa Mungu, ibiro bikuru vy’igisirikare ca Ukraine bitangaza ko ingabo za Ukraine ziriko zirasubiza inyuma ibitero vy’igisirikare c’Uburusiya mu karere ka Avdeevka hafi ya Donetsk, akarere kabaye intego nyamukuru y’ibitero vy’Uburusiya muri ino ndwi.

“Umwansi arabandanya agerageza kumenera mu birindiro vyacu, ariko bikaba ivy’ubusa. Ingabo zacu zicungereye akarere zasubije inyuma ibitero 15 mu turere twa Avdeevka, Tonenkoye na Pervomaiskoye muri Donetsk”, niko inkuru y’ikinyamakuru "Ukrainian Truth" ivuga isubiramwo itangazo ry’ibiro bikuru vya gisirikare.

“Ingabo za Ukraine zirabandanya ibikorwa vyo kurwanya umwansi mu buseruko no mu bumanuko bwa Ukraine, igikorwa co kurwanya umwansi amaja muri Melitopol, hamwe n’ibindi bibandanya amaja muri Bakhmut, gusambura umwansi, tubohoza buke buke uturere yigaruriye, twongera dutsimbataza umutekano mu turere twabohoje”

Igisirikare ca Ukraine kivuga kandi ko kibandanya kibuza umwansi gutera intambwe hafi ya Liman, harimwo n’akarere ka Makeevka. Kivuga kandi ko ingabo zaco zibandanya gusugereza umwansi hafi ya Bakhmut, nk’uko biri muri ico cegeranyo.

Ingabo za Ukraine zivuga ko ku musi w’ejo wose habaye ugutana mu mitwe incuro 60 ku rwasiro.

Wall Street Journal: Uburengero bwiteze ko igisirikare ca Ukraine kizotera intambwe mu 2024

Ikinyamakuru Wall Street Journal gisubiramwo ibitangazwa n’ibihugu vy’Uburengero bivuga ko ubu biriko biregeranya uburyo kugira ngo biandanye bifata mu mugongo Ukraine. Ibi biriko bikorwa mu ntumbero yo gufasha igisirikare ca Ukraine kugira gishobore kuba cashitse ku ntambwe iboneka mu ci ryo mu mwaka uza wa 2024.

Iki kinyamakuru kivuga ko muri ico gihe Kyiv izoshobora kuba ihagaze neza ari nka hamwe hoba ibiganiro na Moscou.

Amasoko ava mu Burengero asubirwamwo n’iki kinyamakuru avuga ko igitero ca Ukraine co kwivuna umwansi kitashoboye gushika ku ntego abanyaporitike ba Ukraine n’incuti zayo bari biteze.

Mu mezi 12 aheze, yaba igisirikare ca Ukraine canke igisirikare c’Uburusiya, nta ruhande na rumwe rwashoboye gutera intambwe ziboneka. Hagati aho, ukutumvikana hagati y’abanyaporitike ba Reta Zunze Ubumwe za Amerika kwatumye benshi bibaza nimba Washington izobandanya ifasha Kyiv ku rugero iriko.

Iki kinyamakuru candika ko Perezida Vladimir Putin w’Uburusiya ata mpamvu abona z’ukwiyumvira ko akwiye gutangura ibiganiro vy’amahoro. Moscou itegura gushira amafaranga menshi mu gisata ca gisirikare mu mwaka uza, ibi bigashimangira ibivugwa vy’uko Kremlin iriko yitegurira intambara y’igihe kirekire.