Angola mu myiyerekano yo kwiyamiriza ihindurwa ry’itegeko rigenga amatora
Abanywanyi amajana n'amajana b'imigambwe itavuga rumwe n'umugambwe uri ku butegetsi muri Angola ejo ku wa gatandatu bihaye amabarabara ku mugwa mukuru, Luanda, biyamiriza ingingo yo guhindura itegeko rigenga amatora.
Muri iri tegeko rishasha, ibiharuro vy'ivyavuye mu matora bizosohokera ku biro bikuru vy'igihugu hagurarurirwa mu burere no mu ntara.
Abarinegura bavuga ko rizotuma amatora arangwa n'igipfungu.
Iyi myiyerekano yateguwe n'umugambwe mukuru utavuga rumwe n'uwuri ku butegetsi, UNITA, ikaba yitabiriye n'iyindi migambwe.
UNITA isaba ko hatanguzwa ingamba zo kurwanya uburiganya bwo mu matora harimwo ugukoresha urutonde rw'abatora hifashishijwe ubuhinga bwa none ( identification biométrique des électeurs/ biometric voter identification).
Uyu mugambwe wahoze ari umuhari warwanya ubutegetsi gisirikare urongowe na Jonas Savimbi, mu nyuma ukaba umugambwe wemewe n'amategeko mu gihugu, usaba ko amashirahamwe adaharanira ivyicaro vya poritike nayo nyene agira uruhara mu bikorwa vyo guharura amajwi.
Perezida João Lourenço wa Angola yiteze kwitoreza ikiringo ca kabiri mu matora ategekanijwe mu mwaka uxa wa 2022.
Muri ino ndwi niho yemeza iri tegeko ryiyamirijwe n'abashingamateka batavuga rumwe n'umugambwe People's Movement for the Liberation of Angola (MPLA) uri ku butegetsi, aho bamwe bahisemwo kudatora, abandi nabo bagashira mu ryirabura, ariko ibi bikaba bitabujije ko ryemezwa kubera ari inkehwa mu nama nshingamateka.
Abapolisi bitwaje ibihiri nibo bahagarariye iyi myiyerekano.
MPLA niyo iri ku butegetsi muri ico gihugu kuva kironse intahe y'ukwikukira mu 1975, inyuma y'imyaka amajana gicurwa bufuni na buhoro na Portugal.
