Afrika y'epfo yakiriye ikipe y'umupira w'amaguru ya Palestine mu rukino rwo kwerekana ugushigikira

Ikipe nserukiragihugu ya Palestine y’umupira w’amaguru yakinye n’ikipe yo muri Afrika y’epfo Western Cape 11 kuwa Mungu, mu rukino rwa kivukanyi rwo kwerekana ko Afrika y’epfo yifatanije n’abanye-Palestine.

Prezida Cyril Ramaphosa yateye mw’ijwi ayobora abaje kurorera urukino mu kuririmba bati “Free Free Palestine!” (Bohora Bohora Palestine) anasubira gushimangira ko Afrika y’epfo izobandanya gushigikira abanye-Palestine mu ntambara barimwo na Israel.

Hari hitavye n’abandi banyacubahiro barimwo umushikiranganji ajejwe imigenderanire n'amakungu, Naledi Pandor.

Mu gusanisha ibiri gushikira Palestine n’intwaro karyanishamiryango ya apartheid, Prezida Ramaphosa yagize ati: “Abanyagihugu ba Palestine hamwe n’uburongozi bwa Palestine Liberation Organisation, irongowe na Abu Ammar, Comrade Yasser Arafat, bari mu batubereye inshuti zikomeye kandi barashigikira urugamba rwacu rw’ubwigenge.

“Baratugumye impande mu minsi yacu y’umwiza, baduha icizere n’ukurundo. Uno munsi twebwe abantu bo muri Africa y’epfo yigenga, dufise ikiganza canyu mu cacu. Turi kumwe namwe, impande zanyu”.

Prezida Ramaphosa kandi yashimiye abaje kurorera urukino “ku kuba muri ngaha mushigikiye abanyagihugu ba Palestine”.

Urwo rukino rwatunganijwe ngo ruhurirane n’isabukuru y’irekurwa ry’intwari y’ukwibohora muri Afrika y’epfo, Nelson Mandela, mu 1990.

Urwandiko rwasohowe n’ibiro vy’umukuru w’igihugu wa Afrika y’epfo ruvuga kandi ko urwo rukino “rugamije guha abakinyi b’abanye-Palestine akaryo ko kunezerwa n’umukino bakunda mu mahoro no ku kibuga kimeze neza.”