Christian Atsu: Umurambo we wasezeweho bwa nyuma i Accra mbere yo gushyingurwa

Abantu amagana barimo na perezida wa Ghana bitabiriye umuhango wo gusezera bwa nyuma Christian Atsu, wapfuye mu kwezi gushize mu mutingito wo muri Turkiya.

Kumusezeraho byabereye imbere y’ibiro by’umukuru w’igihugu mu murwa mukuru Accra wa Ghana.

Marie-Claire Rupio, umupfakazi yasize, yasomye ubutumwa bw’akababaro aho yagize ati: “Mu buzima ndagukunda nshuti, no mu rupfu niko bimeze.”

Marie-Claire yagize agahinda gakomeye ananirwa kurangiza ubutumwa bwe abuha mushiki wa Atsu aba ariwe ukomeza kubusoma.

Bwakomeje bugira buti: “Ntiwagiye wenyine, kuko igice cyanjye cyajyanye nawe. Inseko yawe n’urukundo rwawe mbibona mu nseko z’abana bacu.”

Abahagarariye ikipe y’igihugu ya Ghana n’abahagarariye ikipe ya Hatayspor yakinagamo muri Turkiya nabo bari baje kumusezeraho.

Umurambo wa Atsu wabonetse hashize ibyumweru bibiri mu bisigazwa bya ‘appartement’ yabagamo yashenywe n’umutingito.

Hashize hafi ukwezi kumwe umurambo we usubijwe iwabo. Nyuma y’uyu muhango arashyingurwa iwabo ku ivuko mu majyepfo ya Ghana.

Atsu, wari ufite imyaka 31, igihe kinini yakinnye muri shampiyona y’Ubwongereza mu makipe arimo Chelsea, Newcastle na Everton mbere yo kujya muri Arabia Saoudite na Turkiya aho yaguye.

Yakiniye ikipe y’igihugu cye Black Stars imikino 65, anayifasha kugera ku mikino ya nyuma y’igikombe cya Africa cya 2015 muri Equatorial Guinea aho yahawe ibihembo by’igitego n’umukinnyi w’irushanwa.

Abanyaghana benshi babwiye BBC ko Atsu azibukirwa ku gukunda abantu, no gufasha abakene mu gihugu cye.

Kuwa kabiri, amagana y’abantu bitabiriye umuhango wo gutambuka baca imbere y’umurambo we mu kumusezeraho.

Abavuza ingoma n’abacuranzi bari bitabiriye uwo muhango w’akababaro no guha icyubahiro Atsu.