‘APR BBC iradusebeje’ - Imbere ya Paul Kagame, APR yabuze ticket ya BAL izabera i Kigali

Ku mbuga nkoranyambaga Abanyarwanda bakunda basketball bagaragaje ko bababajwe no kuba APR BBC (Armée Patriotique Rwandaise Basketball Club) yabaye iya nyuma mu mikino ya BAL – Sahara conference, nyuma yo gutsindwa umukino wabereye i Dakar imbere y’abakuru b’ibihugu Paul Kagame w’u Rwanda na Bassirou Diomaye Faye wa Senegal.

Sahara Conference ni akandi gace ka Basketball Africa League (BAL) kabera muri Senegal ko gushaka ikipe zizajya ku mikino ya nyuma ya BAL izabera i Kigali mu kwezi gutaha.

Utundi duce duhuza amakipe yabaye aya mbere mu turere twa Africa, turimo Kalahari conference ibera muri Africa y'Epfo na Nile Conference ibera mu Misiri.

Izindi kipe zo mu karere nka Dynamo y’i Burundi yasezerewe muri Kalahari Conference, naho City Oilers yo muri Uganda isezererwa muri Nile Conference.

Ku mukino wo ku cyumweru nijoro APR, idafite abakinnyi bayo b’ingenzi Adonis Filer na Obadiah Noel bavunitse, yatsinzwe na AS Douanes yo muri Senegal.

Uyu mukino wari witabiriwe n’abantu benshi kuri Arena y’i Dakar, barimo Perezida Paul Kagame uri mu ruzinduko muri Africa y’iburengerazuba, hamwe na Perezida Bassirou Diomaye Faye wa Senegal.

Ku rubuga X (rwahoze ari Twitter) umwe yanditse ati: “Ni igisebo kubona imikino tuzakira nta Equipe yacu irimwo. Umuntu uyoboye APR BBC bamuhindure biragayitse ku gihugu cyacu, baradusebeje. Coach nizere kwihita yiyirukana”

Undi ati: “APR basketball yarifite budget irenga 2billion Rwf ariko kubera kutamenya basketball badutaye mu nama”

Undi ati: “Umuntu wazanye bano bakinyi nuno mu Coach bazitabe PAC. APR BBC iradusebeje. Equipe yariri hasi cyane babatsinze nkabadahari.”

Muri Sahara conference yaraye irangiye, APR yatsinze imikino ibiri itsindwa ine muri itandatu yakinnye, bituma iba iya nyuma muri iryo tsinda, ndetse iba iya mbere yo mu Rwanda inaniwe kubona ticket y’imikino ya nyuma ya BAL ibera i Kigali.

Amakipe umunani yabonye ticket y’iyi mikino ya BAL - ihuza amakipe yabaye aya mbere muri Basketball muri Africa - iterwa inkunga na NBA, ni aya:

Iyi mikino ya nyuma ya BAL izabera muri Kigali Arena kuva tariki 24 z’ukwezi gutaha.

Mu gihe indi mikino nk’iyi yabanje u Rwanda rwabaga ruhagarariwe na Patriots cyangwa REG, kuri iyi nshuro abafana ba basketball i Kigali bashobora kureba iyi mikino nta kipe yo mu rugo ihari.