Ukraine igiye gukora iperereza ku gitero i Odesa cyiciwemo n'uruhinja rw'amezi atatu

Amakuru avuga ko ibiro by'umushinjacyaha w'umujyi wa Odesa mu majyepfo ya Ukraine byatangije iperereza ku gitero cy'ibisasu ku nyubako yo guturamo muri uwo mujyi.

Mbere, abategetsi baho bari bavuze ko ku wa gatandatu ibisasu bya rokete byakubise ku kigo cy'igisirikare no ku nyubako ebyiri zisanzwe zo guturamo.

Itangazo ry'ibiro by'umushinjacyaha rigira riti: "Ibiturika by'ibisasu by'umwanzi byashenye aho kuba ho hagati y'igorofa ya 2 n'iya 5 ndetse bifunga aho gusohokera, bituma abantu baheramo".

Ku wa gatandatu nimugoroba, Perezida wa Ukraine Volodymyr Zelensky yavuze ko byose hamwe, ibisasu bya misile birindwi byarashwe ku mujyi wa Odesa, bibiri muri byo birahanurwa.

Yavuze ko abantu batari munsi y'umunani biciwe muri ibyo bitero, barimo n'uruhinja.

Ku wa gatandatu, minisiteri y'ingabo z'Uburusiya yemeje ko yarashe kuri Odesa, ariko ivuga ko abasirikare bayo barwanira mu kirere barashe ku hantu habikwa ibikoresho "hari habitswe intwaro nyinshi z'amahanga zakiriwe zivuye muri Leta Zunze Ubumwe [z'Amerika] no mu bihugu by'i Burayi".

Mu biciwe muri iyo nyubako mu mujyi wa Odesa, Perezida Zelensky yavuze ko barimo umubyeyi w'umugore n'uruhinja rwe rw'amezi atatu.

Abanyamakuru n'abandi bakoresheje Twitter, batangaza amafoto y'uwo mubyeyi n'umwana we w'umukobwa, babaha icyubahiro.

Myroslava Petsa, umunyamakuru wa BBC mu ishami ritangaza ibiganiro mu Kinya-Ukraine, yavuze ko uwo mubyeyi yitwa Valeria, naho uruhinja rwe rukitwa Kira.

BBC ntibazwa ibivuye ku zindi mbuga.

Mu butumwa bwo ku mbuga nkoranyambaga bwa Valeria, bwa mbere yaho, bwongeye gutangazwa kuri Twitter n'umunyamakuru w'ikinyamakuru Kyiv Independent, uwo mubyeyi yari yavuze ko igihe cyo kuva yabyara Kira cyamuzaniye "ibyishimo byo ku rundi rwego".

BBC ntibazwa ibivuye ku zindi mbuga.