Iminota 90 y'ikiganiro-mpaka kigiye kuba hagati ya Harris na Trump – Ibyo wamenya

Ibiganiro-mpaka hagati y’abakandida babiri ku mwanya wa perezida biba muri politike ya Amerika. None ku wa kabiri nijoro Donald Trump na Kamala Harris barahatana mu kiganiro imbonankubone – ari na cyo cyonyine kibahuza kiri kuri gahunda kugeza ubu.

Ikiganiro giheruka hagati ya Trump na Perezida Joe Biden muri Kamena(6) uyu mwaka cyashyize igitutu ku ishyaka ry’abademokarate kubera intege nke zagaragaye kuri Biden, ibyatumye amaherezo areka guhatanira uyu mwanya, agaharira visi perezida we Kamala Harris.

Trump amaze kwitabira ibiganiro nk’ibi mu matora atatu ya perezida aheruka muri Amerika – yifata nk’udatewe impungenge no guhatana na Harris, we uyu munsi uri bube aje mu kiganiro cyo kuri uru rwego ku nshuro ya mbere.

Kirabera hehe kandi ryari?

Iki kiganiro-mpaka kiratangira saa tatu zuzuye z’ijoro kw’isaha yo mu mujyi wa Philadelphia muri leta ya Pennsylvania, kirabera mu kigo National Constitution Center muri uwo mujyi. Biraba ari saa cyenda z’igicuku ku isaha y’i Gitega na Kigali ejo ku wa gatatu.

Iki kiganiro-mpaka kiramara iminota 90 ushyizemo n’umwanya w’ibihe bito by’ikiruhuko cyo kwamamaza.

Nta bantu baje kukireba (audience) baza kuba bari mu cyumba kiri buberemo.

Amategeko ni ayahe?

Abayobora ikiganiro bahuza impande zombi ni David Muir na Linsey Davis, aba bombi basoma amakuru ku gitangazamakuru ABC.

David na Linsey ntabwo baza kugorwa no kubuza abakandida bombi gucyocyorana bacana mu ijambo kuko indangururamajwi y’umwe iba izimije mu gihe mukeba we arimo kuvuga.

Ayo ni amategeko mashya yagiyeho muri uyu mwaka hagati ya Trump na Biden, nyuma y’ikiganiro mpaka cyo mu 2020 hagati yabo cyabayemo guterana amagambo bacana mu ijambo.

Abakandida barimo kwitegura bate?

Kamala Harris arimo gukorana na Karen Dunn, umunyamategeko w’i Washington, nk’uko bivugwa n'ikinyamakuru New York Times, ivuga kandi ko Dunn yafashije abanyapolitiki b’abademokarate kwitegura ibiganiro mpaka mu myaka hafi 20 ishize.

Dunn, kenshi uhagararira mu manza kompanyi zikomeye z’ikoranabuhanga, akorana aka kazi “urukundo rukakaye”, nk’uko Hillary Clinton wari umukandida mu matora ya 2016 abivuga.

Hillary yavuze ko Dunn adatinya kukubwira ngo “ibi ntibizagufasha” kandi “akanagushima” aho bikwiye.

Ku ruhande rwa Trump, aritegura mu buryo yakunze kubigenza na mbere, nk’uko ibinyamakuru byo muri Amerika bibivuga.

Mbere y’ikiganiro-mpaka Trump aganira n’abajyanama be, Tulsi Gabbard wahoze ari umwe mu bagize inteko ishingamategeko ku ruhande rw’abademokarate, na Matt Gaetz, umwe mu bagize inteko ishingamategeko ku ruhande rw’abarepubulikani.

Ni ibiki byo kwitega?

Ibi biganiro-mpaka ni kimwe mu bintu bishobora guhindura isura y’amatora muri Amerika bitewe n’uko abakandida bitwara.

Ni amahirwe yihariye ku bakandida yo kwigaragaza neza ku batora kuko ibyo bahavugira birakwirakwira cyane, ndetse uduce tumwe (clips) tw’ibyo bavuze tugahererekanywa cyane ku mbuga nkoranyambaga no mu binyamakuru.

Iki kiganiro kiraba ari ingenzi kurushaho kuri Kamala Harris, ahanini mu kwiyamamaza kugeza ubu ugendera ku byateguwe byanditswe n’itsinda rye.

Trump na Harris barajya impaka ku ngingo zitandukanye zirimo ikibazo cy’abimukira, intambara muri Gaza, intambara muri Ukraine, gukuramo inda, umubano n’Ubushinwa…byitezwe ko umwe agenda asenya mukeba we aho akeka ko afite intege nke.

Abasesenguzi bamwe bavuga ko Trump aza kwirinda kwibasira Harris agendeye ku kuba gusa ari umugore kuko ikosa rito yakora aho ashobora kwisanga mu bibazo na miliyoni z’abagore batora.

Kamala Harris na we afite akazi gakomeye, ikusanyabitekerezo rya Siena College ryasabwe na New York Times ryatangajwe ku cyumweru, rivuga ko abatora benshi ubu batarasobanukirwa Harris uwo ari we n’ibyo aharanira.