Uwirukanywe mu gipolisi araregwa kurasa akica umwana w'imyaka 12
Ahavuye isanamu, GoFundMe
Uhoze mu gipolisi cya Philadelphia yarezwe ubwicanyi kubera kurasa umuhungu w'imyaka 12 mu mugongo ubwo yariho amwirukankana mu kwezi kwa gatatu.
Abategetsi bavuga ko Edsaul Mendoza w'imyaka 26, yirukankanye Thomas "TJ" Siderio maze akamurasa nubwo bwose yari azi neza ko uyu mwana nta ntwaro agifite.
Polisi ikeka ko inshuti ya Thomas yaba yari ifite uruhare mu kwiba imbunda.
Mendoza yatawe muri yombi ku cyumewru.
Inyandiko yasohowe n'ubushinjacyaha bwa Philadelphia ivuga ko Mendoza yari mu itsinda ry'abapolisi bane batambaye imyenda y'akazi bagiye gufata Thomas n'inshuti ye y'imyaka 17.
Abo bapolisi bibazaga ko iyo nshuti ye yiswe 'NK' ifite uruhare mu bujura bw'imbunda bwariho bukorwaho iperereza.
Mu gushaka gufata aba bahungu havutse kurasa hameneka ikirahure cy'imodoka, nk'uko iyo nyandiko ibivuga. Aba bahungu bashatse gukizwa n'amaguru, Mendoza akurikira Thomas arasa inshuro eshatu.
Isasu rya gatatu, nk'uko iyo nyandiko ibivuga, Mendoza yarirashe nubwo yari azi ko imbunda Thomas yari afite yayijugunye muri metero 12. Thomas kandi yari yahagaze atakiri kwiruka igihe iryo sasu ryaraswaga.
Umushinjacyaha Larry Krasner wa Philadelphia ati: "Ubwo Mendoza yarasaga isasu rya gatatu ry'ingusho, yari azi neza ko Thomas Siderio w'imyaka 12 ureshya na 1,52m atari agifite imbunda.
"Ariko yamurashe isasu mu mugongo, ari naryo ryamwishe."
Mendoza yahise yirukanywe mu gipolisi nyuma y'ibi, aho umukuru w'igipolisi cyaho yavuze ko habayeho gukoresha nabi ingufu.
Larry Krasner avuga ko ibimenyetso byose birega Mendoza biva ku mashusho yafashwe arimo kurasa, azatangazwa ari uko umucamanza abitangiye uburenganzira.
Krasner avuga ko ayo mashusho "ababaje cyane kureba" kandi ko Thomas yarashwe bishoboka ko yarimo kumanika amaboko.
Mendoza yafunzwe ku cyumweru mu gihe azagezwa imbere y'urukiko tariki 16 z'uku kwezi kwa Gicurasi.
Nyirakuru wa Thomas witwa Mary Siderio, asubirwamo n'ikinyamakuru gikorana na CBS avuga ko "yishimiye" kumva ko Mendoza arimo kuregwa.
Ati: "Nashenguwe umutima, ntabwo ngisinzira. Nta n'umwe muri twe ugisinzira. Biteye ubwoba."
