Ayagezweho ku ntambara ya Ukraine n’Uburusiya

Umukuru wa Duma, inama nshingamateka y’Uburusiya, Vyacheslav Volodin, asaba ko amatungo y’Abarusiya bataye igihugu bakaja kwifatanya na Ukraine afatwa.

Aciye ku rubuga rwa Telegram, Volodin  yandiste ati: “Mu gihe bari hanze, barapangishije amazu yabo bakabandanya begeranya amafaranga mu banyagihugu b’Uburusiya. Aho nyene, bagaca babandanya bacafuza Uburusiya, batyoza abasirikare bacu n’intwazangabo zacu.

“Bumva ko ari ba ntakorwako bibaza ko ubutungane budashobora kubashikira”.

Kubw’iwe, amajambo abo bimukira bashikiriza ku mugaragaro mu gushigikira Ukraine “ashobora gufatwa ko ari ugukokeza urwanko, guha impigi Abanazi canke guteza urubwa igisirikare”.

Volodin asaba ko ingingo z’igitabo c’amategeko mpanavyaha zijanye n’ibi zokwongerwamwo  umurongo uvuga ko amatungo yabo mu Burusiya akwiye gufatwa.

"Iri joro muri Soledar ryari rishushe " – icegera c’umushikiranganji wo kwivuna abansi wa Ukraine

Intambara irabandanya i Soledar, igisirikare ca Ukraine kiriko kigerageza kwihagararako, ibi bivugwa n’icegera c’umushikiranganj iwo kwivuna abansi wa Ukraine Anna Malyar.

Malyar  yanditse kuri Telegram ati: " Iri joro muri Soledar ryari rishushe, intambara zabandanije. Umwansi yashizemwo uburyo bwiwe bwose afise muri Donetsk kandi yakomeje umuriro”.

Soledar ni igisagara gitoya kiri mu buraruko bushira ubuseruko bwa Bakhmut mu ntara ya Donetsk, cari gisanzwe gituwemwo n’abantu 10.000 imbere y’intambara.

Niyo irangwamwo uruganda rwa Artyomsol, ishusho y’iki gisagara, rukaba ari rwo ruganda rwa mbere runini rwimbura umunyu mu karere ka Bulaya yo hagati n’iy’ubuseruko.

Uburusiya bushobora kuba bwarafashe Soledar, ariko ntibizotuma Bakhmut igotwa - ISW

Ikigo ca Amerika cigisha ivy’intambara, Institute for the Study of War (ISW), mu makuru cama gitanga ku kungene ibintu vyifashe ku rubuga rw’intambara muri Ukraine rwavuze ku ncuro ya mbere ko “ingabo z’Uburusiya zigenzura igice kinini ca Soledar, nimba atari yose, kandi zishobora kuba zirukanye ingabo za Ukraine mu micungararo y’uburengero bw’iki gisagara”.

Muri uwo mwanya nyene, abahinga b’iki kigo bemeza ko “ifatwa rya Soledar rishobora kuba ryabaye ku wa 11 Nzero (01) atari intambwe ikomeye cane ku rugamba – kandi si ukuvuga ko Uburusiya bwoba bwimirije kugota Bakhmut".

Icegeranyo ca ISW kivuga ko ejo k uwa kane, ibiro bikuru v’intwaramiheto za Ukraine vyavuze ko vyasubije inyuma ibitero vy’Uburusiya mu kigwati ca Sol, kiri hafi ku kirometero kimwe mu buraruko bushira uburengero bwa Soledar.

Hagati aho, mu bitandukanye no mu misi iheze, igisirikare ca Ukraine nticavuze ko cashoboye kwirukana igitero c’Uburusiya kuri Soledar yo ubwayo.

Ni mu gihe amakuru ava mu Barusiya avuga ko igisirikare c’Uburusiya kiriko kiraheraheza gukubura Soledar, mbere n’abanditsi bakoresha urubuga rwa Telegram basohoye amashusho yerekana abarwanyi ba wa murwi w’abacangero b’Abarusiya, Wagner, bariko barazunguruka mu mabarabara y’ico gisagara.

