Ukraine ivuga ko abantu 17 biciwe mu gitero cya 'drone' na misile cy'Uburusiya i Kyiv

Abategetsi bo muri Ukraine bavuga ko abantu nibura 17 barimo n'abana bane bishwe naho abandi babarirwa muri za mirongo barakomereka, mu gitero gikomeye Uburusiya bwagabye ku murwa mukuru Kyiv mu ijoro ryacyeye.

Tymur Tkachenko, umukuru w'ubutegetsi bwa gisirikare muri Kyiv, yavuze ko ahantu harenga 20 harashweho mu turere tunyuranye two mu murwa mukuru.

Perezida wa Ukraine Volodymyr Zelensky yavuze ko ibiro bya perezida w'Uburusiya (Kremlin) byahisemo misile za "balisitike aho kujya ku meza y'ibiganiro", ashimangira ko bicyenewe ko Uburusiya bufatirwa "ibindi bihano bikaze".

Ingabo za Ukraine zavuze ko Uburusiya bwohereje indege nto z'intambara zitajyamo umupilote (drone) zigera hafi kuri 600 n'ibisasu bya misile 'ballistic' na misile za 'cruise' byose hamwe birenga 30 - ni cyo gitero cya mbere kinini cyane Uburusiya bugabye kuri uyu murwa mukuru muri uku kwezi.

Ibyo bisasu bya misile birashwe nyuma yuko ingo zirenga 100,000 zo muri Ukraine zibuze umuriro w'amashanyarazi kubera ibitero byaherukaga kuba bya 'drone' Uburusiya bwagabye ku bikorwa-remezo by'amashanyarazi ejo ku wa gatatu.

Tymur Tkachenko yatangaje kuri Telegram ko abana nibura batanu bakomerekeye muri ibi bitero bishya byarashe ku nyubako zisanzwe zo guturamo.

Yongeyeho ko inyubako nyinshi zirimo n'ishuri ry'incuke zahiye.

Umukuru w'umujyi wa Kyiv Vitali Klitschko yavuze ko inyubako y'amagorofa atanu yashenywe ndetse ko abakora ibikorwa by'ubutabazi bari barimo gushakisha mu byasenyutse.

Perezida w'Akanama k'Uburayi António Costa yavuze ko atewe ubwoba n'ibi bitero by'Uburusiya, yongeraho ko ibiro bikuru by'intumwa z'umuryango w'Ubumwe bw'Uburayi (EU) i Kyiv na byo byangiritse.

Nyuma y'imyaka itatu n'igice Uburusiya bugabye igitero gisesuye kuri Ukraine, imirwano nta kimenyetso igaragaza cyo guhosha.

Umuhate w'amahanga wo mu gihe cya vuba aha gishize wo kugera ku gahenge muri Ukraine, watangijwe na Perezida w'Amerika Donald Trump muri uku kwezi.

Yahuye na Perezida w'Uburusiya Vladimir Putin muri leta ya Alaska muri Amerika, ndetse nyuma yaho anahura na Perezida Zelensky n'abandi bategetsi b'i Burayi i Washington DC.

Trump amaze igihe ashaka ko haba inama ihuza Putin na Zelensky.

Perezida wa Ukraine yashyigikiye iyo gahunda ariko yashatse ko inshuti za Ukraine zo mu burengerazuba bw'isi zizeza umutekano igihugu cye, mu gukumira igitero icyo ari cyo cyose cy'Uburusiya mu gihe kizaza, igihe amasezerano y'amahoro yaba agezweho.

Ku wa kabiri, Zelensky yahuye i Kyiv n'umugaba mukuru w'ingabo z'Ubwongereza Admiral (Amiral) Sir Tony Radakin, baganira ku bikorwa bigamije kurangiza intambara.

Intumwa yihariye y'Amerika Steve Witkoff yavuze ko muri iki cyumweru azahura i New York n'abahagarariye Ukraine, abwira televiziyo Fox News yo muri Amerika ati: "Tuvugana n'Abarusiya buri munsi."

Umukuru w'ububanyi n'amahanga muri EU, Kaja Kallas, yaburiye ko guha Uburusiya ubutaka bwa Ukraine nka kimwe mu bigize amasezerano y'amahoro ari "umutego".