Niger: Perezida wahiritswe agiye kuregwa ubugambanyi – Agatsiko ka gisirikare

Agatsiko ka gisirikare kafashe ubutegetsi muri Niger katangaje gahunda yo kuburanisha Perezida kahiritse Mohamed Bazoum kamushinja "ubugambanyi bwo ku rwego rwo hejuru" no "kubangamira umutekano w'igihugu".

Ni nyuma yuko ku itariki ya 26 y'ukwezi gushize kwa Nyakanga (7), abo basirikare bahiritse guverinoma ye yatowe muri demokarasi.

Mu itangazo ryasomwe kuri televiziyo y'igihugu, umuvugizi wa gisirikare Koloneli-Majoro (Col-Maj) Amadou Abdramane yavuze ko bamaze igihe bakusanya ibimenyetso kuri Perezida bahiritse, no ku bo bise "ibyitso byo mu gihugu no mu mahanga" bye.

Kuva yahirikwa ku butegetsi, Bazoum, w'imyaka 63, n'umuryango we, bafungiye mu cyumba cyo hasi cy'inyubako ye ya perezida mu murwa mukuru Niamey.

Amagerageza yabayeho yo gucyemura iki kibazo mu nzira y'ibiganiro n'umuryango w'ubukungu w'ibihugu byo muri Afurika y'uburengerazuba (CEDEAO/ECOWAS), kugeza ubu nta cyo yari yageraho.

Iri tangazo rishya riratunguranye kuko ritangajwe hashize amasaha ako gatsiko ka gisirikare kavuze ko gafite ubushake bwo kunyura mu nzira ya diplomasi mu kugerageza gucyemura ikibazo kiri mu gihugu.

Ku cyumweru gishize, umukuru w'intumwa z'abahuza bo mu madani yavuze ko umukuru w'ako gatsiko, Jenerali Abdourahamane Tchiani, yiteguye kwiga ku gisubizo kinyuze muri diplomasi (ibiganiro) na CEDEAO.

Mu itangazo, Sheikh Abdullahi Bala Lau, umukuru w'umuryango wa kisilamu wa Izala Salafist Movement wo muri Nigeria, yavuze ko Gen Tchiani yavuze ko "imiryango yabo ifunguye ku kwiga kuri diplomasi n'amahoro mu gucyemura ikibazo".

Iryo tangazo ryanavuze ko Gen Tchiani yasabye imbabazi ku kwanga kwakira intumwa za CEDEAO zagiye muri Niger mbere yaho.