France mu matora mu gihe Macron ashaka gutsinda umuhezanguni ukomeye ku bya kera Le Pen

Kuri iki cyumweru abatora mu Bufaransa barimo guhitamo niba baha indi manda y'imyaka itanu Emmanuel Macron, w'ibitekerezo biri hagati na hagati, cyangwa kumusimbuza umuhezanguni ukomeye ku bya kera Marine Le Pen.

Nyuma yo kwiyamamaza kwaranzwemo ubushyamirane, Madamu Le Pen, w'imyaka 53, ari mu rugamba rukomeye, mu gihe amakusanyabitekerezo agaragaza ko Bwana Macron, w'imyaka 44, amuri imbere mu kugira amahirwe menshi yo gutsinda.

Kugira ngo batsinde, bacyeneye kwigarurira abatora bari batoye abandi bakandida mu matora y'icyiciro cya mbere.

Ariko aba ni abategetsi batavugwaho rumwe mu buryo bukomeye mu Bufaransa, kandi kwifata kw'abatora ni ingingo ikomeye ishobora guhindura ibintu.

Abanenga Bwana Macron bavuga ko ari umuntu w'umwirasi (umwiyemezi) ndetse akaba na Perezida w'abakire, mu gihe uwo bahatanye w'umuhezanguni ukomeye ku bya kera yashinjwe kugirana umubano wa hafi na Perezida w'Uburusiya.

Abantu miliyoni 48.7 ni bo bemerewe gutora, kandi kugeza saa sita z'amanywa ubwitabire bwari buri hasi ku bwo mu myaka itanu ishize buri ku kigero cya 26.4%, ariko nanone butari hasi nkuko byari bimeze mu cyiciro cya mbere mu byumweru bibiri bishize.

Imibare ya mbere y'agateganyo y'uwatsinze iratangazwa saa mbili z'ijoro (20h) ku isaha yo mu Bufaransa, ari na yo yo mu Rwanda no mu Burundi.

Marine Le Pen ni we watoye bwa mbere muri aba bakandida babiri, atorera mu mujyi afitemo abamushyigikiye benshi wa Hénin-Beaumont mu majyaruguru y'Ubufaransa. Ubwo yari ageze ku biro by'itora, yugamishije izuba umwana w'umuhungu aramubwira ati: "Nzakurinda".

Bwana Macron yatoye nyuma yaho mu mujyi ukora ku nyanja wa Le Touquet mu majyaruguru y'Ubufaransa, ari kumwe n'umugore we Brigitte. Yageze ku butegetsi mu 2017 asezeranya kuzana impinduka mu buryo bwihutirwa, ariko benshi binubira ko na n'ubu batarabona iyo mpinduka.

Ubutegetsi bwe bwashegeshwe n'imyigaragambyo, icyorezo cya Covid-19 ndetse n'ibiciro ubu birimo kuzamuka.

Hagati aho, Marine Le Pen yigiye ku makosa yakoze ubwo yatsindwaga bikomeye n'uyu mucyeba n'ubundi mu cyiciro cya kabiri cy'amatora mu 2017. Iyi ni inshuro ya gatatu agerageje kuba Perezida, kandi aramutse atsinzwe ishobora kuba ari yo nshuro ye ya nyuma abigerageje.

Ikintu gikomeye kitazwi muri aya matora, ni abatora bangana gute baza kwanga gushyigikira buri umwe muri aba bakandida, byaba mu gutora impfabusa cyangwa kutajya ku biro by'itora.

Henshi mu Bufaransa bari mu biruhuko, ndetse mu bice bimwe na bimwe byo mu murwa mukuru Paris ubwitabire bwagaragaye nk'uburi hasi cyane ugereranyije n'uko byari bisanzwe bigenda.

Igihe cyo kwiyamamaza cyabaye kigufi, ariko amahitamo ku batora arasobanutse, hagati ya Perezida usanzwe ku butegetsi ushyigikiye ubumwe bw'Uburayi, na mucyeba we utsimbaraye ku gushyira imbere Ubufaransa, ushaka guca umwitandiro wo mu mutwe no kugabanya abimukira.

Ibiro by'itora mu Bufaransa byafunguye saa mbili za mugitondo (8h), gutora bikaba byitezwe kurangira mu masaha agera kuri 12 nyuma yaho.

Ibiva mu matora uko biba bimeze kose, ku mugoroba wo kuri iki cyumweru Bwana Macron arageza ijambo ku batora, ari ku birenge by'umunara wa Tour Eiffel i Paris.