South Korea: Umugore yafunzwe ashinjwa kwica abana be basanzwe mu mavalisi muri New Zealand barapfuye

Frances Mao

BBC News

Polisi ya Koreya y'Epfo ivuga ko yataye muri yombi umugore ushinjwa kwica abana be babiri basanzwe mu mavalisi (valises) mu kwezi gushize.

Igihugu cya New Zealand cyaguye mu kantu ubwo iyo mirambo yatahurwaga n'abantu badafite icyo babiziho baguze ayo mavalisi mu gice abikwamo mu mujyi wa Auckland.

Iyo mirambo yari imaze imyaka myinshi ihunitswe (ibitswe). Polisi ya Koreya y'Epfo yavuze ko abo bana bishwe umwe yari afite imyaka 7 naho undi afite imyaka 10.

New Zealand yatanze ubusabe bwuko uwo mugore yoherezwa muri iki gihugu akuwe muri Koreya y'Epfo.

Polisi yo mu mujyi wa Auckland yavuze ko yakoranye bya hafi n'abategetsi bo muri Koreya y'Epfo mu gushakisha uwo mugore, nyuma yuko mu kwezi gushize kwa munani polisi yemeje ko ari muri Koreya y'Epfo.

Ni Umunya-New Zealand w'imyaka 42 ufite inkomoko muri Koreya y'Epfo.

Polisi ya Koreya y'Epfo yavuze ko yari yarahahungiye mu 2018 nyuma y'impfu z'abo bana.

Polisi mpuzamahanga, Interpol, yari yaratanze urwandiko mpuzamahanga rwo kumuta muri yombi.

Mu kwezi gushize, polisi ya New Zealand yavuze ko yari irimo gushakisha umugore, nyuma yo kumenya umwirondoro w'abo bana batatangajwe amazina.

Abapolisi bataye muri yombi uwo mugore mu gikorwa bakoze saa sita z'ijoro kuri uyu wa kane, aho bamusanze yihishe mu nyubako y'icumbi mu mujyi wa Ulsan uri mu majyepfo ashyira uburasirazuba bw'iki gihugu.

Abakora iperereza bari bamaze igihe bacungacunga iyo nyubako, nyuma yo guhabwa amakuru y'aho aherereye, nkuko byatangajwe n'urwego rwa polisi ya Koreya y’Epfo.

Umupolisi mukuru wo muri New Zealand, Tofilau Fa'amanuia Vaaelua, yagize ati:

"Kugeza umuntu muri kasho yo mu mahanga mu gihe gito gutya byose byagezweho kubera ubufasha bw'abategetsi ba Koreya [y'Epfo] n'ubufatanye bwa polisi yacu ya NZ [New Zealand] n'abakozi ba Interpol".

Polisi yasabye ko yangirwa kuba afunguwe by'agateganyo atanze ingurane, mbere yuko yohererezwa New Zealand aho akurikiranyweho ibirego by'ubwicanyi.

Ibitangazamakuru byaho byatangaje ko uwo muryango wari warabaye imyaka micye muri Auckland kandi ko se w'abo bana yari yarapfuye azize kanseri (cancer) mbere y'impfu z'abo bana.

Byatangaje ko sekuru na nyirakuru w'abo bana bakiba muri New Zealand.

Polisi yavuze ko undi muryango wabonye iyo mirambo mu ntangiriro y'ukwezi kwa munani ubwo waguraga ibicuruzwa byinshi, birimo n'ayo mavalisi, muri cyamunara yo ku rubuga rwa internet.

Uwo muryango nta ho uhuriye n'impfu z'abo bana kandi abapolisi bavuze ko wagize agahinda kenshi mu gihe cyakurikiye gutahura abo bana.