UK: Depite Stella Creasy yabwiwe ko abana b'impinja batemewe mu nteko

Depite wo mu Bwongereza yavuze ko "bigomba gushoboka ko politiki no kurera bivangwa" nyuma yo kubwirwa ko adashobora kwicara mu nteko ishingamategeko hamwe n'uruhinja rwe rw'umuhungu w'amezi atatu.

Depite Stella Creasy, wo mu ishyaka ritavuga rumwe n'ubutegetsi rya Labour, yamenyeshejwe ko binyuranyije n'amategeko kuzana umwana mu mpaka zo mu nteko mu ngoro ya Westminster Hall, nyuma yuko abikoze ku wa kabiri.

Umukuru w'inteko ishingamategeko Sir Lindsay Hoyle yasabye akanama k'abadepite gusuzuma amategeko.

Madamu Creasy yavuze ko "yishimiye kumva ibi" - kuko ayo mategeko yari asobanuye ko atari ari mu cyumba cy'inteko ubwo yabitangazaga.

Ariko Depite Scott Benton wo mu ishyaka rya Conservative riri ku butegetsi, kuri Twitter yanenze uwo Depite mugenzi we, agira ati:

"Ababyeyi bahembwa igice gito cy'ayo uhembwa bariha abita ku mwana bagakora n'inshingano kugira ngo bashobore kujya ku kazi. Ni iki gituma wowe wihariye cyane?"

Ageza ijambo ku nteko, Sir Lindsay yavuze ko ari "ingenzi cyane" ko ababyeyi bashobora kugira uruhare rwuzuye mu kazi k'inteko, ifite igice cy'irerero ry'abana.

Yabwiye abadepite ati: "Amategeko agomba kubonwa mu ishusho ngari kandi arahinduka bijyanye n'ibihe".

Yasabye akanama gashinzwe imikorere mu nteko "gusuzuma iki kibazo". Aka kanama, kayobowe na Depite Karen Bradley wo mu ishyaka rya Conservative, ni ko kajya inama ku buryo bw'imikorere bushoboka mu nteko.

Mbere yaho, Madamu Creasy yari yavuze ko ayo mategeko ari "amakuru kuri jyewe" (sinari mbizi), nyuma yuko mu gihe cyashize yitabiriye ibiganiro-mpaka byo mu nteko afite umwana, asaba ko ibyo bisuzumwa.

Madamu Creasy yabwiye BBC ko yari amenyereye kujyana umwana we w'umuhungu mu nteko - muri iki gihe arimo kumwonsa - kandi ko na mbere yaho yajyanagayo undi mwana we w'umukobwa.

Ariko nyuma yuko ku wa kabiri agaragaye ari kumwe n'umuhungu we mu cyumba byegeranye cya Westminster Hall, yakiriye ubutumwa bwo kuri 'email' yohererejwe n'umunyamabanga wihariye wa Dame Eleanor Laing, umukuru w'akanama k'imyitwarire, buvuga ko ibyo bitajyanye n'amategeko aherutse gutangazwa ku "myitwarire n'ikinyabupfura".

Minisitiri w'intebe wungirije w'Ubwongereza Dominic Raab yavuze ko afitiye "impuhwe nyinshi" uwo Depite uhagarariye akarere ka Walthamstow, kandi ko abanyapolitiki bacyeneye kugenzura ko "umwuga wacu uzanwa mu isi igezweho... [kugira ngo] ababyeyi bashobore gukorera hamwe akazi n'igihe cyo mu muryango bacyeneye".

Ariko, nubwo yavuze ko umwana mu nteko "mu by'ukuri ntiyandangaza cyangwa ngo ambuze gukora akazi kanjye", Bwana Raab yavuze ko abakuriye inteko ari bo bo gufata icyemezo ku "buryo bwiza bwo kubihuza".

Umuvugizi wa Boris Johnson yavuze ko Minisitiri w'intebe ashaka kubona "andi mavugurura" agamije gutuma inteko ishingamategeko ikora mu buryo bubereye umuryango, ariko ko impinduka iyo ari yo yose yakorwa ku mategeko ari abadepite bo ubwabo bayifataho icyemezo

Umuvugizi wa Sir Keir Starmer, umukuru w'ishyaka rya Labour, yavuze ko bidakwiye ko agira icyo abivugaho mu gihe akanama k'imikorere ko mu nteko karimo kubyigaho.

Uwo Depite wo mu ishyaka rya Labour - urimo gushishikariza abandi babyeyi b'abagore kujya muri politiki abinyujije mu bukangurambaga yise 'This Mum Votes' - yari yatangaje kuri Twitter ubwo butumwa bwa 'email' yohererejwe, arandika ati:

"Ababyeyi bo mu nteko yabyaye izindi zose [ku isi] ntibitezwe kuboneka cyangwa kumvikana ni ko bigaragara..."

BBC ntibazwa ibivuye ku zindi mbuga.

Amategeko agenga imikorere y'inteko - yatangajwe n'umukuru w'inteko n'abamwungirije kandi akareba abo mu nteko ishingamategeko umutwe w'abadepite izwi nka 'House of Commons' n'abo mu ngoro ya Westminster Hall - yavuguruwe mu kwezi kwa cyenda.

Agira ati: "Ntukwiye gufata icyicaro cyawe mu cyumba igihe uherekejwe n'umwana wawe, cyangwa ngo uhagarare haba ku mpera y'icyumba, cyangwa mu bice byo hagati y'imyanya". Iyi mvugo yanakoreshejwe mu nyandiko yabanjirije iyi, y'aya mategeko agenga imikorere y'inteko.

Ariko undi Depite, Alex Davies-Jones, yavuze ko yijejwe n'umukuru w'inteko Lindsay Hoyle ko igihe yaba acyeneye konsa umwana we mu cyumba cy'inteko ashobora kubikora.

Madamu Creasy yavuze ko ibi "si uburyo bukora kuri buri muntu uwo ari we wese utari umugabo w'imyaka runaka [iri hagati na hagati] ufite inkomoko runaka".

Yongeyeho ko uko ibintu bimeze ubu "ni bibi kuri demokarasi yacu".

Jo Swinson, wahoze ari Depite wo mu ishyaka ritavuga rumwe n'ubutegetsi rya Liberal Democrats, byibazwa ko ari we Depite wa mbere wakikiye umwana we bwa mbere mu cyumba cy'inteko harimo kuba ikiganiro-mpaka mu 2018

Muri uwo mwaka kandi, Minisitiri w'intebe wa New Zealand (Nouvelle-Zélande) Jacinda Ardern yabaye umutegetsi wa mbere ku isi wajyanye umwana we imbere mu cyumba aho yavugiye ijambo mu nama y'inteko rusange y'umuryango w'abibumbye (ONU/UN) i New York.

Umuvugizi w'inteko ishingamategeko y'Ubwongereza, umutwe w'abadepite, yavuze ko ari ingenzi cyane ko abadepite bose bashobora gukora inshingano zabo imbere mu nteko no mu nkengero zayo.

Yongeyeho ko igihe icyo ari cyo cyose abadepite bashobora kwiyambaza umukuru w'inteko, abungirije umukuru w'inteko, abakozi bo mu nteko n'abacunga imiryango (inzugi) ku byo bacyeneye igihe bari mu cyumba cy'inteko cyangwa mu ngoro ya Westminster Hall.