Menya uwahoze atwara ubwato bw'intambara bw'Uburusiya wishwe arashwe ari muri siporo yo kwiruka

Uwahoze atwara ubwato bw'Uburusiya burwanira munsi y'inyanja ubu wakoraga nk'ushinzwe ubukangurambaga, yishwe arashwe ubwo yari ari muri siporo yo kwiruka mu mujyi wa Krasnodar mu majyepfo y'Uburusiya.

Ibitangazamakuru byinshi byo mu Burusiya byahwihwishije ko Stanislav Rzhitsky, wari ufite imyaka 42, ashobora kuba yakurikiranywe hifashishijwe umwirondoro we wo kuri 'app' yitwa Strava ikoreshwa n'abari muri siporo.

Abakora iperereza bo mu Burusiya bavuga ko bataye muri yombi umugabo bijyanye n'ubwo bwicanyi.

Uwo ucyekwa yatangajwe ko ari Serhiy Denysenko, wavukiye mu mujyi wa Sumy wo muri Ukraine mu mwaka wa 1959.

Shene (channels) nyinshi zo ku rubuga rwa Telegram zo mu Burusiya zatangaje ko Denysenko yahoze ari umukuru w'ishyirahamwe ry'umukino wa karate rya Ukraine.

Akanama k'amaperereza kanatangaje videwo ivugwa ko igaragaza uko kumuta muri yombi, ariko mu maso h'umugabo uyigaragaramo hataboneka neza, bituma bigorana kugenzura umwirondoro w'uwo muntu.

Ako kanama nyuma katangaje amashusho ya za 'cameras' z'umutekano (CCTV) bivugwa ko agaragaza Capt Rzhitsky arimo kwiruka mu gitondo cyo ku wa kabiri, akurikiwe n'umugabo uri ku igare.

Uwo wahoze mu ngabo zirwanira mu mazi yarashwe mu mugongo no mu gatuza ari ahantu h'ubusitani bwo kuruhukiramo hafi y'ikigo cy'imikino cya Olimp, nkuko byatangajwe n'ikinyamakuru Kommersant cyo mu Burusiya.

Baza, shene yo mu Burusiya yo ku rubuga rwa Telegram ikorana bya hafi na polisi, yatangaje ko uwishe Capt Rzhitsky ashobora kuba yakurikiranye kwiruka kwe kuri 'app' ya Strava kuko buri gihe yakoreshaga inzira imwe iyo yabaga arimo kwiruka.

Isesengura ry'umwirondoro (profile) wa Capt Rzhitsky ryakozwe n'ishami BBC Verify - umwirondo uboneka kuri buri wese (public) - rigaragaza ko akenshi yirukaga anyuze muri ako gace byatangajwe ko yiciwemo. Isesengura ryo mu maso ryakozwe na BBC ryemeje ko uwo mwirondoro ari uwa Capt Rzhitsky.

Yitwaga 'umwanzi wa Ukraine'

Aho abarizwa (aderesi) hamwe n'amakuru yihariye kuri we, na byo byari byarashyizwe ku rubuga Myrotvorets (bivuze utanga amahoro) rwo muri Ukraine. Urwo ni urubuga rutari urwa leta ruriho ububiko bw'amakuru (database) y'abantu bafatwa nk'abanzi ba Ukraine.

Ijambo "yishwe", ryanditse mu nyuguti z'ibara ritukura, ubu ryageretswe ku ifoto ye iri kuri urwo rubuga.

Mu itangazo, ubutasi bwa gisirikare bwa Ukraine bwavuze ko ubusitani bwo kuruhukiramo nta muntu wari uburimo kubera imvura nyinshi yagwaga, "rero nta babibonye bahari bashoboraga gutanga amakuru cyangwa kumenya umwirondo w'uwagabye igitero".

Anton Gerashchenko, umujyanama muri minisiteri y'ubutegetsi bw'igihugu ya Ukraine, yatangaje kuri Twitter ko ibitangazamakuru byo mu Burusiya birimo gushinja Ukraine kugira uruhare muri ubwo bwicanyi, ariko ntiyavuze niba uko kuyicyeka bifite ishingiro.

Isaha ya Capt Rzhitsky hamwe n'ibikoresho byo kumva (écouteurs/headphones) bye byasanzwe aho byabereye, bigaragaza ko kwiba atari byo byari bigamijwe, nkuko byatangajwe n'igitangazamakuru Mash cyo mu Burusiya.

Amakuru avuga ko yahoze ari komanda w'ubwato Krasnodar burwanira munsi y'inyanja, bwitiriwe uwo mujyi, bwo mu gisirikare cy'Uburusiya kirwanira mu mazi.

Ibitangazamakuru byo muri Ukraine byavuze ko ashobora kuba ari we wari uyoboye ubwo bwato ubwo bwagabaga igitero cya misile ku mujyi wa Vinnytsia wo muri Ukraine mu kwezi kwa Nyakanga (7) mu 2022, cyishe abantu 28, barimo n'abana batatu.

Leta ya Ukraine yavuze ko icyo gitero cyavuye ku bisasu bya misile zizwi nka 'Kalibr cruise missiles', byarasiwe mu bwato bwagendaga munsi y'inyanja y'umukara (Black Sea).

Ariko shene Baza, ya yindi yo mu Burusiya yo ku rubuga rwa Telegram, yasubiyemo amagambo ya se wa Capt Rzhitsky avuga ko umuhungu we yeguye mu gisirikare cy'Uburusiya mu kwezi kw'Ukuboza (12) mu 2021 - mbere y'igitero gisesuye cy'Uburusiya kuri Ukraine.

Nyuma yaho yabaye umuyobozi wungirije ushinzwe ubukangurambaga mu karere ka Krasnodar.

(Amakuru y'inyongera kuri iyi nkuru yatawe na Olga Robinson)