Imvo n'Imvano: Ubuhuza nk'inzira yo gukemura amakimbirane bidaciye mu nkiko mu Rwanda

Ikiganiro cy'Imvo n'Imvano kuri uyu wa gatandatu tariki ya 8 Werurwe (ukwezi kwa gatatu) 2025 kerekeye gahunda y'ubuhuza nk'inzira yo gukemura amakimbirane mu bwumvikane hatisunzwe inkiko.

Hashize amezi atandatu mu Rwanda hatangijwe ikigo gifasha mu gukemura amakimbirane atari ngombwa ko abayafitanye baca mu nkiko n'ubwo ubwo buryo bwari bumaze imyaka busa nk'ubugeragezwa.

Imibare itangwa n'inzego zibishinzwe muri icyo kigo igaragaza ko kuva mu mwaka wa 2017 imanza zirenga ibihumbi 8,000 z'imbonezamubano zarangiriye mu buhuza bidasabye ko zijya mu nkiko.

Kugeza ubu bigaragara ko imanza z'ubucuruzi ari zo ziganje mu zikiranurwa hatisunzwe inkiko.

Ubu buryo kandi bugendana n'ubundi buryo bw'ubwumvikane bushingiye ku kwemera icyaha.

Leta itangaza ko amadosiye arenga ibihumbi 18 arimo abakekwagaho ibyaha barenga ibihumbi 21 yamaze kurangira hakoreshejwe inzira y'ubwumvikane bushingiye ku kwemera icyaha (plea-bargaining).

Si ngombwa ko abahuza baba barize amategeko.

Kugeza ubu abahuza basaga 400 bari ku rutonde rw'abemewe mu gihugu.

Hari dosiye z'imanza z'amamilioni menshi zashoboye kurangizwa binyuze mu buhuza. Turabyumva muri iki kiganiro.

Leta ivuga ko ubu buryo bwombi - kumvikanisha abantu hadakoreshejwe inkiko no kumvikana bishingiye ku kwemera icyaha (Plea-Bargaining) - buri kwifashishwa nk'igisubizo ku bibazo by' imanza nyinshi zuzuye mu nkiko zitinda kurangira ndetse n'umubare munini w'abafungwa mu magereza yo mu Rwanda.

Iki kiganiro cy'Imvo n'Imvano mwagiteguriwe kandi mugishikirizwa na Yves Bucyana.