‘Hari ibyo ntarangije muri Premier League’ – Aubameyang muri Chelsea
Chelsea yasinyishije rutahizamu Pierre-Emerick Aubameyang kuri miliyoni £10.3 imukuye muri FC Barcelona, izana n’umukinnyi wo hagati Denis Zakaria imutijwe na Juventus.
Umunya-Gabon Aubameyang w’imyaka 33, yatsinze ibitego 13 mu mikino 24 yakiniye Barca kuva yayigeramo muri Gashyantare(2) avuye muri Arsenal.
Marcos Alonso ukina inyuma ibumoso we yavuye muri Chelsea ku bwumvikane bw’impande zombi kandi byitezwe ko ajya muri Barcelona.
Chelsea ifite amahirwe yo kuba yaha amasezerano Zakaria akareka kuba intizanyo.
Uyu mukinnyi w’imyaka 25 w’Umusuwisi yageze muri Juve avuye muri Borussia Monchengladbach muri Mutarama(1).
Ubwo Aubameyang yasinyiraga Barca harimo ingingo y’uko indi kipe yamushaka yamugura miliyoni 100 z’amaEuro, ariko muri uyu mwaka w’imikino yakinishijwe iminota 8 gusa.
Barcelona imaze iminsi irekura abakinnyi idakeneye nyuma yo gutanga agera kuri miliyoni £200 ku bashya nubwo bwose ifite umwenda urenga miliyari £1.
Nyiri Chelsea witwa Toddy Boehly amaze gutanga miliyoni £255 mu igura rya mbere rye ry’abakinnyi kuva yagura iyi kipe yari iya Roman Abramovich – ayo niyo mafaranga menshi ikipe yo mu Bwongereza iguze abakinnyi mu gihe cyo kubagura.
Aubameyang yagize ati: “Ndishimye rwose. Ni ishema kuba umwe muri iyi kipe ntegereje cyane gutangira. Mfite ibyo ntarangije muri Premier League rero ni byiza ko ngarutse.”
Auba yatsinze ibitego 92 mu mikino 163 y’amarushanwa yose ari muri Arsenal, ariko baza kumurekura ngo agende nyuma yo gushwana n’umutoza Mikel Arteta.
Uko kugenda kwagize umwanya munini muri ‘documentary’ ya Arsenal yiswe ‘All or Nothing’.
Abakinnyi bane gusa nibo batsinze ibitego byinshi kurusha 68 Aubameyang yatsinze muri Premier League kuva muri Mutarama 2018 ubwo yageraga muri Arsenal.
Hagati ya 2015 na 2017 Auba yakiniye Borussia Dortmund atozwa na Thomas Tuchel ubu urimo gutoza Chelsea. Icyo gihe yatsinze ibitego 79 mu mikino 95.
Muri iyi mpeshyi, Chelsea yaguze abakinnyi icyenda, barimo;
- Wesley Fofana wavuye muri Leicester kuri miliyoni £70
- Marc Cucurella wavuye muri Brighton kuri miliyoni £62
- Raheem Sterling wavuye muri Manchester City kuri miliyoni £50
- Kalidou Koulibaly wavuye muri Napoli kuri miliyoni £34
- Carney Chukwuemeka wavuye muri Aston Villa kuri miliyoni 20£
Nyiri Chelsea, Boehly yagize ati: “Pierre-Emerick ni rutahizamu wo hejuru ufite ibigwi biboneka muri Premier League kandi kuza kwe kongereye imbaraga mu ikipe kuduha ubundi buryo mu gusatira.”
