Menya aya mategeko atanu mashya atari asanzweho aje muri iki gikombe cy'isi
Ahavuye isanamu, Getty Images
- Umwanditsi, Dale Johnson
- Igikorwa, BBC Spor
- Yatangajwe
- Igihe co gusoma: iminota 4
Igikombe cy'Isi cya 2026 cyitezweho kuzana impinduka nyinshi ku mategeko y'Umukino zizahindura uburyo umupira w'amaguru ukinwa n'uko uyoborwa.
Izi mpinduka zigamije kugabanya gutakaza igihe, kongera ubutabera mu byemezo by'abasifuzi no kugabanya amayeri yo kubangamira umuvuduko w'umukino.
Perezida wa Komite y'abasifuzi ya FIFA, Pierluigi Collina, yavuze ko zimwe muri izo mpinduka zamaze kwemezwa, mu gihe izindi zari zitezwe gushyirwa mu bikorwa mu irushanwa rikomeye ry'umupira w'amaguru ku isi ritangira muri iki cyumweru.
Intego nyamukuru ni ukureba ko umukino wihuta kandi usobanutse neza, umusaruro ugenwa cyane n'ubushobozi bw'amakipe mu kibuga.
Mu myaka yashize, hagiye hagaragara ibirego ku bijyanye n'amayeri y'abakinnyi yo gutakaza umwanya, aho bamwe mu bakinnyi biyitirira imvune kugira ngo abatoza bahabwe amahirwe yo gutanga amabwiriza.
FIFA ubu irimo gufata ingamba zikaze kugira ngo izo ngezo zigenzurwe.
Biteganijwe izi mpinduka zizatuma igikombe cy'isi kiba kimwe mu marushanwa afite impinduka cyane mu mateka y'umupira w'amaguru wa none, aho abasifuzi bahabwa ububasha bwo kuyobora umukino mu buryo bwihuse.
Si byiza ko abakinnyi bose bava mu kibuga
Imwe mu mpinduka z'ingenzi ni ukwirinda icyo bita "gucika intege kw'umunyezamu".
Iki ni igihe umunyezamu aryama hasi, akigira nk'uwavunitse, mu gihe abandi bakinnyi bava mu kibuga berekeza ku ntebe y'abasimbura kugira ngo umutoza abahe andi mabwiriza.
FIFA yemeje ko niba umunyezamu agize imvune umukino ugahagarara, abakinnyi b'amakipe yombi batemerewe kujya ku ntebe y'abatekinisiye.
Ahubwo, bazaguma aho bari cyangwa baterane hagati mu kibuga bategereze ko umukino ukomeza.
Iyi ngamba igamije gukuraho ikoreshwa ry'imvune nk'uburyo bwo kubona umwanya wo gutegura umukino kwemeza ko umukino udahagarara kubera impamvu zitari ngombwa.
Collina yavuze ko bidasanzwe kubona umunyezamu, umusifuzi n'abaganga gusa mu kibuga mu gihe abandi bakinnyi bose bari ku ruhande rw'ikibuga, kandi ko izi mpinduka zizatuma umukino uba mwiza.
Igitego kivuye ku ikosa mbere yuko umupira ukinwa ni akarengane
Ahavuye isanamu, Getty Images
Indi mpinduka ikomeye irebana no gukoresha ikoranabuhanga rya Video Assistant Referee (VAR) mu gutera penaliti n'indi mipira iteretse.
Mbere yaho, amakosa yakorwaga mbere yuko umupira uterwa ku mugaragaro ntabwo yashoboraga gusuzumwa na VAR, ibyo bikaba byaratumye habaho kwinubira mu mikino imwe n'imwe.
Collina yavuze ko hari ibitego byatsinzwe mu buryo butari bwo, cyane cyane iyo abatsinda ibitego bakoze amakosa cyangwa bagahagarika mbere yuko umupira uterwa ariko umukino ugakomeza uko bisanzwe.
Ubu, International Football Association Board (IFAB) yemeje impinduka zemerera VAR gukora iperereza ku makosa yabayeho mbere yuko umupira ukinwa, niba ibyabaye bigira ingaruka ku musaruro w'umukino nko gutsinda igitego, guhana cyangwa ibihano.
Ibi bivuze ko iyo bigaragaye ko hari ikosa ryakozwe mbere yuko umupira uterwa kuri 'corner' cyangwa free kick/coup-francs, umusifuzi ashobora gutegeka ko umupira usubira guterwa.
Ahavuye isanamu, BBC/Getty Images
Aya ni amwe mu mategeko mashya mu gikombe cy'isi
- Itegeko ry'amasegonda atanu: Mu gihe umukinnyi atinze kugarura umupira mu kibuga nkana (kunaga no gutera umupira mu kibuga k'umunyezamu) akarenza amasegonda atanu, umusifuzi ashobora guha ikipe bahanganye uburenganzira bwo gutera umupira.
- Amasegonda 10 yo gusimbuza: Umukinnyi ugiye gusimburwa azaba afite amasegonda 10 gusa yo gusohoka anyuze mu nzira yo gusohokera hafi. Niba atinze nyuma y'icyo gihe, umusimbura ntazemererwa guhita yinjira
- Gusubira mu kibuga uvuye kuvurwa: Mu gihe umukinnyi yavunitse akajyanwa hanze y'ikibuga kwitabwaho, azasabwa kuguma hanze y'ikibuga amasegonda 60 mbere yo kwemererwa kugaruka mu mukino, keretse mu bihe bidasanzwe nko mu mvune z'umunyezamu cyangwa aho uwo bahanganye yahawe ikarita y'umuhondo cyangwa itukura
- Gupfuka umunwa wawe mu gihe uvuga: Umukinnyi upfuka umunwa we n'intoki, ishati cyangwa ubundi buryo mu gihe avugana cyangwa aganira n'uwo bahanganye ashobora guhabwa ikarita itukura, izi ngamba zigamije gukumira imyitwarire ishobora kubangamira itumanaho ry'abakinnyi, cyane cyane ibitutsi n'ivanguramoko
- Ububasha bushya bwa VAR: Abasifuzi bakoresha VAR ubu bahawe ububasha bwo kugenzura niba umupira wa 'corner' cyangwa wa 'coup-franc' byatanzwe nta kwibeshya kurimo, kandi bazashobora no gusuzuma icyemezo cya kabiri cy'ikarita y'umuhondo cyatumye umukinnyi yirukanwa. Ariko, amakarita y'umuhondo asanzwe ntabwo azasuzumwa na VAR.
- Ikarita irukura ku kugumuka: Umukinnyi wese uva mu kibuga mu kwinubira icyemezo cy'umusifuzi azahita ahabwa ikarita itukura. Amakipe atuma umukino uhagarikwa ubu azajya ahita aterwa mpaga.
FIFA ivuga ko izi mpinduka zose zigamije gutuma igikombe cy'isi cya 2026 kiba cyiza, cyihuse kandi nta kwinubirwa kw'ibyemezo by'abasifuzi, mu gihe umupira w'amaguru ukomeza kuba umukino urushanwa kandi ushimishije ku isi.
