Ucyekwaho ubwicanyi muri Amerika yahubutse mu gisenge ubwo polisi yasakaga urugo rwe

Abategetsi bo muri leta ya Tennessee muri Amerika bari bamaze amezi bahiga umugabo ucyekwaho uruhare mu bwicanyi bwabereye mu mujyi wa Memphis, wo muri iyo leta, muri Mata (4) uyu mwaka.

Ku wa mbere ni bwo bamugezeho, nyuma yuko ahubutse mu gisenge cy'inzu yari yihishemo.

Deario Wilkerson, w'imyaka 20, ntiyakomeretse, nyuma yuko yihonze hasi aturutse aho mu gisenge, nkuko bikubiye mu itangazo ry'ishami ry'ubugenzacyaha bw'Amerika (US Marshals Service).

Wilkerson yafunzwe ku birego by'ubwicanyi bwo mu cyiciro cya mbere no gushyira mu kaga ubuzima bw'umuntu nta cyo yitayeho akoresheje intwaro yica.

Iryo shami ry'ubugenzacyaha ryavuze ko yari umwe mu bantu batatu bacyekwa bamenyekanye bakurikiranyweho uruhare mu kurasa kwaviriyemo urupfu Troy Cunningham, kwabereye i Memphis, ku itariki ya 2 Mata.

Uko ari batatu, abo bagabo bashinjwa kwiba imbunda ya Cunningham, nkuko bivugwa n'umushinjacyaha w'akarere ka Shelby. Nuko araswa inyuma mu mutwe ubwo yageragezaga guhunga.

Ibiro by'umushinjacyaha byavuze ko abo babiri bandi bacyekwa bamaze gutabwa muri yombi banashyirirwaho ibirego. Urupapuro rwo guta muri yombi Wilkerson rwari rwasohowe muri Gicurasi (5) uyu mwaka.

Dosiye ye yaje kwimurirwa mu iperereza ry'umuntu ushakishwa wihishahisha, mu itsinda rikurikirana abashakishwa b'abanyarugomo ry'i Memphis, rizwi nka Two Rivers Violent Fugitive Task Force.

Yatahuwe ko aherereye mu rugo rw'i Memphis, nuko abategetsi bararugota.

Wilkerson yagerageje kwihisha mu gisenge, nuko aza guhubukamo.

Ntibirasobanuka niba yarabonye serivisi z'umunyamategeko. Nta cyo aravuga ku byo aregwa.