Norvège yohereje mu Rwanda François Gasana alias 'Franky Dusabe' ukekwaho jenoside

Ubushinjacyaha bw'u Rwanda bwatangaje ko bwashyikirijwe na Norvège/Norway umunyarwanda François Gasana uzwi kandi nka Franky Dusabe ngo aburanishwe n'inkiko zo mu Rwanda ku byaha bya jenoside akekwaho.

Dusabe yari amaze imyaka itatu afungiye muri gereza y'i Oslo aho abanyamategeko be bageragezaga kubuza ko yoherezwa mu Rwanda.

Mu itangazo, ubushinjacyaha bw'u Rwanda buvuga ko mu 2007 Gasana yakatiwe n'urukiko Gacaca rw'i Nyange mu burengerazuba bw'u Rwanda gufungwa imyaka 19 rumuhamije uruhare muri jenoside.

'Franky Dusabe' yagejejwe mu Rwanda yambaye umupira wanditseho mu rurimi rwo muri Norway ngo "Kripos Sviktet Meg" bivuze ngo "Kripos yananiwe ikibazo cyanjye". Kripos muri icyo gihugu ni ijambo rikoreshwa mu kuvuga urwego rwa 'Kriminalpolitisentralen', urwego rwa leta yaho rukora iperereza ku byaha.

Gasana/ Dusabe, w'imyaka 52, kuva yatangira gukurikiranwa muri Norvège yahakanye ibyo akekwaho akavuga ko arengana.

Mu kwezi kwa Gashyantare(2) uyu mwaka nibwo Minisiteri y'ubutabera muri icyo gihugu yemeje umwanzuro w'inkiko ko ubujurire bwe bwo kubuza ko yoherezwa mu Rwanda budafite ishingiro, ko bityo agomba koherezwa mu gihugu akomokamo.

NRK, ikigo cy'itangazamakuru cya leta ya Norvége, kivuga ko umuryango we, by'umwihariko umugore we Mirsada Tankic bavuga ko abategetsi ba Norway batakoze iperereza ryuzuye ku kibazo cye, kandi bakavuga ko batizeye ko azabona ubutabera mu Rwanda.

Dusabe yatawe muri yombi mu Ukwakira(10) 2022 mu rugo rwe na Mirsada ruri mu mujyi wa Kristiansand mu majyepfo ya Norvège ku busabe bw'ubucamanza bw'u Rwanda, nk'uko NRK ibivuga.

Nyuma ya jenoside mu Rwanda, Gasana yahungiye i Burayi. Yari amaze imyaka 20 aba muri Norvège aho yakoraga nk'umushoferi wa 'bus' mbere y'uko afatwa agafungwa, nk'uko bivugwa na NRK.

Norvège yari imaze kohereza mu Rwanda abandi bantu baregwa jenoside nibura babiri mbere y'uyu.

Mu 2013, Norvège yabaye igihugu cya mbere cy'Iburayi cyohereje mu Rwanda umuntu ukekwaho jenoside ngo aburanishwe, Charles Bandora. Yaje gukatirwa gufungwa imyaka 30.