Russia yahaye ikindi gihe ntarengwa abasirikare ba Ukraine i Mariupol – uko amakuru avuga

Inyandiko gusa
Ifoto yafatiwe mu kirere yo ku itariki ya 12 y'ukwezi kwa kane mu 2022, igaragaza umujyi wa Mariupol mu gihe cy'igitero cya gisirikare cy'Uburusiya kuri Ukraine

Ahavuye isanamu, Getty Images

Insiguro y'isanamu, Ifoto yafatiwe mu kirere yo ku itariki ya 12 y'ukwezi kwa kane mu 2022, igaragaza umujyi wa Mariupol mu gihe cy'igitero cya gisirikare cy'Uburusiya kuri Ukraine
Yatangajwe

Minisiteri y'ingabo z'Uburusiya yahaye ikindi gihe ntarengwa abasirikare ba Ukraine, bari mu nyubako y'uruganda mu mujyi wagoswe wo ku cyambu (ikivuko mu Kirundi) wa Mariupol, mu majyepfo ashyira uburasirazuba, nkuko bitangazwa n'ibiro ntaramakuru Reuters.

Minisiteri y'ingabo z'Uburusiya yagize iti:

"Ingabo z'Uburusiya, zishingiye gusa ku mahame ya kimuntu, nanone zisabye ko abarwanyi bo muri za batayo z'abarwanira igihugu n'abacanshuro b'abanyamahanga bahagarika ibikorwa byabo bya gisirikare guhera saa munani z'amanywa (14h) ku isaha y'i Moscou [saa saba z'amanywa mu Rwanda no mu Burundi] ku itariki ya 20 y'ukwezi kwa kane bakanashyira intwaro hasi".

Minisiteri y'ingabo z'Uburusiya yavuze ko ku wa kabiri nta musirikare n'umwe wa Ukraine wemeye ubwo busabe ubwo na bwo yabibasabaga.

Amakuru avuga ko abarwanyi bashyigikiwe n'Uburusiya barimo kugerageza kwirara mu ruganda rutunganya ibyuma rwa Azovstal rw'i Mariupol, aho bivugwa ko abasirikare ba Ukraine n'abaturage b'abasivile bari.

Mu butumwa bwo ku rubuga rwa Telegram, ubuyobozi bw'inama njyanama y'umujyi wa Mariupol bwavuze ko nubwo hari abasirikare benshi b'Uburusiya muri uwo mujyi, batarashobora kuwufata, rero "barashaka gushyira hasi" urwo ruganda.

Imodoka ya bisi yahiye iboneka imbere y'inyubako yo guturamo yangijwe mu ntambara ya Ukraine n'Uburusiya, mu mujyi wo ku cyambu mu majyepfo wa Mariupol, muri Ukraine, ku itariki ya 19 y'ukwezi kwa kane mu 2022

Ahavuye isanamu, Reuters

Insiguro y'isanamu, Imodoka ya bisi yahiye iboneka imbere y'inyubako yo guturamo yangijwe mu ntambara ya Ukraine n'Uburusiya, i Mariupol, ku itariki ya 19 y'ukwezi kwa kane mu 2022

Kuri uyu wa gatatu, Minisitiri w'intebe wungirije wa Ukraine Iryna Vereshchuk yavuze ko igihugu cye cyageze ku masezerano y'ibanze y'agahenge ko gushyiraho umuhora (umuyoboro) wo gutuma hahungishwa abagore, abana n'abageze mu zabukuru bari mu mujyi wa Mariupol.

Yanditse kuri Facebook ati: "Kubera ukuntu ibintu bimeze nabi cyane ku mibereho muri Mariupol, aha ni ho twibanda mu bikorwa byacu uyu munsi".

Skip Ibisomwa cane and continue reading
Ibisomwa cane

End of Ibisomwa cane