DRC-Burundi: FARDC na FDN bagabye igitero kuri FNL bica 40

Igisirikare cya Repubulika ya Demokarasi ya Congo gifatanije n'ingabo z'u Burundi ziri ku butaka bwa Congo, kiravuga ko mu mpera z'icyumweru gishize zagabye igitero  ku nyeshyamba zo mu mutwe wa FNL zikomoka mu Burundi ziyobowe  na Aloys Nzabampema mu ntara ya Kivu y'epfo, zicamo inyeshyamba 40.

Ariko urundi ruhande ntirurabyemeza. U Burundi ni kimwe mu bihugu biri mu muryango w'Afurika y'uburasirazuba bimaze kohereza ingabo muri Congo mu rwego rwo kugarura amahoro mu burasirazuba bwa Congo.

Umutwe wa FNL uri mu mitwe ikomoka hanze ya Congo iherutse guhabwa iminsi ntarengwa n'inama y'abakuru b'ibihugu yabereye i Luanda mu cyumweru gishize, yo kuba imaze gusubira aho ikomoka.

Jacques Niyitegeka yavuganye na Lieutenant Marc Elongo, umuvugizi w'ingabo za Congo mu karere ka Uvira mu ntara ya Kivu y'amajyepfo, amusobanurira uko byagenze (Umva icyo kiganiro aho hejuru).