Umuherwe w'Umunya-Ukraine yafunzwe mu gikorwa cyo kurwanya ruswa

Umwe mu baherwe batunze za miliyari bo muri Ukraine bafite ijambo muri politiki agiye gufungwa amezi abiri ategereje kuburana, acyekwaho uburiganya n'iyezandonke.

Ihor Kolomoisky, w'imyaka 60, ashinjwa kohereza miliyoni 14 z'amadolari y'Amerika (miliyari 16Frw) mu mahanga mu gihe cy'imyaka irindwi, akoresheje za banki yagenzuraga.

Abanyamategeko bamwunganira bavuga ko nta ngwate azariha kugira ngo abe arekuwe by'agateganyo, ndetse ko azajuririra iki cyemezo cy'urukiko cyo kumufunga.

Ibi ni byo bya vuba aha bibaye mu gikorwa cya Ukraine cyo kurwanya ruswa, cyageze ku bakomeye benshi.

Amashusho ya televiziyo yo muri Ukraine ku wa gatandatu yerekanye Kolomoisky ajyanwe akuwe mu rukiko rwo ku rwego rw'akarere mu murwa mukuru Kyiv, yambaye ijaketi y'ubururu y'ikipe y'umupira w'amaguru ya FC Dnipro.

Itsinda ry'abunganizi be mu mategeko rivuga ko ubu afungiye ku cyicaro gikuru cy'urwego rw'ubutasi rwa Ukraine (SBU), kiri muri uwo mujyi.

Itangazo ry'urwego SBU rigira riti: "Byagaragaye ko mu gihe cya 2013-2020, Ihor Kolomoisky yatumye kimwe cya kabiri cya miliyari y'ama hryvnia [angana na miliyoni $14] yemerwa mu rwego rw'amategeko mu kuyabikuza mu mahanga no gukoresha ibikorwa-remezo bya banki agenzura".

Mu ijambo ryo mu buryo bwa videwo asanzwe avuga buri mugoroba, Perezida wa Ukraine Volodymyr Zelensky yagaragaye akomoza kuri dosiye y'uwo muherwe, avuga ko nta gusubira ku "mikorere nk'isanzwe ku basahuye Ukraine bakishyira hejuru y'amategeko".

Yagize ati: "Buri wese muri twe yumva ko iyi izaba Ukraine ifite amategeko [imikorere] atandukanye".

Ubwo yageraga ku butegetsi mu 2019, Zelensky yavuze ko urugamba rwo kurwanya ruswa ari kimwe mu bintu by'ingenzi ashyize imbere.

Kuva Uburusiya bwagaba igitero gisesuye kuri Ukraine mu kwezi kwa Gashyantare (2) mu 2022, ubutegetsi bwe bwashishikariye kugaragaza ko Ukraine ihashya ruswa - ibonwa nka kimwe mu bizamini bikomeye iki gihugu kizagomba gutsinda kugira ngo cyinjire mu nzego zo mu burengerazuba (Uburayi n'Amerika) nk'umuryango w'Ubumwe bw'Uburayi (EU/UE).

Icyo cyemezo cy'urukiko cyo ku wa gatandatu kuri Kolomoisky, si cyo gikorwa cya mbere kimugambiriye.

Urugo rw'uwo muherwe, ruri mu mujyi wa Dnipro wo mu majyepfo ashyira uburasirazuba, rwarasatswe muri Gashyantare uyu mwaka, bijyanye n'irindi perereza ku kunyereza umutungo no gukwepa kuriha imisoro muri kompanyi ebyiri nini z'ibitoro z'iki gihugu abereye nyirazo by'igice.

Mu 2021, Amerika yamufatiye ibihano imushinja "ruswa nyinshi" mu gihe yari guverineri w'akarere ka Dnipropetrovsk. Yahakanye avuga ko nta kibi yakoze.

Kolomoisky ni umunyemari w'umuherwe ufite imari mu bitangazamakuru byo muri Ukraine, mu bitoro no mu rwego rwa za banki.

Shene (channel) ya televiziyo ye yamenyekanishije Zelensky binyuze mu ruhererekane rw'ikiganiro cya byendagusetsa kizwi nk'"Umugaragu wa Rubanda", ugenekereje mu Kinyarwanda, mbere yuko uwo muherwe ashyigikira kandidatire ku mwanya wa perezida y'uyu wahoze ari umukinnyi wa filime.

Perezida Zelensky yashinjwe kuba nk'igikoresho cya Kolomoisky mu gihe cy'ibikorwa byo kwiyamamaza, mu babimushinje harimo n'uwo bari bahatanye wanahoze ari Perezida, Petro Poroshenko.

Ariko uyu Perezida wa Ukraine yakomeje guhakana avuga ko Kolomoisky nta bubasha afite kuri guverinoma.