British American Tobacco no guha ruswa Robert Mugabe, ibimenyetso bishya

Iperereza rya BBC Panorama ryabonye ibimenyetso ko imwe muri kompanyi zikomeye mu Bwongereza yishyuye ruswa uwahoze ari perezida wa Zimbabwe Robert Mugabe.

Inyandiko zerekana ko British American Tobacco (BAT) yinjiye mu biganiro byo guha ishyaka Zanu-PF ruswa iri hagati ya $300,000 na $500,000 mu 2013.

Izo nyandiko zerekana kandi ko BAT yishyuraga ruswa muri Africa y'Epfo kandi ikora kuneka kutemewe ngo ice intege abakeba bayo.

BAT ivuga ko iharanira kugendera ku myitwarire ikwiriye muri iyi kompanyi.

Perezida Mugabe wategetse imyaka 37 yagiye atsinda amatora bivugwa ko yabaga arimo kwiba amajwi n'urugomo.

Yahiritswe mu 2017 apfa mu 2019. Ishyaka rye Zanu-PF ubu rifite abarikuriye bashya.

Mu iperereza rihuriweho na Bureau of Investigative Journalism na University of Bath, BBC Panorama yabonye inyandiko ibihumbi zacitse ba nyirazo batabishaka.

Zerekana uko BAT yashinze itsinda rya ba maneko bo kuyiha amakuru bagera kuri 200 muri Africa y'amajyepfo.

Byinshi mu byabonywe byavanywe mu kigo cyigenga Forensic Security Services (FSS) gitanga serivisi z'umutekano cyo muri Africa y'Epfo.

FSS yari ishinzwe kurwanya ubucuruzi bwa magendu bw'amasegereti, ariko abahoze bayikorera babwiye BBC ko bishe amategeko kugira ngo bahungabanye abakeba ba BAT.

Imikorere muri Zimbabwe

Inyandiko z'imbere zerekana ko rimwe abakozi ba FSS bahawe amabwiriza yo gufunga inganda eshatu z'amasegereti z'abakeba ba BAT muri Zimbabwe.

Mu 2012, FSS yishyuye kompanyi yaho ngo ijye igenzura mw'ibanga Savanna Tobacco, ariko iyo kompanyi iza gufatwa.

Abagabo batatu mu bayikuriye bashinjwe kugira aho bahuriye n'ubwo butasi barafungwa. Ibi byatumye uwari perezida Robert Mugabe mu ijambo rye anenga ibyo bikorwa n'uruhare rwakekwaga rwa BAT muri byo.

Gusa, Panorama yabonye ko inyuma y'ibyo mu bwihisho, abakozi batumwe na BAT bariho baganira n'abategetsi ba Zimbabwe.

Umugabo woherejwe kuganira nabo, wifuje kudatangazwa, yabwiye Panorama ko yahaye ruswa bamwe mu bagize guverinoma kugira ngo abashe kuganira na bo ku kibazo cya bariya bagabo bari bafunzwe.

Yagize ati: "Nagombaga kumenya neza ko bahawe ibahasha iremereye yuzuye inoti."

British American Tobacco ni iki?

Inyandiko zabonywe na BBC zemeza ko uwo mugabo yari yahawe angana na $12,000 mu mafaranga ya Zimbabwe. Zerekana kandi ko ayo mafaranga yari yatanzwe na BAT.

Inyandiko y'imbere mu kigo isobanura ibyo BAT yifuzaga. Umutegetsi muri Zimbabwe yavuze ko mu gihe hari hegereje amatora ya perezida, impano ku ishyaka rya Zanu-PF yafasha.

Iyo nyandiko igira iti: "Hamwe n'iyo mpano, bashobora noneho gusubira kuri perezida" kureba uko ikibazo cyarangira.

Ikomeza iti: "Ingano y'iyo mpano igomba kuba hagati ya USD300,000 na USD500,000 kuri Zanu-PF."

Iyo nyandiko ariko ntizerekana niba iyo ruswa nyuma yaratanzwe, ariko Panorama yavuganye n'abantu batatu bemeje ko BAT yari izi neza ibiri muri uko kumvikana.

Hashize iminsi gusa iyi mpano imaze kuvuganwaho, ba bayobozi batatu bahise barekurwa.

BAT yanze gusubiza Panorama ku byo kwishyura muri Zimbabwe, ariko ntabwo yahakanye guha ruswa Robert Mugabe.

Binyuranyije n'amategeko mu Bwongereza ko kompanyi yaho itanga ruswa, aho yakwishyurirwa hose.

'Network' nini kurushaho

FSS yakoranye na BAT muri Africa y'amajyepfo hagati ya 2000 na 2016.

Ibimenyetso byerekana ko bahaye ruswa abashinzwe gasutamo n'abapolisi, kandi ko BAT yabonye amakuru ya camera za polisi, zakoreshejwe mu kuneka ba mukeba bayo.

FSS yafashe amajwi abakeba ba BAT, ishyira ku modoka ibikoresho byo gukurikirana aho zijyana itabi, inaha abakozi ruswa ngo bayihe amakuru.

Inyandiko zerekana ko umukozi mukuru wo ku kicaro gikuru cya BAT i Londres ubwe yahaye akazi akanishyura abakozi b'inganda za mukeba ngo bajye babaha amakuru.

Abakozi ba BAT kandi bashoboraga gushyira amafaranga ku makarita yabo i London agakurwaho n'ababaha amakuru mu buryo buhishwe muri Africa y'Epfo.

Ni uburyo bwo kwishyura bukunda gukoreshwa n'amatsinda y'abagizi ba nabi kugira ngo hatagira ubavumbura.

Abanyamategeko ba BAT bavuga ko ibi birego atari bishya kandi bitanyuranyije n'amategeko kwishyura ngo ubone amakuru ku bikorwa bigize ibyaha.

Bavuga ko iyo kompanyi ihakana kugira icyo ikora kigamije guhungabanya ibikorwa byemewe n'amategeko bya ba mukeba cyangwa igamije inyungu z'ubucuruzi.

BAT yavuze ko; "Turamagana cyane gusebya imikorere yacu... Umuhate wacu mu kurwanya ubucuruzi butemewe wari ugamije gufasha inzego z'ubutegetsi kurwanya ibyaha mu bucuruzi bw'itabi.

"Gukora ibikwiriye n'ubunyangamugayo nibyo shingiro ry'umuco wacu."

Ntabwo ari ubwa mbere BAT ishinjwa ruswa. Mu 2015, Panorama yasanze barishyuye rwihishwa abanyapolitiki n'abakozi ba leta mu bihugu byo muri Africa y'Iburasirazuba kugira ngo bagenze gahoro amategeko arwanya itabi.

Ibi byatumye hatangira iperereza ryamaze imyaka itanu rikorwa n'ikigo Serious Fraud Office (SFO) cyo mu Bwongereza. Mu ntangiriro z'uyu mwaka cyanzuye ko nta bimenyetso bihagije byo gutuma hari abakurikiranwa.

BAT ivuga ko yakoranye byeruye na SFO mu iperereza, ryarimo ibirego bijyanye na Africa y'Epfo bikarangira nta kigezweho.

Wareba BBC Panorama: Dirty Secrets of the Cigarette Business kuri BBC World kuwa gatandatu tariki 18/09 saa 02:30 GMT no ku cyumweru tariki 19/09 saa 09:30 GMT na 21:30 GMT