Ukraine: Urubanza rw'umusirikare wa mbere wa Russia ku cyaha cyo mu ntambara

Umusirikare w'Uburusiya yitezwe kuburanishwa kuri uyu wa gatanu aregwa kwica umuturage w'umusivike w'Umunya-Ukraine udafite intwaro - ikirego cya mbere kijyanwe mu rukiko ku cyaha cyo mu ntambara kuva Uburusiya bwatera Ukraine ku itariki ya 24 y'ukwezi kwa kabiri.

Sergeant (Sgt) Vadim Shyshimarin ashinjwa kurasa mu mutwe umugabo w'imyaka 62, mu idirishya ry'imodoka rifunguye, mu cyaro cya Chupakhivka mu majyaruguru ashyira uburasirazuba bwa Ukraine.

Ashobora gufungwa burundu hagendewe ku bihano biteganywa n'igice cyo mu mategeko mpanabyaha ya Ukraine kivuga ku mategeko n'imyitwarire igenga intambara.

Ibiro ntaramakuru AP bitangaza ko umwunganizi we mu mategeko Victor Ovsyanikov yavuze ko ibyo umukiliya we ashinjwa bikomeye, ariko ko icyemezo cya nyuma ku bimenyetso byakwemerwa muri iyi dosiye gifatwa n'urukiko rwo mu murwa mukuru Kyiv wa Ukraine.

Yavuze ko we n'uwo yunganira batarafata icyemezo ku cyo azagusubiza ku byo ashinjwa.

Ibiro by'umushinjacyaha mukuru wa Ukraine Iryna Venediktova byavuze ko birimo gusuzuma ibirego birenga 10,700 bishobora kuvamo ibyaha byo mu ntambara, birimo abacyekwa barenga 600, barimo abasirikare n'abategetsi b'Uburusiya.

'Putin arimo kwisuzuguza'

Mu yandi makuru, Minisitiri w'ububanyi n'amahanga w'Ubwongereza Liz Truss yavuze ko ibihano amahanga yafatiye Uburusiya bikwiye kuvanwaho gusa ari uko abasirikare babwo bose bamaze kuva muri Ukraine.

Truss yabwiye inama mu Budage y'abaminisitiri b'ububanyi n'amahanga bo mu bihugu birindwi bikize ku isi, byo mu itsinda rya G7, ko Perezida w'Uburusiya Vladimir Putin agomba gutsindwa bikamubuza kuzongera gushotorana.

Yagize ati: "Putin arimo kwisuzuguza mu mahanga". Yongeyeho ko Putin agomba kubuzwa inyungu iyo ari yo yose yakura mu gitero kuri Ukraine.

Yanasabye ko Ukraine irushaho guhabwa ibikoresho bya gisirikare bivuye mu muryango w'ubwirinzi bw'Uburayi n'Amerika (OTAN/NATO).

Abaminisitiri b'ububanyi n'amahanga bo muri G7 kuri uyu wa gatanu bongeye guhura na bagenzi babo ba Ukraine na Moldova.