Abahinga ba ISW barangiza bavuga bati: "Ivyemezo vyose bihari vyerekana ko ingabo za Ukraine zitagishoboye kurwanira Soledar".

Hagati aho, aba bahinga bavuga ko “kubera amakuru atangwa n’Uburusiya, ikibanza baha Soledar harimwo ukurenza urugero”, bakavuga ko ifatwa ryayo ryabaye Uburusiya buhatakarije bikomeye.

Itangazo ryabo rivuga riti: "ISW ibandanya yemeza ko ifatwa rya Soledar – akarere gapima ibirometero kwadarato 14.2 – ritazotuma ingabo z’Uburusiya zigarurira imiyoboro ikomeye y’itumatumanako ishika muri Bakhmut – kandi ko ritazozishira mu kibanza ciza kugira ngo zice zishoka zigota iki gisagara”.

ISW  ivuga iti: "Ingabo z’Uburusiya zishobora kugerageza kubandanya ibitero bikomeye kuri Bakhmut, ariko ibi ntibizobatuma bashika ku kintu, kuko batakaje inguvu zo kurwana kandi zitakaza vyinshi”.

Uburusiya bwaramaze gutangaza ko Soledar yamaze gufatwa. Ariko, ejo ku wa kane, Kyiv na Pentagon ntibavyemeje.

Wagner iriko igerageza kurondera abarwanyi muri Serbia, Amerika ntiyiteze kuvyihanganira

Umuhanuzi mu biro vy’umunyamabanga wa reta ajejwe imigenderanire, Derek Chollet, avuga ko Washington iriko irakora ibishoboka vyose kugira ibuze umurwi w’abacangero b’Uburusiya, Wagner, gukorera muri Serbia no mu bindi bihugu irondera gukoreramwo, nk’uko vyandikwa n’ikinyamakuru Associated Press.

Ejo ku wa kane, Chollet yagiriraniye umubonano na Perezida Aleksandar Vucic wa Serbia ku mugwa mukuru Belgrade. 

Yabwiye abamenyeshamakuru ko muri uwo mubonano, yagarutse ku bikorwa vya Wagner, ikompanyi ya gisirikare yigenga irongowe n’umurwizatunga Yevgeny Prigozhin, ikaba ifise uruhara rudasanzwe mu ntambara yUburusiya kuri Ukraine.

Chollet  asubirwamwo na Associated Press avuga ati: “Turabona ko Wagner iriko iragerageza kurondera abasirikare muri Serbia no mu bindi bihugu.

“Sinzi ko Serbia yoba itewe impungenge n’ibi, ariko twashikirije amakenga yacu, kandi dushaka gutangura igikorwa dufatanije n’abategetsi ba Belgrade no mu bindi bihugu Wagner ikoreramwo kugira ngo duhagarike ibikorwa vyayo”.

Iki kinyamakuru kiravuga kandi ko “Wagner” ivuga ko ikorera muri Serbia – igihugu conyene ca Bulaya, havuyemwo Biélorussie, kitarafatira ibihano Uburusiya kubera intambara bwateje muri Ukraine.

Nk’uko abamenyeshamakuru babivuga, harigeze kuba amakuru yavuga ko Wagner yuguriye ikigo c’amakuru muri Serbia, ariko mu nyuma aya makuru akaba yarahakanywe.

Muri ino ndwi, ikinyamakuru wa Amerika, Politico, canditse ko Reta Zunze Ubumwe za Amerika  ziriko ziregeranya amakuru ajanye n’ibikorwa vy’abanywanyi ba Wagner mu bihugu nka Serbia, Mali na Centrafrique.

Nk’uko bivugwa kandi n’ikinyamakuru Bloomberg, Amerika iriko kandi iriga ingene yoshira Wagner ku rutonde rw’imihari y’iterabwoba.