Ayavugwa mw’igura n’igurishwa ry’abakinyi: Liverpool na Real Madrid zirarwanira Mbappé

Liverpool na Real Madrid zompi zirarondera umusatirizi wa Paris St-Germain Umufaransa Kylian Mbappé w’imyaka 25, mu gihe amasezerano yiwe azorangira mu mpera z’uno mwaka w’inkino, akaba afise uburenganzira bwo kwimukira mu wundi murwi muri uku kwa mbere. (Le Parisian)

Paris St-Germain iri imbere mu mirwi irondera Umwongereza Kalvin Phillips w’imyaka 27, akina hagati muri Manchester City muri uku kwa mbere. (Telegraph)

Manchester United na Liverpool ni yo mirwi iri imbere mu yiriko irondera Umudagi Joshua Kimmich w’imyaka 28 akina hagati muri Bayern Munich mu gihe amasezerano yiwe azoba arangiye mu mpera z’uno mwaka w’inkino. (AS)

Liverpool na Tottenham ziriko zirihweza ingene mu ci zoronka umusatirizi wa Wolves umunya-Korea y’Epfo Hwang Hee-Chan w’imyaka 27. (Football Insider)

West Ham yegereye Tottenham iyisaba ko yoyiha Umwongereza akina inyuma Eric Dier atariko arakinishwa kuva umumenyereza w’aba Spurs Ange Postecoglou ashitse. (Football Transfers)

Manchester City iri mu gifyo c’imirwi iriko irakurikiranira hagufi umukinyi w’inyuma Leny Yoro w’imyaka 18, ariko Lille ikaba imushakako nibura imiriyoni 78 z’amapawundi. (Le 10 Sport iciye kuri Manchester Evening News)

Umukinyi wo ku ruhande wa Maroc Hakim Ziyech w’imyaka 30 ashobora gusubira muri Chelsea muri uku kwa mbere mu gihe Galatasaray itegura guhagarika amasezerano y’intizo ifitaniye na we yategerezwa kumara uno mwaka wose w’inkino. (NTV Spor)

Liverpool iriko irakurikiranira hagufi umunya-Danemark Morten Frendrup w’imyaka 22 akinira Genoa, ariko bisa n’ibidakunda ko ishobora kumuronka muri uku kwa mbere. (Liverpool Echo)

Nottingham Forest yatanguye ibiganiro na Paris St-Germain mu kurondera umunyegori wayo, umunya Costa Rica Keylor Navas w’imyaka 37 yamaze igice ca kabiri c’umwaka w’inkino uheze muri uyo murwi wo mu Bwongereza. (Football Insider)

Newcastle United iripfuza umukinyi w’inyuma wa Chelsea umunya-Brezili Andrey Santos w’imyaka 19, mu gihe amasezerano yiwe y’intizo muri Nottingham Forest yiteze kurangira muri uku kwezi. (Ben Jacobs iciye kuri Football 365)

Umukinyi wo ku ruhande wa Burnley Manuel Benson w’imyaka 26 ari mu biganiro na Hull City inyuma y’uko ino mirwi yompi yemeranije ku munwa ku masezerano y’intizo gushika mu mpera z’uno mwaka w’inkino. (Hull Daily Mail)

Fulham yafashe ingingo yo kwongereza ikiringo c’umwaka umwe mu masezerano ifitaniye na kizigenza wayo, umunya-Ecosse Tom Cairney w’imyaka 32, inyuma y’aho mu misi iheze abonetse ko yavyitwayemwo neza. (Sun)

Chelsea yatanguye urugamba rwo kurondera kugura umukinyi w’inyuma wa Nice, Umufaransa Jean-Clair Todibo w’imyaka 24 asanzwe aronderwa kandi na Manchester United hamwe na Tottenham. (Teamtalk)

Chelsea iripfuza Umudagi David Odogu w’imyaka 17 akina inyuma muri Wolfsburg atarigera akinishwa mu rukino na rumwe mw’ihiganwa ry’Ubudagi Bundesliga mu rwego rw’abakuze, akaba kandi arabwa yiza na Leicester City. (Sun)

Umunya-Mexique Carlos Vela w’imyaka 34 yahoze ari umusatirizi wa Arsenal ashobora gusubira muri Real Sociedad mu masezerano y’igihe gito, inyuma y’aho ayo yari asanzwe afitaniye na Los Angeles FC yo muri Amerika arangiriye. (AS Diario)